Sääni šoodâi olmožin
1Aalgâst lâi Sääni.
Sääni lâi Immeel kulen,
já Sääni lâi Immeel.
2Jo aalgâst Sääni lâi Immeel kulen.
3Puoh šoodâi Sääni vuoimijn.
Mihheen, mii lii šoddâm,
ij lah šoddâm suuttáá.
4Sust lâi eellim,
já eellim lâi ulmui čuovâ.
5Čuovâ čuává sevŋâdâsâst,
sevŋâdâs ij lah finnim tom váldásis.
6Poođij almai, kiäm Immeel lâi vuolgâttâm, suu nommâ lâi Juhánâs. 7Sun poođij tuođâšteijen, tuođâštiđ čuovâst, nuuvt et puohah oskoččii toos. 8Ij sun jieš lamaš tuot čuovâ, mut čuovâ tuođâšteijee sun lâi.
9Tuođâlâš čuovâ, kote čuává jyehi ulmuu,
lâi puátimin maailmân.
10Maailmist sun lâi,
já suu peht maailm lâi uážžum šoddâmis,
mut tot ij tubdâm suu.
11Sun poođij jieijâs maailmân,
mut suu uámih iä váldám suu vuástá.
12Mut puohháid, kiäh valdii suu vuástá,
sun adelij vuoigâdvuođâ šoddâđ Immeel pärnin,
puohháid, kiäh uskuu sunjin.
13Sij iä lah šoddâm voorâst,
iä rummâš haalust,
iä almaa táátust,
pic Imelist.
14Sääni šoodâi olmožin
já aasâi mii juávhust.
Mij uážuim kejâdiđ suu kirkkâdvuođâ,
kirkkâdvuođâ, mon Eeči addel áinoo Aalgan.
Sun lâi tievâ áármust já tuotâvuođâst.
15Juhánâs tuođâštij sust já čuárvui: »Sun lii tot, kiäst mun ettim: Muu maajeeldpuáttee jotá muu ovdiibeln, tastko sun lii lamaš ovdil muu.»
16Suu tievâsvuođâst mij puohah lep finnim,
áármu áármu lasseen.
17Laahâ adelui Mooses peht,
áármu já tuotâvuođâ puovtij Jeesus Kristus.
18Kihheen ij lah kuássin uáinám Immeel.
Áinoo Alge, kote jieš lii Immeel
já kote ain lii Eeji paaldâst,
lii máttááttâm mii tubdâđ suu.
Juhánâs Kästee tuođâštus
19Taat lii tuođâštus, mon Juhánâs adelij, ko juudaliih vuolgâttii Jerusalemist paapâid já leevilijd koijâdiđ sust: »Kii tun lah?» 20Juhánâs tubdâstij tuotâvuođâ, sun ij tom kiäldám. Sun eeđâi: 21»Jiem mun lah Messias.» »Mii te talle?» sij koijâdii. »Lah-uv tun Elia?» »Jiem lah», Juhánâs västidij. »Lah-uv tun tot lopedum proofeet?» Sun västidij: »Jiem.» 22Talle sij ettii: »Kii tun talle lah? Mij kolgâp tuálvuđ vástádâs toid, kiäh mii vuolgâttii. Maid tun eeđah alnestâd?» 23Juhánâs västidij: »Mun lam jienâ, kote čuárvu ävđinkuávlust: ’Tassiđ Hiärán kiäinu!’ Nuuvthân proofeet Jesaja lii ennustâm.»
24Toi juávhust, kiäh lijjii vuolgâttum Juhánâs kuuvl, lijjii meiddei fariseuseh. 25Sij koijâdii sust: »Mondiet tun talle káástáh ulmuid, jis jieh lah Messias, jieh Elia jiehke tot proofeet?» 26Juhánâs västidij: »Mun káástám čassijn, mut tii juávhust lii jo nubbe, veik tij eppeđ suu tuubdâ, 27sun, kote puátá muu maŋŋaal. Mun lam árvuttem joba čuávdiđ suu vuodduidgin.»
28Taat tábáhtui Jordan tovnbeln, Betaniast, kost Juhánâs lâi kästimin.
Immeel lääbis
29Čuávuváá peeivi Juhánâs ooinij, et Jeesus lâi puátimin suu kuuvl. Juhánâs eeđâi: »Keččâđ: Immeel Lääbis, kii váldá meddâl maailm sudo! 30Sun lii tot, kiäst mun ettim: ’Muu maŋŋaal puáttee jotá muu oovdâst, tastko sun lii lamaš ovdil muu.’ 31Mungin jiem tubdâm suu, mut eidu tađe várás mun lam puáttám kästiđ čassijn, vâi Israel uážuččij tiettiđ, kii sun lii.»
32Juhánâs tuođâštij: »Mun lam uáinám, maht Jieggâ luáštádâđâi almeest tuvváá náál já paasij suu oolâ. 33Mungin jiem suu tubdâm. Mut sun, kote vuolgâttij muu kästiđ čassijn, eeđâi munjin: ’Tot, kiän oolâ tun uáináh Jiegâ luáštádâtmin já päcimin, kástá Pase Jieggáin.’ 34Mun lam tom uáinám já tuođâštâm, et taat almai lii Immeel Alge.»
Jeesus vuosmuuh máttááttâspárnááh
35Čuávuváá peeivi Juhánâs lâi siämmáá saajeest, já sust lâi máttááttâspärnikyevtis juávhustis. 36Jeesus juuđij tast lappâd, já Juhánâs čaaitij sunjin já eeđâi: »Keččâđ: Immeel Lääbis!» 37Ko máttááttâspärnikyevtis kuuláin suu saanijd, te suoi vuolgijn čuávvuđ Jeesus. 38Jeesus jorgettij, já ko sun ooinij sii čuávumin, sun koijâdij: »Maid tuoi haalijdvettee?» Suoi västidáin: »Rabbi» – tot meerhâš: máttáátteijee – »kost tun aasah?» 39»Puáttee, te uáinivettee», Jeesus eeđâi. Suoi moonáin já oinijn, kost sun orostâlâi, já suoi passijn suu kuuvl loppâpiäiván. Eehid lâi puátimin, lâi nyevt lovváád tijme. 40Nubbe tain, kiäh kuuláin Juhánâs saanijd já vuolgijn čuávvuđ Jeesus, lâi Andârâs, Simmoon Piättár viljâ. 41Sun uusâi vistig viiljâs Simmoon já eeđâi sunjin: »Mij lep kavnâm Messias!» – tot meerhâš Vuoidum. 42Andreas tuálvui suu Jeesus kuuvl. Jeesus keejâi sunjin já eeđâi: »Tun lah Simmoon, Juhánâs alge. Tuu nommâ liävus Keefas» – tot meerhâš: Källee.
43Čuávuváá peeivi, ko Jeesus lâi vyelgimin Galilean, sun teeivâi Filippusáin já eeđâi sunjin: »Čuávu muu.» 44Filippus lâi meddâl Betsaidast, siämmáá kaavpugist ko Andârâs já Piättár. 45Filippus teeivâi Natanaeláin já eeđâi sunjin: »Mij lep kavnâm suu, kiäst Mooses laahâ já profetij kirjeh tuođâšteh! Sun lii Jeesus, Joovsep alge Nasaretist.» 46»Nasaretist-uv?» Natanael koijâdij. »Puáhtá-uv Nasaretist puáttiđ mihheen puorijd?» »Puáđi te tun uáináh», eeđâi Filippus. 47Ko Jeesus ooinij Natanael puátimin, sun eeđâi: »Tie lii rievtis israellâš, almai, kiäst ij lah mihheen epirehelâšvuođâid!» 48»Mast tun muu tuubdah?» Natanael koijâdij. Jeesus västidij sunjin: »Jo ovdilgo Filippus tuu kočoi, mun oinim tuu viigunmuorâ vyelni.» 49Natanael eeđâi: »Rabbi, tun lah Immeel Alge, tun lah Israel kunâgâs!» 50Jeesus eeđâi sunjin: »Oskoh-uv tun jo ton vuáđuld, ko mun ettim et lam uáinám tuu viigunmuorâ vyelni? Ennuv stuárráábijd-uv tun uážuh vala uáiniđ.» 51Já sun joođhij: »Tuođâi, tuođâi: tij uážžuvetteđ uáiniđ alme lemin áávus, já tij uáinivetteđ Immeel eŋgâlijd jotemin pajas já vuálus tobbeen, kost Immeel Alge lii.»
