Luukas 24

₁Vuosmuu peeivi sabbaat maŋa nisoneh jo tooláá iđedist monnii häävdi kuuvl já valdii jieijâs haahâm opsâoljoid fáárun. ₂Sij vuottii, et keđgi lâi vierâttum häävdi oovdâst, ₃já ko sij monnii siisâ háávdán, sij iä kavnâm Hiärrá Jeesus rummâš. ₄Ko sij lijjii täst hiämáskâm, sii oovdâst čuážžoin paifakkist almaakyevtis šeris pihtâsijguin. ₅Nisoneh palaskii já teddii kejâstuvâs enâmân. Mut almaakyevtis eeđáin sijjân: »Mondiet tij ucâvetteđ suu, kote lii elimin, jämmei juávhust? ₆Ij sun lah tääbbin, sun lii pajanâm jämimist. Mušteđ, maid sun eeđâi tijjân, ko sun lâi vala Galileast: ₇Näävt kalga keevvâđ: Ulmuu Alge adeluvvoo suddogâsâi kieđáid já riistânnävlejuvvoo, mut kuálmád peeivi sun paijaan jämimist.» ₈Talle sij muštii, maid Jeesus lâi sárnum. ₉Ko nisoneh lijjii maccâm häävdi kulen, sij tolvuu täst sääni oovtânubálov máttááttâspáárnán já puoh iärásáid. ₁₀Taah nisoneh lijjii Magdala Máárjá, Johanna já Jáákkup enni Máárjá, já vala iäráseh-uv siiguin. Sij muštâlii puoh apostoláid, ₁₁mut taah arvâlii, et nisoneh sarnuu jyevdilâsâid iäge oskom sii. ₁₂Piättár vuolgij kuittâg kaačân häävdi kuuvl. Ko sun kuovlâlij siisâ, sun ooinij tuše kiessâmliijnijd, já sun vuolgij meddâl já imâštâlâi tom, mii lâi tábáhtum.

₁₃Siämmáá peeivi láin kyehti máttááttâspárnáá monâmin Emmaus-nommâsii siijdân, kuus lii Jerusalemist kyevti tiijme väzzimmätki. ₁₄Suoi savâstâláin puoh tain aašijn, moh lijjii tábáhtum. ₁₅Sunnuu tast savâstâldijn já suogârdâldijn Jeesus jieš seervâi sunnui juávkun já juuđij sunnuin. ₁₆Suoi iävá kuittâg tubdâm suu, ko sunnuu čalmeh lijjii tegu siävŋudittum.

₁₇Jeesus koijâdij sunnust: »Mast tuoi mätkialmaah jiešalnees savâstâlvettee?» Suoi orostáin murâslâžžân, ₁₈já nubbe sunnust, kiän nommâ lâi Kleopas, västidij: »Tun tááiđáh leđe Jerusalemist áinoo vieresolmooš, kote ij tieđe, mii tobbeen lii tai peeivij tábáhtum.»

₁₉»Maid tuoi uáivildvettee?» Jeesus koijâdij. Suoi västidáin: »Tom, mii tábáhtui Jeesus Nasaretlâžân. Tot almai lâi tuotâ proofeet, saanijn já tavoin vuáimálâš, sehe Immeel já puoh aalmug oovdâst. ₂₀Mii ollâpaapah já haldâttâsalmaah luovâttii suu jämimân tuommiimân já riistânnävlejii suu. ₂₁Mij kuittâg lâim taggaar tuáivust, et sun ličij tot, kote looneest Israel. Ige tast vala puoh. Onne lii jo kuálmád peivi tast, ko tot tábáhtui, ₂₂já tääl láá motomeh mii juávhu nisoneh njuolgist eeđân hiämáskittám mii. Sij ellii tooláá iđedist häävdi kulen ₂₃mut iä kavnâm suu rummâš. Tobbeen puáttim maŋa sij vala muštâlii, et oinii uáináttâs: eŋgâlijd, kiäh ettii, et Jeesus lii elimin. ₂₄Motomeh mist monnii talle häävdi kuuvl já oinii, et äšši lâi nuuvt ko nisoneh lijjii ettâm. Jeesus sij iä uáinám.»

₂₅Talle Jeesus eeđâi sunnui: »Vuoi tij ibbeerdmettumeh! Nyevt hitáseh-uv tij leppeđ oskođ puoh tom, maid profeteh láá sárnum? ₂₆Eidu nuuvthân Messias koolgâi killáđ, jeđe moonnâđ kirkkâdvuotâsis.» ₂₇Já sun čielgij sunnui Moosesist já puoh profetij rääjist, maid sust lijjii puoh čalluin ettâm.

₂₈Sij lijjii jo puátimin siijdân, kuus sij lijjii monâmin. Jeesus lâi maka juátkimin määđhis, ₂₉mut suoi estijn suu vyelgimist já eeđáin: »Pääsi munnuu kuuvl, lii jo viäigumin.» Nuuvt sun moonâi siisâ já paasij sunnuu kuuvl. ₃₀Ko sun maŋeláá purâdij sunnuin, sun vaaldij leeibi, kiijtij Immeel, tojâlij leeibi já adelij tom sunnui. ₃₁Talle sunnuu čalmeh lekkâsii já suoi tubdáin suu. Mut siämmást sun lâi meddâl sunnuu uáinusist. ₃₂Suoi eeđáin kuáimásis: »Iä-uv munnuu vááimuh acâkkistám moovtâ keežild, ko sun mii jođedijn sáárnui munnui já máttááttij munnuu iberdiđ čalluid?»

₃₃Siämmást suoi vuolgijn máátkán já maccáin Jerusalemân. Tobbeen lijjii čuákist ohtnubáloh máttááttâspärnid já iäráseh, kiäh sii juávkun kullii. ₃₄Taah ettii: »Hiärrá lii tuođâi pajanâm jämimist! Sun lii almostum Simonân.» ₃₅Tuoh kyevtis oppeet muštâláin, mii määđhi ääigi lâi tábáhtum já maht suoi láin tubdâm Jeesus, ko sun tojâlij leeibi.

₃₆Ko sij vala sarnuu täst, fakkist Jeesus jieš čuážui sii kooskâst já eeđâi: »Ráávhu tijjân.» ₃₇Sij suorgânii čuuvtij, tastko sij nobdii, et sij oinii kome. ₃₈Mut Jeesus eeđâi sijjân: »Mondiet tij leppeđ nuuvt hirmástum? Mondiet tii mielân pajaneh iäpádâsah? ₃₉Keččâđ muu kieđâid já juolgijd: mun taa lam, ij kihheen eres. Kuoskâttiđ muu, uáiniđ jiejah. Ij kommeest lah uážži iäge täävtih tego tij uáinivetteđ, et must láá.» ₄₀Ko sun näävt sáárnui, sun čaaitij sijjân kieđâidis já juolgijdis. ₄₁Mut sij iä valagin tiättám, moos oskođ, nuuvt iiloost já hiämáskâm sij tääl lijjii. Talle Jeesus koijâdij: »Lii-uv tist tääbbin mihheen purrâmâššân?» ₄₂Sij adelii sunjin pittáá possum kyeleest ₄₃já oinii, maht sun vaaldij tom kietâsis já puurâi.

₄₄Jeesus eeđâi sijjân: »Taam mun uáivildim, ko mun lijjim vala tii koskâvuođâst já sarnum tijjân. Puoh tot koolgâi šoddâđ tuottân, mii Mooses laavâst, profetij kiirjijn já psaalmâin lii must čallum.» ₄₅Tääl sun lehâstij sii jiermi iberdiđ čalluid. ₄₆Sun eeđâi sijjân: »Näävt lii čallum. Kristus koolgâi killáđ jäämmim já kuálmád peeivi pajaniđ jämimist. ₄₇Já puoh almugáid, Jerusalem rääjist, kalga särnidiđ suu noomâst jorgettem Immeel piälán, vâi sudoh adeluuččii addâgâs. ₄₈Tij leppeđ taan tuođâšteijeeh. ₄₉Mun vuolgâttâm tijjân tom, maid Iäččám lii lopedâm. Pissoođ taan kaavpugist, tassaaš ko kárvuttuuvetteđ vuoimijn ollâgâsâst.»

₅₀Jeesus tuálvui máttááttâspárnáid olgos kaavpugist, Betania aldasáid, já tobbeen sun luptij kieđâs já sivnedij sii. ₅₁Sivneddijnis sun iäránij sist, já sun valdui pajas aalman. ₅₂Sij komárdii eennâm räi já čaittii sunjin kunnijâttem, já talle sij räämist tievâ maccii Jerusalemân. ₅₃Sij lijjii ain temppâlist já alestii Immeel.