Johannes 5

₁Taan maŋa lâi mottoom juudalâš juhle, já Jeesus vuolgij Jerusalemân. ₂Jerusalemist lii Savzâpoortâ alda ääldis, mon hepreakielâ nommâ lii Betesda. Tom roobdâst láá vittâ stuálppuhaali, ₃já toin viällájii stuorrâ pyecceejuávhuh: čalmettemeh, lámáseh já vuoččum ulmuuh. [Taah vuordii, et čääci lihâškuáđáččii. ₄Tyellittälli uáináh Hiärá eŋgâl luáštádâđâi láádun ja piejâi čääsi lihâdiđ, já tot, kote vuosmustáá lavkkij lihâdeijee čáácán, tiervâsmij, puosâiba sun maid peri taavdâid.]

₅Tobbeen lâi almai, kote lâi puoccâm kulmâlovkäävci ihheed. ₆Jeesus ooinij suu tobbeen viälláámin seŋgâmato alne já tieđij, et sun lâi jo kuhháá lamaš puocâmin. Jeesus koijâdij: »Táátuh-uv tun tiervâsmiđ?» ₇Pyeccee västidij: »Hiärrá, must ij lah kihheen, kote išedičij muu áldás, ko čääci liihâd. Ain ko mun irâttâm toho, te kiinii eres kiergân ovdil muu.» ₈Jeesus eeđâi sunjin: »Paijaan, vääldi seŋgâmattod já vääzi.» ₉Almai tiervâsmij tállân, vaaldij mattoos já väzzilij.

Mut tot peivi lâi sabbaat. ₁₀Nuuvtpa juudaliih ettii pyeredum almai: »Tääl lii sabbaat, ij tust lah lope kyeddiđ mattod.» ₁₁Almai västidij sijjân: »Tot, kote pyeredij muu, eeđâi munjin: ’Vääldi mattod já vääzi.’» ₁₂Talle juudaliih koijâdii: »Kii tot almai lâi, kote kočoi tuu väldiđ mattod já väzziđ?» ₁₃Pyeredum almai ij kuittâg tiättám, kii sun lâi, tastko Jeesus lâi jo lappum olmoošjuávkun. ₁₄Maŋeláá Jeesus teeivâi almaa temppâlist já eeđâi sunjin: »Tun lah tääl tiervâs. Ele innig suddod, amas tunjin keevvâđ vala viärráábeht.» ₁₅Almai vuolgij tobbeen já muštâlij juudalijd, et Jeesus lâi suu pyeredâm.

₁₆Juudaliih atâštškuottii Jeesus, tastko sun poorgâi tágárijd sabattin. ₁₇Mut Jeesus eeđâi sijjân: »Muu Eeči parga pargoos koskâlduuhánnáá, já nuuvt poorgâm mun-uv.» ₁₈Taat tuše lasettij juudalij haalu koddeđ suu. Sunhân ij tuše rikkom sabbaatpákkum, pic vala kočoi Immeel jieijâs eeččin já toovâi toin naalijn alnestis Immeel viärdásii.

₁₉Jeesus västidij juudalijd näävt:

»Tuođâi, tuođâi: ij Alge pyevti porgâđ maiden jieijâs mielâ mield; sun parga tuše tom, maid uáiná Eeji porgâmin. Maid Eeči parga, tom parga meiddei Alge. ₂₀Eeči räähist Alge já čáittá sunjin puoh, maid jieš parga. Sun čáittá Aalgan vala stuárráábijd-uv tavoid, tagarijd, et tij hiämáskvetteđ. ₂₁Tego Eeči covná jämmeid já addel sijjân eellim, nuuvt addel meiddei Alge eellim, kiäs táttu. ₂₂Eeči jieš ij tuommii oovtâgin, pic sun lii adelâm puoh tuommimvääldi Aalgan, ₂₃nuuvt et puohah kunnijâtáččii Alge tego sij kunnijâtteh Eeji. Tot, kote ij kunnijât Alge, ij kunnijât Eejigin, kote lii suu vuolgâttâm.

₂₄Tuođâi, tuođâi: tot, kote kulá muu saanijd já osko muu vuolgâtteijei, lii finnim nuvâhánnáá eellim. Sun ij šoodâ tuommiittâttâđ, pic sun lii jo sirdâšum jämimist elimân. ₂₅Tuođâi, tuođâi: puátá äigi – já tot lii jo tääl – kuás uámikkâsah kuleh Immeel Alge jienâ. Toh, kiäh tom kuleh, uážžuh eelliđ, ₂₆tastko Eeči, eellim käldee, lii toohâm meiddei Algeest eellim käldee. ₂₇Eeči lii meiddei adelâm sunjin tuámuvääldi, tastko sun lii Ulmuu Alge. ₂₈Elleđ omâttâl taam! Puátá äigi, kuás puohah, kiäh vuoiŋâsteh havdijnis, kuleh suu jienâ. ₂₉Sij pajaneh havdijnis – pyere porgâm uámikkâsah eellim pajaspaijaanmân, paa toohâm uámikkâsah tuommim pajaspaijaanmân.

₃₀»Jieččân vuoimijguin mun jiem pyevti porgâđ maiden. Mun tuommiim ton mield maid mun kuulâm, já muu tuámu lii rievtis, tastko mun jiem viigâ olášuttiđ jieččân táátu pic muu vuolgâtteijee táátu.

₃₁»Jis mun jieš tuođâštâm jieččân peeleest, te muu tuođâštus ij lah tohálâš. ₃₂Mut must tuođâšt-uv nubbe já mun tiäđám, et tuođâštus, mon sun addel must, lii tohálâš. ₃₃Tij vuolgâttijd ovdâsteijeidâd Johannes kuuvl, já sun tuođâštij tuotâvuođâ peeleest. ₃₄Jiem mun taarbâš oovtâgin ulmuu tuođâštus, pic mun eeđâm tijjân taam, vâi tij piäluštuuččijd. ₃₅Johannes lâi kirkes njuoláin pyellee lamppu, mut tuše uánihis puudâ tij halijdijd ávudiđ suu čuovâst.

₃₆»Must lii tuođâštus, mii lii vuáimálub ko Johannes tuođâštus: tavoh, maid Eeči lii adelâm muu pargon. Taah tavoh, maid mun poorgâm, tuođâšteh, et Eeči lii muu vuolgâttâm. ₃₇Meiddei jieš Eeči, muu vuolgâtteijee, lii adelâm must tuođâštus. Tij eppeđ kuássin lah kuullâm suu jienâ eppeđge uáinám suu muáđuid, ₃₈ige suu sääni piso tist, tastko tij eppeđ osko sunjin, kiän sun lii vuolgâttâm. ₃₉Tij kale tutkâvetteđ čalluid, tastko tij jurdevetteđ et tain tij kavnâvetteđ nuvâhánnáá eellim – já eidu toh tuođâšteh must. ₄₀Mut tij eppeđ haalijd puáttiđ muu kuuvl, vâi uážuččijd eellim.

₄₁»Must ij lah ulmui kijttosij tárbu. ₄₂Mun tuubdâm tii: tist ij lah rähisvuotâ Imelân. ₄₃Mun lam puáttám Iäččán noomâst, eppeđge tij vääldi vuástá muu. Pic jis kiinii eres puátá jieijâs noomâst, te suu tij kale väldivetteđ vuástá. ₄₄Maht tij puávtáččijdgin oskođ! Tij väldivetteđ vuástá kunnee kyeimistâd eppeđge uusâ tom kunnee, mii puátá oovtâ já áinoo Imelist.

₄₅»Elleđ jurde, et mun sujâttâm tii Iäččán oovdâst. Tii sujâtteijee lii Mooses, sun, kiäs tij leppeđ pieijâm tuoivuu. ₄₆Jis tij oskoččijd Mooses, te tij oskoččijd meiddei muu – eidu must sun lii čáállám. ₄₇Pic ko tij eppeđ osko suu čalluid, te maht tij puávtáččijd oskođ muu saavâid!»