Johannes 9

₁Luoddâpiällást Jeesus ooinij almaa, kote lâi šoddâmis rääjist lamaš šoohâd. ₂Máttááttâspárnááh koijâdii sust: »Rabbi, kii lii suddodâm, ko sun lii šoddâm šohâdin? Sun jieš vâi suu vaanhimeh?» ₃Jeesus västidij: »Ij sun iäváge suu vaanhimeh. Nuuvt lii tábáhtum, vâi Immeel tavoh puáđáččii sust almolâžžân. ₄Tääl, ko vala lii peivi, te mij kolgâp toohâđ taid tavoid, maid muu vuolgâtteijee mist vuárdá. Puátá ijjâ, ige talle kihheen pyevti porgâđ. ₅Nuuvt kuhháá ko mun lam maailmist, te mun lam maailm čuovâ.» ₆Näävt eđâdijnis Jeesus čulgâdij enâmân, raahtij čuulgâst taaigâ, vuoidâi tom almaa čolmijd ₇já eeđâi: »Moonâ Siloa áldá kuuvl já posâdât.» – Áldá nommâ meerhâš: vuolgâttum. – Almai moonâi, posâdâđâi já maacâi uáinen.

₈Almaa naabureh já iäráseh-uv, kiäh ovdil lijjii uáinám suu kerjidmin, omâttellii: »Ij-uv taat lah tot, kote čokkái já kerjidij?» ₉Nubeh ettii: »Siämmáš almai, nubeh vuod ettii: »Ij lah, siämmáánálásâš tuše.» Mut sun eeđâi jieš: »Kale tot lam mun.» ₁₀Sij koijâdii sust: »Maht tun lah finnim uáinud?» ₁₁Sun västidij: »Tot almai, kiän nommâ lii Jeesus, raahtij taaigâ, ruvvij tom muu čolmijd já eeđâi: ’Moonâ Siloa áldá kuuvl já posâdât.’ Mun moonnim já posâdâttim, já talle mun finnejim uáinu.» ₁₂»Kost tot almai lii?» sij koijâdellii sust, mut sun västidij: »Jiem mun tieđe.»

₁₃Almai, kote lâi lamaš šoohâd, tolvui fariseusij kuuvl. ₁₄Lâi sabbaat, ko Jeesus raahtij taaigâ já leehâi almaa čoolmijd. ₁₅Meiddei fariseuseh koijâdii almast, maht sun lâi uáiniškuáttám, já almai muštâlij: »Sun piejâi taaigâ muu čolmijd, jeđe mun posâdâttim, já tääl mun uáinám.» ₁₆Talle motomeh fariseusijn ettii: »Ij sun pyevti leđe Immeel almai, tastko sun ij nuávdit sabbaatpákkum.» Iäráseh vuod ettii: »Puávtáččij-uv suddogâs olmooš toohâđ tagarijd immâšijd?» Täst šoodâi nággu, ₁₇já tondiet sij koijâdii vuod šohâdist: »Maid tun jieš arvâlah sust? Tuu čoolmijdhân sun leehâi.» Almai västidij: »Sun lii proofeet.»

₁₈Juudaliih iä oskom, et almai lâi lamaš šoohâd já finnim uáinus, ovdilgo sij kuččuu suu vaanhimijd toos. ₁₉Sij koijâdii vaanhimijn: »Lii-uv taat tunnuu alge? Naggiivettee-uv tuoi, et sun lii šoddâm šohâdin? Maht te lii máhđulâš, et sun tääl uáiná?» ₂₀Vaanhimkyevtis västidáin: »Sun lii munnuu alge, já sun lii šoddâmis rääjist lamaš šoohâd, tom muoi tietteen. ₂₁Mut tom muoi iän tieđe, maht sun tääl puáhtá uáiniđ, iänge tom, kii suu čoolmijd lii lekkâm. Koijâdiđ sust alnees, sun lii rävisolmooš já pasta västidiđ jieš.» ₂₂Suoi eeđáin näävt, tastko suoi pooláin juudalijn. Juudaliih lijjii uáináh meridâm iäruttiđ synagogast juáhháá, kote tubdâstičij Jeesus Messiasân. ₂₃Taan suujâst vaanhimkyevtis eeđáin: »Sun lii rävisolmooš, koijâdiđ sust.»

₂₄Fariseuseh kuččuu oppeet jieijâs kuuvl almaa, kote lâi lamaš šoohâd, Sij ettii sunjin: »Adde kunnee Imelân! Mij tiettip, et tot almai lii suddogâs.» ₂₅Almai västidij: »Lii-uv sun suddogâs, tast mun jiem tieđe. Mut tom mun tiäđám, et mun, kote lijjim šoohâd, tääl uáinám.» ₂₆Sij koijâdellii: »Maid sun tunjin poorgâi? Moin naalijn sun leehâi tuu čoolmijd?» ₂₇Almai västidij: »Johân mun tom tijjân ettim, tij tuše eppeđ kuldâlâm. Mondiet tij vuod haalijdvetteđ tom kuullâđ? Áiguvetteđ-uv tij-uv älgiđ suu máttááttâspärnin?» ₂₈Sij västidii sunjin pilkkedmáin: »Tunhân tot lah suu máttááttâspärni, mij lep Mooses máttááttâspárnááh. ₂₉Mij tiettip, et Immeel sáárnui Moosesân, mut kost tuot almai lii puáttám, tom mij ep tieđe.» ₃₀»Ärttigis äšši», almai västidij, »et tij eppeđ tieđe, kost sun puátá – já kuittâg sun lii adelâm munjin uáinu. ₃₁Puohahhân mij tiettip, et Immeel ij kuulâ suddogâsâid, pic taggaar sun kulá, kote kunnijât suu já iälá suu táátu mield. ₃₂Kuássin ovdil ij lah kullum, et kiinii ličij lekkâm šohâdin šoddâm ulmuu čoolmijd. ₃₃Jis sun ij liččii Immeel almai, te sun ij liččii pastam toos.» ₃₄Talle fariseuseh ettii: »Tun lah šoddâmâd rääjist lamaš suddogâs, tievâ suddoost ubâ almai – já tun máttáátškuáđáh mii!» Sij vuájálittii almaa olgos.

₃₅Jeesus uážui kuullâđ, et almai lâi vuájálittum olgos, já koijâdij sust teivâdijnis: »Oskoh-uv tun Ulmuu Aalgan?» ₃₆»Hiärrá, kii sun lii?» almai koijâdij. »Eeđâ, vâi mun puávtám oskođ.» ₃₇Jeesus eeđâi: »Tun lah uáinám suu. Sun lii taa já sárnu tuin.» ₃₈»Mun oskom, Hiärrá», almai eeđâi já luáštádâđâi enâmân suu oovdân.

₃₉Jeesus eeđâi: »Mun lam puáttám taan maailmân olášuttiđ tuámu: šohâdeh finnejeh uáinus já uáineeh čalmettuveh.» ₄₀Motomeh fariseuseh, kiäh lijjii tast alda, koijâdii taam kulâdijnis: »Ama jieh uáivild, et mij-uv lep šohâdeh?» ₄₁Jeesus västidij: »Jis tij liččijd šohâdeh, tij eppeđ sujâttuuččii suddoost, pic tij naggiivetteđ, et uáinivetteđ, já tondiet suddo piso tist.»