Johannes 10

₁Tuođâi, tuođâi: tot, kote ij moonâ savzâkáárdán verájáást pic kuárŋu tohon eres saajeest, lii suolâ já riävvár. ₂Tot, kote mana verájáást, lii savzâkeččee. ₃Sunjin vahtâ liäkká verájáá, já saavzah kuleh suu jienâ. Sun koččo saavzâid noomâ mield já tuálvu taid kuátumân. ₄Ko sun lii luáštám olgos puoh savzâidis, te sun jotá toi oovdâst, já saavzah čuávuh suu, tastko toh tobdeh suu jienâ. ₅Omâs ulmuu toh iä čuávuškyeđe pic kárgájeh suu kulen, tastko toh iä tuubdâ viärrás jienâ.»

₆Jeesus puovtij sijjân oovdân taan viärdádâs, mut sij iä iberdâm, maid sun savâinis uáivildij. ₇Tondiet Jeesus joođhij:

»Tuođâi, tuođâi: mun lam saavzâi verájâš. ₈Toh, kiäh láá puáttám ovdil muu, láá puohah lamaš suolluuh já riäváreh, iäge saavzah lah kuldâlâm sii. ₉Mun lam verájâš. Tot, kote puátá siisâ muu peht, piäluštuvá. Sun puáhtá rijjâ puáttiđ já moonnâđ, já sun kávná kuáttum. ₁₀Suolâ puátá tuše suáládiđ, koddeđ já tuššâdiđ. Mun lam puáttám adeliđ eellim, valjaas eellim.

₁₁Mun lam pyeri paaimân, rievtis paaimân, kote addel jiegâs saavzâi peeleest. ₁₂Pälkkireŋgâ ij lah rievtis paaimân, iäge saavzah lah suu, já nuuvtpa ko sun uáiná kuumpi puátimin, te sun kuáđá čurruu já paattâr. Kumppi rohhát saavzâid já pieđgee čurruu, ₁₃tastko pälkkipaaimân ij peerust saavzâin.

₁₄»Mun lam pyeri paaimân. Mun tuubdâm savzâidân já toh tobdeh muu, ₁₅tegu Eeči tobdá muu já mun tuubdâm Eeji. Mun adelâm jieggân saavzâi peeleest. ₁₆Must láá meid eres saavzah, tagareh, moh iä lah taam käärdist, já taid-uv mun koolgâm kuáđuttiđ. Toh kuleh muu jienâ já nuuvt šadda leđe ohtâ čuurâ já ohtâ paaimân.

₁₇»Eeči räähist muu, tastko mun adelâm jieggân – vâi uážuččim tom oppeet maassâd. ₁₈Kihheen ij tom must rieveed, jieš mun tom adelâm meddâl. Must lii väldi adeliđ tom já väldi väldiđ tom maassâd. Nuuvt lii Iäččám koččom muu porgâđ.»

₁₉Taah säänih pajedii náágu juudalij kooskân. ₂₀Maaŋgah sist ettii: »Sust lii paas jieggâ, sun lii jallom. Maid tij suu kuldâlvetteđ?» ₂₁Nubeh oppeet ettii: »Nyevt ij sáárnu taggaar, kiäst lii paas jieggâ. Já áppádičij-uv paas jieggâ lehâstiđ šohâdis ulmui čoolmijd?»

₂₂Lâi tälvi, já Jerusalemist viettii temppâl vihkâm tälvijuuhlijd. ₂₃Ko Jeesus vaazij temppâlšiljoost Salomo stuálppuvázáttuvâst, ₂₄te juudaliih pirâstittii suu já vuárnuttii: »Mon kuhháá tun kivsedah mii? Jis tun lah Messias, te eeđâ tom njuolgist.»

₂₅Jeesus västidij: Munhân lam ettâm tom tijjân, mut tij eppeđ osko. Tavoh, maid mun poorgâm Iäččán noomâst, tuođâšteh must. ₂₆Tij eppeđ kuittâg osko, tastko tij eppeđ lah muu saavzah. ₂₇Muu saavzah kuleh muu jienâ já mun tuubdâm taid, já toh čuávuh muu. ₂₈Mun adelâm sijjân nuvâhánnáá eellim. Sij iä kuássin skemmâšuu, ige kihheen rieveed sii must. ₂₉Iäččám, kote lii adelâm sii munjin, lii stuárráb ko kihheen eres, ige kihheen pyevti rievediđ sii Iäččán kieđâst. ₃₀Muoi Eijijn láán ohtâ.»

₃₁Juudaliih oppeet nurâškuottii keeđgijd Jeesus keđgim várás. ₃₂Jeesus eeđâi sijjân: »Mun lam tii uáinidijn toohâm maŋgâ šiev tavo, moh láá vuálgám Eejist. Mii tain addel suujâ keđgiđ muu?» ₃₃Juudaliih västidii: »Mij ep keđgii tuu mongin šiev tavo tiet, pic immeelpilhe tiet. Tun toovah jieijâd Imelin, veikkâ tun lah olmooš.»

₃₄Jeesus västidij: Ij-uv tii laavâst lah čallum: ’Mun eeđâm: tij leppeđ imeleh’? ₃₅Ađai toh, kiäh ožžuu Immeel almottâs, kočoduvvojeh imelin, ige pase čalluid pyevti toohâđ tuššen. ₃₆Eeči lii muu pasottâm já vuolgâttâm maailmân. Maht tij pyehtivetteđ naggiđ, et mun pilkkedâm Immeel, ko mun eeđâm, et lam Immeel Alge? ₃₇Jis mun jiem toovâ Iäččán tavoid, te elleđ osko muu. ₃₈Mut jis mun toovâm, te oskođ tavoidân, veikkâ eppeđ muu oskoččiigin. Talle tij oppâvetteđ iberdiđ, et Eeči lii must já mun lam Eejist.»

₃₉Juudaliih irâttii oppeet väldiđ Jeesus kiddâ, mut sun ij pááccám sii kieđáid.

₄₀Jeesus moonâi oppeet Jordan nubebel, toho kost Johannes lâi aalgâst kástám aalmug. Sun paasij toho mottoom ááigán, ₄₁já suu kuuvl pottii ennuv ulmuuh. Sij ettii: »Johannes ij toohâm oovtâgin tobdostavo, mut puoh, maid sun taam almast eeđâi, lii tuotâ.» ₄₂Maaŋgah uskuu tobbeen Jeesusân.