Johannes 11

₁Mottoom Lasarus-nommâsâš almai lâi puocâmin. Sun aasâi Betaniast, siämmáá siijdâst ko Máárjá já suu uábbi Martta. ₂Máárjá lâi tot, kote vuoidâi Hiärá juolgijd opsâoljoin já kuškij taid vuoptâidiskuin, já pyeccee Lasarus lâi suu viljâ.

₃Lasarus uábbikyevtis vuolgâttáin Jeesusân sääni: »Hiärrá, rähis ustevâd lii puocâmin.» ₄Ko Jeesus tom kuulâi, sun eeđâi: »Taat tavdâ ij lah jäämmimtavdâ pic Immeel kunnen: tot puáhtá uáinusân Immeel Alge kirkkâdvuođâ.» ₅Jeesus rähistij Marta já suu uábi sehe Lasarus. ₆Ko Jeesus kuulâi, et Lasarus lii puocâmin, te sun orodij vala muáddi peeivi tobbeen kost talle lâi. ₇Te sun eeđâi máttááttâspárnáid: »Tääl mij vyelgip maassâd Juudean.» ₈Máttááttâspárnááh vuástálistii: »Rabbi, lah-uv tun oppeet monâmin toho? Eiduhân juudaliih irâttii keđgiđ tuu.» ₉Jeesus eeđâi sijjân: »Peeivist láá kyehtnubáloh tijmed. Tot, kote lii joođoost peiviv, ij vieggâs, tastko sun uáiná taan maailm čuovâ. ₁₀Mut tot, kote lii joođoost iho, vieggâsâd – ijhân sust alnees lah čuovâ.»

₁₁Taan eđâdijn Jeesus joođhij: »Ustevâm Lasarus uáđá, mut mun moonâm cuvnâđ suu.» ₁₂Máttááttâspárnááh ettii: »Hiärrá, jis sun uáđá, te sun puárrán.» ₁₃Jeesus uáivildij tom, et Lasarus lâi jáámmám, mut máttááttâspárnááh jurdii, et sun sárnu táválii uáđimist. ₁₄Tondiet Jeesus eeđâi njuolgist: »Lasarus lii jáámmám. ₁₅Tii tiet mun lam ilolâš, et jiem lamaš tobbeen: taat naanood tii osko. Tääl vuálgup suu kuuvl.» ₁₆Talle Tyemes, kii kočodui meiddei Didymosin, eeđâi eres máttááttâspárnáid: »Mannoop peri, mij jäämmip puohah oovtâst.»

₁₇Ko Jeesus poođij obišij kuuvl, sunjin muštâlui, et Lasarus lâi jo niäljád peeivi häävdist. ₁₈Betania lâi alda Jerusalem, suullân vitnubálov stadionmito keččin ₁₉já maaŋgah juudaliih lijjii puáttám lohđuttiđ Marta-kuáhtá Máárjáin sunnuu viiljâ jäämmim tiet.

₂₀Ko Martta kuulâi, et Jeesus lii puátimin, sun vuolgij Jeesus oovdeld. Máárjá paasij pááikán. ₂₁Martta eeđâi Jeesusân: »Hiärrá, jis tun liččih lamaš tääbbin, te muu viljâ ij liččii jáámmám. ₂₂Mut tääl-uv mun tiäđám, et Immeel addel tunjin puoh, maid tun sust áánuh.» ₂₃Jeesus eeđâi: »Tuu viljâ paijaan jämimist.» ₂₄Martta västidij: »Mun tiäđám kale, et sun paijaan majemuu peeivi, pajaspaijaanmist.» ₂₅Jeesus eeđâi: »Mun lam pajaspajanem já eellim. Kote osko munjin, uážžu eelliđ, veik jáámá-uv, ₂₆ige ohtâgin, kote iälá já osko munjin, kuássin jäämi. Oskoh-uv taam?» ₂₇»Oskom, Hiärrá», Martta västidij, »mun oskom, et tun lah Messias, Immeel Alge, kote koolgâi puáttiđ maailmân.»

₂₈Ko Martta lâi ettâm taam, te sun maacâi pááikán, kočoi uábis Máárjá já eeđâi sunjin kuávttáá koskân: »Máttáátteijee lii tääbbin já koččo tuu.» ₂₉Tom kulâdijnis Máárjá tállân čyežžilij já vuolgij Jeesus kuuvl. ₃₀Jeesus ij lam vala puáttám siijdân, pic sun lâi ain tobbeen, kost Martta lâi suin teivâdâm. ₃₁Ko juudaliih, kiäh lijjii táálust lohđutmin Máárjá, oinii taam fakkist čyežžilmin já vyelgimin olgos, te sij monnii maajeeld. Sij arvâlii, et Máárjá lâi monâmin häävdi kuuvl čiärruđ.

₃₂Ko Máárjá pyevtittij toho, kost Jeesus lâi, já ooinij Jeesus, te sun luáštádâđâi taan juolgij oovdân já eeđâi: »Hiärrá, jis liččih lamaš tääbbin, viljâm ij liččii jáámmám.» ₃₃Ko Jeesus ooinij čiärroo Máárjá já suin oovtâst puáttám juudalijd, kiäh sij-uv čierruu, te kieŋâlis lihâstâs kuoskâttij suu, ₃₄já sun koijâdij: »Kost suu hävdi lii?» »Hiärrá, puáđi keččâđ», sij västidii. ₃₅Jeesus čiärui. ₃₆Juudaliih ettii: »Keččâđ, mon räähis Lasarus sunjin lâi.» ₃₇Mut motomeh sist ettii: »Ko sun puovtij lekkâđ šohâdis almaa čoolmijd, te ij-uv sun meiddei liččii puáhtám estiđ Lasarus jäämmim?»

₃₈Jeesus lâi hirmástum, ko poođij häävdi kuuvl. Tot lâi kuovđâšm, mon oovdâst lâi keđgi. ₃₉»Väldiđ keeđgi meddâl», Jeesus kočoi, mut Martta, uámikkâs uábbi, eeđâi sunjin: »Hiärrá, sun haajijd jo. Sun lii tobbeen tääl niäljád peeivi.» ₄₀Jeesus västidij: »Jiem-uvks mun ettâm tunjin, et jis tun oskoh, te uážuh uáiniđ Immeel kirkkâdvuođâ?»

₄₁Keđgi valdui meddâl. Jeesus pajedij kejâstuvâs já eeđâi: »Eeči, mun kijtám tuu tast, et tun lah kuullâm muu. ₄₂Mun kale tiäđám, et tun kuulah muu ain, mut mun eeđâm täst muu pirrâ čuážžoo ulmui tiet, vâi sij oskoččii, et tun lah muu vuolgâttâm» ₄₃Ko Jeesus lâi ettâm taam, sun čuorvij korrâ jienáin: »Lasarus, puáđi olgos!» ₄₄Talle jáámmám almai poođij häävdist, jyelgih já kieđah lijjii čonâstuvváin kiessum já muáđuh pivâstâhlijnijn lovdum. Jeesus eeđâi: »Peštiđ suu čonâstuvâin já tipteđ suu moonnâđ.»

₄₅Maaŋgah tain juudalijn, kiäh lijjii puáttám Máárjá kuuvl já uáinám, maid Jeesus poorgâi, uskuu sunjin. ₄₆Mut motomeh sist monnii fariseusij savváid já muštâlii, maid Jeesus lâi porgâm.

₄₇Ollâpaapah já fariseuseh kuččuu rääđi čuákán já koijâdii tast: »Maid mij kolgâččijm porgâđ? Tot almai taha ennuv tobdostavoid. ₄₈Jis mij tiptep suu juátkiđ näävt, te forgâ sunjin oskoh puohah, já talle roomaliih puátih já väldih mist sehe taam pase saje já ubâ aalmug.» ₄₉Talle ohtâ sist, Kaifas, kote lâi ton ive ollâpappân, eeđâi: »Tij eppeđ ibbeerd maiden. ₅₀Eppeđ-uv tij fiettii, et jis ohtâ almai jáámá aalmug peeleest, te tot lii tijjân pyereeb ko tot et ubâ aalmug tuššá?» ₅₁Taat ij lam suu jieijâs juurdâ, pic ton ive ollâpappân sun ceelhij ennustâs: Jeesus koolgâi jäämmiđ aalmug peeleest, ₅₂ige tuše ton aalmug peeleest, mut tondiet vâi sun piäsá čokkiđ oohtân puoh Immeel párnáid, kiäh láá piäđgui.

₅₃Ton peeivi rääjist rääđi ulmen lâi surmiđ Jeesus. ₅₄Ton keežild Jeesus ij innig lihâdâm almolávt Juudeast pic sirdâšui aldeláá ävđinkuávlu. Tobbeen, Efraim-nommâsii kaavpugist sun talle orostâlâi máttááttâspárnáidiskuin.

₅₅Juudalij pessijâšjuhle lâi alda, já táálunkuávlust maaŋgah pottii jo ovdil pessijái Jerusalemân putásmittemmiänui várás. ₅₆Sij uccii Jeesus já sarnuu temppâlist koskânis: »Maid arvâlvetteđ? Poođiš-uv sun juhlijd ollágin.» ₅₇Ollâpaapah já fariseuseh lijjii adelâm miärádâs, et jis kiinii tiätá Jeesus orroomsaje, te tast kalga sijjân almottiđ, vâi sij puávtáččii väldiđ Jeesus kiddâ.