Luukas 1

₁Jo maaŋgâs láá porgâškuáttám já čokkim muštâlušâid tain aašijn, moh mii koskâvuođâst láá olášum, ₂ton mield ko toh láá mijjân muštâlâm, kiäh aalgâ rääjist lijjii jieijâs čolmijguin tuođâštmin já kiäh šoddii sääni palvâleijen. ₃Nuuvt lam tääl mun-uv, ko lijjim aalgâ rääjist váldám tárkká čielgâs, meridâm čäälliđ tärhis kuvvim tuu várás, kunnijâttum Teofilos, ₄nuuvt et tun tiäđáččih, mon lyetittettee tunjin adelum máttááttâs lii.

₅Herodes, Juudea kunâgâs, ääigi eelij pappâ Sakarias, kote kuulâi Abia paapâiuásádâhân. Suu kálgu Elisabet lâi sun-uv Aaron suuvâst. ₆Suoi láin kuohtuuh Immeel čoolmijn hurskáh já eelijn läitihánnáá puohâi Immeel pákkumij já njuolgâdusâi mield. ₇Mut párnááh sunnust iä lamaš, tastko Elisabet lâi šoohânmettum, já suoi láin kuohtuuh jo puáráseh. ₈Mottoom peeivi Sakarias lâi uásáduvvâs vuáru ääigi tooimâtmin paapâ pargoid Immeel oovdâst. ₉Palvâlustooimâid läävejii vuárbádiđ, já suu pargon šoodâi moonnâđ Hiärá temppâlân toimâttiđ sovčettemuhre. ₁₀Olmoošjuávkku lâi sovčettem ääigi ulguubeln já ruhâdâlâi. ₁₁Talle Sakariasân almostui Hiärá eŋgâl sovčettemálttár uálgispeln. ₁₂Eŋgâl uáinidijnis Sakarias suorgânij já pallai. ₁₃Mut eŋgâl sáárnui sunjin: »Ele poolâ, Sakarias. Tuu rukkoos lii kuullum, tuu kálgu Elisabet šoddâd tunjin alge já tun adelah sunjin nommân Juhánâs. ₁₄Ilo já áávu tevdih tuu, já maaŋgah ilodeh suu šoddâmist. ₁₅Sun šadda leđe stuorrâ Immeel almai. Viini já korrâ juhâmušâid sun ij juuvâ. Jo eenis kuáhtu rääjist sun lii tievâ Pase Jiegâst. ₁₆Sun jorgeet maaŋgâid Israel aalmugist vuod Hiärá, sii Immeel, piälán. ₁₇Sun mana Hiärá oovdeldjotten Elia vuoiŋâst já vyeimist, sun jorgeet eejij vááimuid párnái piälán já stivree tottâlmettumijd jurdâččiđ hurskái náál, näävt sun vaalmâšt aalmug Hiärá puáttim várás.» ₁₈Sakarias koijâdij eŋgâlist: »Mast mun tiäđám, et nuuvt kiävá? Munhân lam jo puáris, já meiddei muu kálgu lii elilâm.» ₁₉Eŋgâl västidij: »Mun lam Gabriel, ohtâ tain, kiäh čuážžuh Immeel oovdâst. Mun lam vuolgâttum sárnuđ tunjin já pyehtiđ taam ilosaavâ. ₂₀Mut tuu njälmi šadda kielâtteemmin, jiehke tun pyevti sárnuđ ovdilgo ton peeivi, kuás taat tábáhtuvá, tastko tun jieh oskom muu saanijd, moh ääigi mield šaddeh tuottân.» ₂₁Aalmug vuordij Sakarias, já puohah omâttellii tom, et sun ájánij temppâlist nuuvt kuhháá. ₂₂Ko sun talle poođij olgos, sun ij puáhtám sárnuđ sijjân, já tast sij iberdii, et sun lâi uáinám temppâlist uáináttâs. Sun tuše seevij sijjân já paasij kielâtteemmin. ₂₃Palvâlempeeivij nuuhâm maŋa Sakarias moonâi páikkásis, ₂₄já mottoom ääigi keččin suu kálgu Elisabet šoodâi párnáá vuástá. Vittâ mánuppaje Elisabet pisoi meddâl ulmui uáinusist. Sun smietâi: ₂₅»Taam lii Hiärrá munjin toohâm. Sun lii keččâm muu piälán ja piästá muu ulmui huánáášmist.»

₂₆Ko Elisabet lâi kuuđâd máánust, Immeel vuolgâttij eŋgâl Gabriel Nasaret kaavpugân Galilean ₂₇kuoskâmettum nieidâ kuuvl, kiän nommâ lâi Máárjá. Máárjá lâi kihlum Taavvid suuhân kullee Joovsepân. ₂₈Eŋgâl poođij suu kuuvl já eeđâi: »Tiervâ tunjin, Máárjá, tun, kote lah áármu uážžum! Hiärrá liävus tuin! ₂₉Taah säänih hiämáskittii Máárjá, já sun omâttâlâi, maid taggaar tiervâttâs puovtij merhâšiđ. ₃₀Mut eŋgâl joođhij: »Ele poolâ, Máárjá, Immeel lii suovvâm tunjin áármus. ₃₁Tun šoodah párnáá vuástá já šoddâdah alge, já tun adelah sunjin noomâ Jeesus. ₃₂Sun kalga leđe styeres, suu koččoh Alemuu Algen, já Hiärrá Immeel addel sunjin eejis Taavvid väldičokkámsaje. ₃₃Sun haaldâš Jáákkup suuvâ avalávt, suu kunâgâsvuođâst ij lah loppâ.» ₃₄Máárjá koijâdij eŋgâlist: »Maht tot lii máhđulâš? Munhân lam kuoskâmettum.» ₃₅Eŋgâl västidij: »Pase Jieggâ puátá tuu oolâ, Alemuu vyeimi luávdá tuu suoivuinis. Tondiet meiddei pärni, kote šadda, lii pase, já suu koččoh Immeel Algen. ₃₆Já tieđe taam: meiddei tuu hyelkki Elisabet kuáddá kuáhtustis alge, veik lii jo puáris. Sun lii jo kuuđâd máánust – sun, kiäm láá annaam šoohânmettumin! ₃₇Imelân ij mihheen lah máhđuttem.» ₃₈Talle Máárjá eeđâi: »Mun lam Hiärá palvâleijee. Tábáhtus munjin tego tun ettih.» Nuuvt eŋgâl vuolgij suu kulen.

₃₉Muádi peeivi keččin Máárjá vuolgij máátkán já tuámittij mottoom Juudea värikuávlu kaavpugân. ₄₀Sun moonâi Sakarias táálun já tiervâttij Elisabet. ₄₁Ko Elisabet kuulâi Máárjá tiervâttâs, čievčâstij páárnáš suu kuáhtust já sun tievâi Pase Jiegâst. ₄₂Sun čuárvui korrâ jienáin já eeđâi: »Sivnedum lah tun, nisonijn enâmustáá sivnedum, já sivnedum lii tuu kuáhtu heeđâlm! ₄₃Maht mun uážum tom kunnee, et muu Hiärá enni puátá muu kuuvl? ₄₄Siämmást ko tuu tiervâttâs poođij muu peljijd, páárnáš čievčâstij áávust muu kuáhtust. ₄₅Avdâgâs tun, kote uskuh! Hiärá tunjin adelem lopâdâs kalga tevduđ!»

₄₆Talle Máárjá eeđâi:

₅₆Máárjá lappui Elisabet kulen nyevt kulmâ mánuppaje já maacâi tastoo páikkásis.

₅₇Elisabet vyerdimäigi tievâi, já sun šoddâdij alge. ₅₈Ko naabureh já hyelhih kullii stuorrâ pyerivuođâst, mon Hiärrá lâi sunjin čáittám, sij ilodii oovtâst suin. ₅₉Káávcád peeivi ulmuuh čokkânii pirrâčuoppâđ párnáá. Iäráseh aiguu adeliđ sunjin eeji mield nommân Sakarias, ₆₀mut suu enni eeđâi: »Ij, suu nommân šadda Juhánâs.» ₆₁Iäráseh ettii: »Ijhân tuu suuvâst lah ohtâgin ton nommâsâš.» ₆₂Sij koijâdii sevimáin eejist, mon noomâ sun halijdij adeliđ páárnážân. ₆₃Sakarias táátui čäällimtavâlii já čaalij toos: »Suu nommâ lii Juhánâs.» Puohah hiämáskii. ₆₄Tast siämmást Sakarias kielâttesvuotâ lappui, já sun aaleestškuođij Immeel. ₆₅Ton kuávlust puohah polâškuottii, já täin tábáhtusâin ulmuuh sarnuu viijđáht ubâ Juudea värikuávlust. ₆₆Toh, kiäh tain kullii, teddii puoh mielâsis já ettii: »Miisun taan páárnážist šadda?» Tastko Hiärá kietâ lâi suu paajaabeln.

₆₇Sakarias, párnáá eeči, tievâi Pase Jiegâst já sáárnui proofeetlâš sanijguin:

₈₀Páárnáš šoodâi já kiävrui Jiegâst. Sun lâi ävđinenâmist ton peeivi räi, kuás sun koolgâi lavkkiđ Israel oovdân.