Luukas 2

₁Ton ääigi adelij kiäisár Augustus miärádâs, et ubâ väldikoddeest juáháš koolgâi čälittuđ olmoošlohon. ₂Taat čälittem lâi vuosmuš já tábáhtui, ko Kvirinius lâi Syyria koččomhälden. ₃Puohah monnii čälittiđ jiejâs viäruluvâttâlmân, juáháš jieijâs kaavpugân.

₄Nuuvt meiddei Joovsep vuolgij Galileast, Nasaret kaavpugist já moonâi čälittem várás Juudean, Taavvid kaavpugân, tastko sun kuulâi Taavvid suuhân. ₅Sun vuolgij tohon oovtâst myersseinis Máárjáin, kote lâi párnáá vuástá. ₆Sunnuu tobbeen orodijn poođij Máárjá äigi šoddâdiđ, ₇já sun šoddâdij alge, vuoččinšoddâm. Sun kiesâdij párnáá já piejâi suu seeimin, tastko sijjân ij lamaš saje kyessitáálust.

₈Ton kuávlust lijjii kuáđutteijeeh iho olgon iäluinis. ₉Fakkist sii oovdâst čuážui Hiärá eŋgâl, já Hiärá kirkkâdvuotâ pirâstitij sii. Kuáđutteijeeh pevhištuvvii, ₁₀mut eŋgâl eeđâi sijjân: »Elleđ poolâ! Mun almottâm tijjân ilosaavâ, stuorrâ ilo ubâ aalmugân. ₁₁Onne lii tijjân Taavvid kaavpugist šoddâm Pestee. Sun lii Kristus, Hiärrá. ₁₂Taat lii merkkân tijjân: tij kavnâvetteđ párnáá, kote viälláá seeimist kiesâlduvâi sist.» ₁₃Já siämmást lâi eŋgâl pirrâsist stuorrâ almalâš suátiviehâ, kote alestij Immeel näävt eeđân:

₁₅Ko eŋgâleh lijjii maccâm aalman, kuáđutteijeeh ettii kuáimásis: »Tääl Betlehemân! Tobbeen mij uáinip tom, mii lii tábáhtum, tom, mon Hiärrá mijjân almottij.» ₁₆Sij vuolgii huápust já kavnii Máárjá já Joovsep já párnáá, kote viällái seeimist. ₁₇Ko sij lijjii taam uáinám, te sij muštâlii puoh, mii sijjân lâi párnáást ettum. ₁₈Puohah, kiäh kullii kuáđutteijei saanijd, imâštellii. ₁₉Mut Máárjá čievâi váimusis puoh, mii lâi tábáhtum, já tuđhâdij tom.

₂₀Kuáđutteijeeh maccii já kijttii já alestii Immeel tast, maid sij lijjii kuullâm já uáinám. Puoh lâi eidu tego sijjân lâi ettum.

₂₁Ko lâi puáttám káávcád peivi já páárnáá kolgii pirrâčuoppâđ, te sun finnij noomâ Jeesus, mon eŋgâl lâi almottâm ovdilgo sun šohânij eenis kuáhtust. ₂₂Ja ko poođij peivi, kuás sij Mooses laavâ mield kolgii putásmiđ, te sij monnii Jerusalemân, vâi sij puohtii tuálvuđ párnáá Hiärá oovdân, ₂₃tastko Hiärá laavâst iättoo näävt: »Jyehi algepáárnáš, kote vuosmustáá puátá eenis kuáhtust, kalga pasottuđ Hiärán.» ₂₄Siämmást sij kolgii pyehtiđ Hiärá laavâst asâttum uhre, »kyehti meccituvváá teikâ tuvváá uđâgáá».

₂₅Jerusalemist eelij hurskes já immeelpalolâš almai, kiän nommâ lâi Simeon. Sun vuordij Israelân lopedum lohđuttâs, já Pase Jieggâ lâi suu alne. ₂₆Pase Jieggâ lâi sunjin almottâm, et jäämmim ij kuáhtáá suu ovdilgo sun lii uáinám tom, kiäm Hiärrá lii vuoidâm. ₂₇Jiegâ jođettâsâst sun poođij temppâlân, já ko Jeesus vaanhimkyevtis puovttijn párnáá toho vâi suoi puávtáččáin porgâđ tom, maid laavâ mield koolgâi porgâđ, ₂₈sun vaaldij párnáá askasis, alestij Immeel já eeđâi:

₃₃Jeesus eeči já enni imâštâláin tom, maid sust ettii. ₃₄Simeon sivnedij sii já eeđâi Máárján, párnáá iänán: »Taat páárnáš lii pieijum keččâlussân: maaŋgah israelliih jurâleh já maaŋgah pajaneh. Sun lii pieijum merkkân, mii ij tubdâstuu, ₃₅já tuu jieijâd vááimu-uv čoođâ miekki kalga moonnâđ. Näävt puátih uáinusân maaŋgâi vááimui jurduuh.»

₃₆Tobbeen lâi meiddei nissoonproofeet Hanna, Asser hiäimun kullee Penuel nieidâ. Sun lâi jo hirmâd puáris. Ko sun lâi kuoskâmettum nieidân naaijâm, sun lâi iällám kálláinis čiččâm ihheed, ₃₇mut tääl sun lâi lamaš leskân jo kähcilovnelji ihheed. Sun ij vuálgám temppâlist kuussân, pic palvâlij Immeel iijâi peeivij vástudmáin já ruhâdâlmáin. ₃₈Eidu talle sun poođij ton sajan, já sun alestij Immeel já sáárnui párnáást puohháid, kiäh vuordii Jerusalem lonástâs.

₃₉Ko sij lijjii porgâm puoh, maid Hiärá laahâ vaađâi, te sij maccii Galilean kuátukaavpugsis Nasaretin. ₄₀Páárnáš šoodâi, kiävrui já tievâi vijsesvuođâst, já Immeel ármu čuávui suu.

₄₁Jeesus vaanhimeh moonáin jyehi ive Jerusalemân pessijâšjuhlijd. ₄₂Ko Jeesus lâi kyehtnubálovihásâš, vaanhimkyevtis juuđijn suin vuod juhle ääigi tohon, tego ulmuuh läävejii. ₄₃Ko juhlepeeivih lijjii nuuhâm, te suoi vuolgijn vuod pááikán, mut alge paasij vaanhimij huámmášhánnáá Jerusalemân. ₄₄Taah jurdijn, et sun lâi mätkisiärváduvvâst já juuđijn peeivi määđhi ovdilgo usâstâlškuođijn suu huolhij já uápisulmui juávhust. ₄₅Ko suoi iävá kavnâm suu, te suoi maccáin Jerusalemân já ussáin suu ain.

₄₆Kuulmâ peeivi keččin vaanhimkyevtis kavnáin suu temppâlist. Sun čokkái máttáátteijei juávhust, kuldâlij sii já koijâdâlâi sist. ₄₇Puohah, kiäh kullii maid sun sáárnui, imâštellii suu ibárdâs ja suu adelem vástádâsâid. ₄₈Ko vaanhimkyevtis oinijn Jeesus, te suoi hiämáskáin čuuvtij, já suu enni eeđâi: »Algaam, mondiet tun porgih munnui taam? Muoi ejijnâd láán uuccâm tuu, já munnust lâi jo huolâ.» ₄₉Jeesus västidij sunnui: »Mondiet tuoi muu ucâvettee? Eppee-uv tuoi tiättám, et mun koolgâm leđe Iäččán kulen? ₅₀Mut suoi iävá iberdâm, maid sun täin uáivildij.

₅₁Jeesus vuolgij päikkimáátkán sunnuin, poođij Nasaretân já lâi sunnui kulâjâš. Puoh, mii lâi tábáhtum, suu enni čievâi váimusis. ₅₂Jeesus rávásmij já viijsoi; Immeel já ulmuuh lijjii mielâstum sunjin.