Luukas 17

₁Jeesus eeđâi máttááttâspárnáidis:

»Viettâlâsah ferttejeh puáttiđ, toh láá karvemettumeh, mut vuoi tom, kiän peht toh puátih! ₂Pyereeb ličij sunjin, et sun leggistuuččij meerân millokeđgi čiäpáttist, ko et sun joođeet jurrâmâšân oovtâgin täin ucemuin. ₃Váruttiđ!

»Jis viljâd taha puástud, nuttâl suu, já jis sun talle káátá, adde sunjin addâgâs. ₄Veikkâ sun čiččâm kerdid peeivist rikoččij tuu vuástá já čiččâm kerdid puáđáččij ettâđ tunjin: ’Mun kaađâm’, adde sunjin addâgâs

₅Apostoleh ettii Hiärán: »Adde mijjân nanosub osko!»

₆Hiärrá eeđâi:

»Jis tist ličij osko siinapsiemmân verdgin, tij puávtáččijd ettâđ taan silkkemuorân: ’Luptân ruottâsijdâdguin enâmist já ištâd jieijâd meerân’, já tot tottâličij tii.

₇»Jis tist lii palvâleijee kendimpargoin teikâ kuáđutmin, te eppeđhân tij eeđâ, ko sun máccá pááikán: ’Čokkáán piävdán, uážuh tállân purrâmuš.’ ₈Ij, tij etâvetteđ: ’Räähti munjin purrâmâš, puáhánjist pihtâsijdâd já palvâl muu ton ääigi ko mun purâdâm já juuvâm. Talle tungis uážuh puurrâđ já juuhâđ.’ ₉Ij palvâleijee finnii tast kijttos, et sun parga, maid sun kalga porgâđ. ₁₀Nuuvtpa tij-uv, ko tij leppeđ porgâm puoh, maid tij kolgâvetteđ-uv porgâđ, ettâđ: ’Mij lep árvuttes palvâleijeeh. Mij lep porgâm tuše tom, maid lâim kenigâttum porgâđ.’»

₁₁Jođedijnis Jerusalem kulij Jeesus juuđij Samaria já Galilea räjikuávlust. ₁₂Ko sun lâi puátimin mottoom siijdân, suu oovdeld pottii love spiitaallâš almajid. Sij orostii olgoláá ₁₃já čyervejii: »Jeesus, máttáátteijee, äärmit mii!» ₁₄Almaid uáinidijn Jeesus eeđâi sijjân: »Moonnâđ čäittiđ jieččâd pappáid.» Monâdijnis sij putásmii. ₁₅Ko mottoom sist lâi huámášâm puárránmis, sun jorgettij já alestij Immeel ollâ jienáin, ₁₆leggistâđâi enâmân Jeesus juolgij oovdân já kiijtij suu. Taat almai lâi samarialâš. ₁₇Jeesus koijâdij: »Iä-uv puoh loves putásmâmgin? Kost toh oovce eres almajid láá? ₁₈Taat vieresolmooš-uvgs sist lâi áinoo, kote maacâi alestiđ Immeel?» ₁₉Já sun eeđâi almai: »Paijaan já moonâ. Oskood lii tuu piäluštâm.»

₂₀Ko fariseuseh koijâdii Jeesusist, kuás Immeel väldikodde puátá, sun västidij: »Ij Immeel väldikodde puáđi toin naalijn, et ton puáttim puáhtá čuávvuđ. ₂₁Ige pyevti ettâđ: ’Tot lii tääbbin’, teikâ: ’Tot lii tyebbin.’ Keččâđ: Immeel väldikodde lii tii koskâvuođâst.»

₂₂Máttááttâspárnáidis sun eeđâi:

»Puátá äigi, kuás tij tuáivuvetteđ, et uáináččijd veik oovtâ Ulmuu Alge peeivi mut tij eppeđ uážu uáiniđ. ₂₃Tijjân iättoo talle: ’Sun lii tyebbin’, já ’Sun lii tääbbin’, mut elleđ vyelgi kuussân, elleđ kaačâ maajeeld. ₂₄Tastko nuuvtko aldâkkâs šliäđgáá já čuává alme oovtâ roobdâst nube roobdân, nuuvt kalga Ulmuu Alge leđe almostumes peeivi. ₂₅Mut tađe ovdil sun ferttee killáđ ennuv, já taat suhâpuolvâ hilgo suu.

₂₆»Nuuvtko lâi Nooa peeivij ääigi, nuuvt šadda leđe Ulmuu Alge peeivij-uv. ₂₇Ulmuuh purrii já juhhii, najâdii já naittii nieidâidis ain ton peeivi räi ko Nooa moonâi aarkân, já tulve poođij já tuššâdij sii puoh. ₂₈Šadda tegu Loot peeivij. Ulmuuh purrii já juhhii, ostii já vuobdii, ištâdii já huksejii. ₂₉Mut ton peeivi ko Loot vuolgij Sodomast, kočâdii almeest tullâčuormâseh já tullâkeeđgih, moh tuššâdii sii puoh.

₃₀Siämmáánáál kiävá ton peeivi ko Ulmuu Alge almostuvá. ₃₁Jis tom peeivi kiinii lii káátu alne já suu tävireh láá siste táálust, sun ij koolgâ moonnâđ vuálus viežžâđ taid já jis kiinii lii piäldust, sun ij koolgâ maccâđ pááikán. ₃₂Mušteđ Loot káálgu! ₃₃Kote viggá turviđ elimis, lääppit tom, mut kote tom lääppit, šadda piäluštiđ tom olssis. ₃₄Mun eeđâm tijjân: Ton iijâ lává kyevtis siämmáá seeŋgâst: nubbe váldoo, nubbe kuáđđoo. ₃₅Nissoonkyevtis lává oovtâst millomin: nubbe váldoo, nubbe kuáđđoo. [ ₃₆Almaakyevtis lává piäldust: nubbe váldoo, nubbe kuáđđoo.]» ₃₇»Kost, Hiärrá?» koijâdii máttááttâspárnááh. Sun eeđâi: »Kost lii haškâ, toho čokkâneh káránâskuáskimeh.»