Leskâ já puástumielâlâš tuámmár
1Jeesus muštâlij viärdádâs máttááttâspárnáidis vâi sij opâččii, et ovttuu kalga ruhâdâllâđ, kuássin vuállánhánnáá. 2»Mottoom kaavpugist lâi tuámmár, kote ij poollâm Imelist ige perustâm ulmuin. 3Siämmáá kaavpugist lâi meid leskâkálgu, kote koskâttuvâi poođij tuámmár kuuvl pivdeđ: ’Čuávdi jo muu ääši, tuomii muu rijdopele.’ 4Kuhes ááigán tuámmár ij miettâm. Talle sun kuittâg jurdâččij: ’Kukken tast, et polâččim Imelist teikâ perustiččim ulmuin, 5mut taan leeskâst lii munjin väivi. Mun išedâm suu uážžuđ vuoigâdvuođâ, mudoi sun ovdeláá tâi maŋeláá ruákká must čoolmijd uáivist.’»
6Hiärrá eeđâi: »Huámášiđ: näävt jurdâččij puástumielâlâš tuámmár. 7Amahân talle Immeel hááhá vuoigâdvuođâ jieijâs valjim ulmuid, kiäh iijâi já peeivij čuárvuh suu išán. Sun-uvks ájáttâlâččij išijnis? 8Mun eeđâm tijjân: sun hááhá sijjân vuoigâdvuođâ ájáttâlhánnáá. Mut ko Ulmuu Alge puátá, kávná-uv sun osko eennâm alne?»
Fariseus já publikaan
9Motomáid, kiäh lijjii vissáh jieijâs vanhurskesvuođâst já ucášii iärásijd, Jeesus muštâlij sijjân taan mainâs:
10»Almaakyevtis moonáin temppâlân ruhâdâllâđ. Nubbe lâi fariseus, nubbe publikaan. 11Fariseus tiälláádâđâi sajasis čuážžuđ já ruhâdâlâi jiečânis: ’Immeel, mun kiijtám tuu, et mun jiem lah taggaar ko eres ulmuuh, riäváreh, tájutteijeeh, huárásteijeeh tâi veikkâba tuot publikaan. 12Mun vástudâm kuohtii ohhoost já máávsám lovádâsâid puoh aašijn, tast-uv maid mun uástám.’ 13Publikaan čuážui tabeláá. Sun ij tuostâm ubâ kejâstuvâskin pajediđ alme kulij pic čooskij raddasis já eeđâi: ’Immeel, mun piivdám, et liččih munjin suddogâsân ármugâs!’
14»Mun eeđâm tijjân: sun vuolgij páikkásis vanhurskesin, tuot nubbe ij. Juáháš, kote jieijâs aaleed, vyeleduvvoo, mut kote jieijâs vyeleed, tot aleduvvoo.»
Jeesus váldá vuástá párnáid
15Jeesus kuuvl puohtii meid uccâ párnáid, vâi sun kuoskâččij sijjân. Taam uáinidijn máttááttâspárnááh laittii pyehteid, 16mut Jeesus kočoi párnáid jieijâs kuuvl já eeđâi: »Tipteđ párnáid puáttiđ muu kuuvl, elleđ eesti sii. Sii sullâsij lii Immeel väldikodde 17Tuođâi: kote ij vääldi Immeel väldikode vuástá tego páárnáš, sun ij toho peesâ.»
Jeesus já riges almai
18Mottoom ollâ virgeest leijee almai koijâdij Jeesusist: »Maid mun koolgâm porgâđ, pyeri máttáátteijee, vâi mun arbiiččim nuvâhánnáá eellim?» 19Jeesus västidij sunjin: »Mane tun nabdah muu pyerrin? Tuše Immeel lii pyeri, ij kihheen eres. 20Pákkumijd tun tiäđáh: ele toovâ näimirikkoos, ele kode, ele suáláád, ele tuođâšt puástud, kunnijât iäččád já iännád.» 21»Puoh täid mun lam nuávdittâm nuorâvuođâ rääjist», västidij almai. 22Taam kulâdijn Jeesus eeđâi: »Ohtâ tust lii vala porgâhánnáá. Vyebdi puoh, mii tust lii, já jyeve ruuđâid kievhijd, te tust lii aarni oolmijn. Puáđi talle já čuávu muu.» 23Ko almai kuulâi taam, sun šoodâi murâšlâžžân, tastko sun lâi uáli riges.
24Tom uáinidijn Jeesus eeđâi: »Mon vaigâd liigin tain, kiäh ennuv omâsteh, peessâđ Immeel väldikoodán! 25Älkkeb lii kamelist moonnâđ äimičalme čoođâ, ko riggást peessâđ Immeel väldikoodán.» 26»Kii talle puáhtá piäluštuđ?» koijâdii kuldâleijeeh. 27Jeesus västidij: »Mii lii ulmui máhđuttem, tot lii Imelân máhđulâš.»
Máttááttâspárnái puátteš pälkki
28»Naba mij?» koijâdij talle Piättár. »Mij lep luoppâm puohâst, mii mist lâi já čuávvum tuu.» 29Jeesus eeđâi sijjân: »Tuođâi: kote Immeel väldikode keežild lii luoppâm jieijâs pääihist, káálgust, viiljâin, vaanhimijn tâi párnáin, 30sun uážžu jo taam ääigist maaŋgâkiärdásâžžân maasâd, já puáttee maailmist nuvâhánnáá eellim.»
Jeesus sárnu vala ohtii jäämmimstis
31Jeesus kočoi kyehtnubáloh máttááttâspärnis jieijâs kuuvl já eeđâi šijjân: »Mij moonnâp tääl Jerusalemân. Tobbeen šadda tuottân tot puoh, maid profeteh láá Ulmuu Algeest čáállám. 32Sun adeluvvoo pähinij kieđáid, ulmuuh pilkkedeh já hepâšuteh suu já čolgeh suu oolâ, 33já ruáiskuh suu, jeđe koddeh. Mut kuálmád peeivi sun paijaan jämimist.» 34Máttááttâspárnááh iä iberdâm Jeesus saanijn maiden. Äšši pisoi sist syeligâsâst, iäge sij addim, maid Jeesus uáivildij.
Jeesus pyereed čalmettes kerjideijee
35Ko Jeesus aldanškuođij Jeriko, čokkái luoddâpiällást čalmettes almai kerjidmin. 36Kulâdijnis, et luodâ mield juttii ennuv ulmuuh, koijâdij almai, mii lii tábáhtuumin. 37Sunjin muštâlii, et Jeesus Nasaretlâš lâi monâmin tast lappâd. 38Talle sun čuorvij: »Jeesus, Taavvid Alge, äärmit muu!» 39Ovdemustáá jotteeh kuččuu suu leđe joskâ, mut sun tuše čuorvij vala-uv korrâsubbooht: »Taavvid Alge, äärmit muu!» 40Jeesus orostij já kočoi laiđiđ suu jieijâs kuuvl. Almai poođij, já Jeesus koijâdij sust: 41»Maid tun halijdah et mun poorgâm tunjin?» Almai västidij: »Hiärrá, adde munjin uáinum.» 42Talle Jeesus eeđâi sunjin: »Tun uážuh uáinud. Tuu osko lii pyeredâm tuu.» 43Siämmást almai uážui uáinus já vuolgij čuávvuđ Jeesus aaleestmáin Immeel. Já puohah, kiäh taam oinii, kijttii já alestii Immeel.
