Luukas 19

₁Jeesus poođij Jerikon já juuđij kaavpug čoođâ. ₂Tobbeen aasâi almai, kiän nommâ lâi Sakkeus. Sun lâi publikaanij hovdâ já čuuvtij riges. ₃Sun halijdij uáiniđ, kii almaid Jeesus lâi, mut ko sun lâi ucce šadostis, sun ij olláám kuovlâđ olmoošjuávhu tyehin. ₄Nuuvtpa sun kaačâi mottoom máđháá ovdâskulij já kuárŋui mecciviigunmuorân, vâi sun uáináččij Jeesus, kote lâi puátimin ton luodâ mield. ₅Mut ko Jeesus poođij ton sajan, sun keejâi pajas já eeđâi: »Sakkeus, puáđi huápust vuálus. Onne mun koolgâm leđe kyessin tuu pääihist.»

₆Sakkeus poođij jotelávt vuálus já vaaldij iloin Jeesus kyessinis. ₇Ko ulmuuh oinii taam, sij ettii nimmurušmáin: »Suddogâs almaa táálu sun vaaldij kyessisajenis.» ₈Mut Sakkeus eeđâi Hiärán puohâi kulâdijn: »Hiärrá, näävt mun poorgâm: pele jieččân omâduvvâst mun adelâm kievhijd, já kiäst lam liijkás ennuv nistám, toos mun máávsám neeljikiärdásávt maassâd.» ₉Ko Jeesus tom kuulâi, sun eeđâi taas čuujootmáin: »Onne lii piäluštâs puáttám taan perruu uássin. Liihân sun-uv Áábráhâm alge. ₁₀Eidu tom, mii lii lappum, Ulmuu Alge lii puáttám uuccâđ já piäluštiđ.»

₁₁Toid, kiäh lijjii taam kulâmin, Jeesus muštâlij vala viärdádâs, tastko sun lâi jo alda Jerusalem já maaŋgah nobdii, et Immeel väldikode almostuvá aaibâs forgâ.

₁₂Sun eeđâi:

»Mottoom ollâárvusâš almai vuolgij máátkán kukkenorroo enâmân, vâi sun uážuččij tobbeen nomâttâs kunâgâssân, jeđe sun macâččij pááikán. ₁₃Sun kočoi jieijâs kuuvl love palvâleijes, adelij jieškiäs-uv kolleruuđâ já eeđâi: ’Kevttiđ täid pyeremuu vyevi mield tassaažân ko mun maacâm.’ ₁₄Suu eennâmalmaah kuittâg vajedii suu já vuolgâttii suu maŋŋaal sänituálvoid muštâliđ: ’Mij ep haalijd tiem almaa jieččân kunâgâssân.’

₁₅»Almai maacâi jieijâs enâmân kunâgâssân. Ko sun lâi puáttám, sun kočoi palvâleijeid jieijâs kuuvl, vâi kulâččij, mon ennuv jieškote-uv lii ruđâidisguin tiänám. ₁₆Vuosmuš poođij suu oovdân já eeđâi: ’Hiärrá, tuu adelem kolleruttâ lii puáhtám love kolleruttâd lase.’ ₁₇Kunâgâs eeđâi sunjin: ’Pyeri! Tun lah šiev palvâleijee. Ko aaibâs ucceest-uv lah lamaš oskolâš, uážuh jieijâd haldâšem vuálásâžžân love kaavpugid.’ ₁₈Te poođij nubbe já eeđâi: ’Hiärrá, tuu adelem kolleruttâ lii puáhtám vittâ kolleruuđâ.’ ₁₉Sunjin kunâgâs eeđâi: ’Tuu mun piejâm haldâšiđ viiđâ kaavpug.’

₂₀»Mut ko čuávuvâš palvâleijee poođij, te sun eeđâi: ’Hiärrá, taa lii tuu adelem kolleruttâ. Lam siäluttâm tom liijne siste. ₂₁Mun poollim tust, tastko lah ármuttes almai. Tun vááldáh, maid jieh lah vuorkkim, já čuopah, maid jieh lah kalvam.’ ₂₂Kunâgâs eeđâi sunjin: ’Jieijâd saanij mield mun tuu tuommiim. Tun kiälbuttes palvâleijee! Tun kustoo tiettih, et mun lam ármuttes almai, et mun vááldám, maid jiem lah vuorkkim, já čuopâm, maid jiem lah kalvam. ₂₃Mondiet tun talle jieh tuálvum muu ruuđâid paaŋkin, nuuvt et mun liččim macâdijn puáhtám pajediđ tom riäntuiguin?’

₂₄»Kunâgâs eeđâi suu paaldâst čuážžoo almaid: ’Väldiđ sust ruuđâ meddâl já adeliđ tom toos, kiäst láá love kolleruttâd.’ ₂₅Sij ettii: ’Hiärrá, sust láá jo love kolleruttâd.’ ₂₆Mut sun joođhij: ’Juáhážân, kiäst lii, adeluvvoo, mut kiäst ij lah, tast váldoo meddâl tot-uv, mii sust lii. ₂₇Mut tuoh muu vajaliih, kiäh iä halijdâm muu kunâgâssân – pyehtiđ sii teehi já miästáđ taid muu oovdâst.’

₂₈Ko Jeesus lâi ettâm taam, sun vuolgij iärrásij oovdeld Jerusalemân mannee luodâ pajas. ₂₉Ko sun lâi puátimin Oljoväärrin kočodum vääri oolâ já lâi jo alda Betfage já Betania, sun vuolgâttij oovdeld máttááttâspárnáákuáhtá ₃₀já eeđâi: »Mannee tyebbin uáinojeijee siijdân. Ko tij puátivettee tohon, tuoi uáinivettee kiddâ čoonnum aasivársá, mon seelgist kihheen ij lah vala čokkám. Väldee tom tast já pyehtee teehin. ₃₁Jis kiinii koijâd, mondiet tuoi väldivettee tom, västidee, et Hiärrá taarbâš tom.»

₃₂Almaakyevtis vuolgijn já aiccáin, et puoh lâi tego Jeesus lâi sunnui ettâm. ₃₃Ko suoi láin pestimin vársá, ton omâsteijeeh koijâdii: »Mondiet tuoi tuálvuvettee vársá?» ₃₄Suoi västidáin: »Hiärrá taarbâš tom.» ₃₅Suoi puovttijn vársá Jeesusân, lebbijn pihtâsijdis ton siälgán já išedáin Jeesus ton siälgán. ₃₆Ko sun talle raccastij, máttááttâspárnááh lebbejii pihtâsijdis luodâ oolâ.

₃₇Ko Jeesus aldanij tom saje, kogo luoddâ luáštádât Oljovääri vielti vuálus, ubâ máttááttâspárnái juávkku aaleestškuođij stuorrâ jienân Immeel puoh tain vyeimitavoin, maid sij lijjii uáinám. ₃₈Sij čuorvuu:

₃₉Motomeh fariseuseh ettii kaskoo olmoošjuávhu Jeesusân: »Máttáátteijee: kieldi máttááttâspárnáidâd!» ₄₀Mut Jeesus västidij: »Mun eeđâm tijjân: jis sij liččii joskâ, te keeđgih čuárvuččii.»

₄₁Ko Jeesus poođij aldeláá já ooinij kaavpug, sun čiäruškuođij tom keežild ₄₂já eeđâi: »Jispa tun-uv onnáá peeivi iberdiččih, kost torvod lii! Mut tääl tot lii tuu čoolmijn čiehhum. ₄₃Vala tun šoodah uáiniđ ääigi, kuás vajaliih huksejeh pirrâsâd viemârdâs, pirâstiteh tuu já volliitteh tuu jyehi kuávlust. ₄₄Sij mottejeh tuu já ässeidâd eennâm táásán. Tunjin ij kuođđuu keđgi keeđgi oolâ, tastko tun jieh fiettim uuccâmááigád.»

₄₅Jeesus moonâi temppâlân já vuájálitškuođij olgos taid, kiäh tobbeen kavpâšii. ₄₆Sun eeđâi sijjân: »Lii čallum: ’Muu viste kalga leđe rukkoos viste.’ Mut tij leppeđ ráhtám tast riävárij piäju.»

₄₇Talle sun máttááttij jyehi peeivi temppâlist. Ollâpaapah, laavâmáttáátteijeeh já aalmug eres njunošalmaah smiettii, maht sij pesâččii sust. ₄₈Sij iä kuittâg keksim, maid porgâđ, tastko aalmug lâi ovttuu Jeesus pirrâ kuldâlmin suu.