Matteus 14

₁Toi aaigij niäljádâshaldâšeijee Herodes kuulâi Jeesusist. ₂Sun eeđâi räđialmaidis: »Tot lii Juhánâs Kästee. Sun lii pajaspajanâm, tondiet sust vaikutteh tuoh vyeimih.»

₃Herodes uáináh lâi váldám Juhánâs kiddâ, pieijâm suu avlijd já leggistâm faŋgâlân. Taam sun lâi porgâm viljâs Filippos káálgu Herodias tiet, ₄tastko Juhánâs lâi ettâm sunjin: »Tust ij lah lope eelliđ suin.» ₅Herodes lâi halijdiđ koddeđ Juhánâs mut poolâi almugist, mii oonij Juhánâs profetin.

₆Talle Herodes vietij šoddâmpeivijdis, já Herodias nieidâ tánssái kuossijd. Herodes lijkkui nieidân nuuvt, ₇et taat vuárnáin vuárnumáin lopedij adeliđ sunjin maid ihenis sun ánuččij. ₈Eenis ilâttâsâst nieidâ eeđâi: »Adde munjin tääl tállân taldrik alne Juhánâs Kästee uáivi.» ₉Kunâgâs šoodâi murâšlâžžân, mut ko sun lâi kuosijdis kulâdijn vuárnum vuárná, sun kočoi tevdiđ áánnum. ₁₀Sun vuolgâttij faŋgâlân sääni já kočoi miästáđ Juhánâs. ₁₁Taan uáivi puohtui taldrik alne já adelui nieidân, já nieidâ tuálvui tom iännásis. ₁₂Juhánâs máttááttâspárnááh pottii talle viežžâđ rummâš já hävdidii tom. Talle sij monnii almottiđ Jeesusân, mii lâi tábáhtum.

₁₃Ko Jeesus täst kuulâi, sun vuolgij skijppáin ävđin sajan ohtuuvuotân. Mut saahâ levânij, já kaavpugijn vuolgii ennuv ulmuuh eennâm mield suu maajeeld. ₁₄Ko sun skiijpâst puáđidijnis ooinij puoh täid ulmuid, te sun šallišij sii já sun pyeredij puoh pyecceid.

₁₅Eehid peln máttááttâspárnááh monnii suu kuuvl já ettii: »Taat lii ävđin saje, já äigi lii jo kuullâm. Vuolgât ulmuid meddâl, vâi sij monâččii uástiđ olssis purrâmâš.» ₁₆Mut Jeesus eeđâi sijjân: »Iä sij taarbâš kuussân moonnâđ. Adeliđ tij sijjân purrâmâš.» ₁₇»Ij mist lah mieldi muide ko vittâ leeibi já kyehti kyele», sij västidii. ₁₈»Pyehtiđ taid teehin munjin», eeđâi Jeesus. ₁₉Sun kočoi olmoošjuávhu čokániđ kiädán. Te sun vaaldij taid vittâ leeibi já kyehti kyele, keejâi pajas olmijd já ceelhij kijttosrukkoos. Sun tojâlij leeibijd já adelij pittáid máttááttâspárnáid, já máttááttâspárnááh juohhii taid ulmuid. ₂₀Puohah purrii já kalanii, já pasâttâsâid sij nurrii kyehtnubáloh veddilitted tievâ. ₂₁Puurâdmin lijjii suullân vittâtuhháát almajid já lasseen nisoneh já párnááh.

₂₂Tállân tastmaŋa Jeesus kočoi máttááttâspárnáid lavkkiđ skiijpân já moonnâđ tovnbel rido oovdeld, tassaaš ko sun vuolgâttičij ulmuid meddâl. ₂₃Ko ulmuuh lijjii vuálgám, te sun pajanij vääri oolâ, vâi sun piäsá ruhâdâllâđ ohtuu. Ko eehid šoodâi, te sun lâi tobbeen ohtuu. ₂₄Skiijpâ lâi jo viehâ kukken riddoost, já tot rojoi páárui kooskâst vyestipiegân.

₂₅Niäljád ijjâkocceemvuáru ääigi Jeesus poođij máttááttâspárnái kulij čääsi alne vääzin. ₂₆Ko sij oinii suu väzzimin jäävri páárui alne, te sij suorgânii já čuorvuu paaloost, tastko sij jurdii, et sij uáinih kome. ₂₇Mut siämmást Jeesus jo sáárnui sijjân: »Orroođ rávhulâžžân, mun taa lam. Elleđ poolâ.» ₂₈Talle Piättár eeđâi sunjin: »Hiärrá, jis tot lah tun, te kočo muu puáttiđ tuu kuuvl čääsi alne.» ₂₉»Puáđi!», Jeesus eeđâi. Piättár lavkkij skiijpâst já vaazij čääsi alne Jeesus kuuvl. ₃₀Mut ko sun ooinij, maht piegâi korrâsávt, te sun palaskij já vuájuškuođij. »Hiärrá, piälušt muu!», sun čuorvij. ₃₁Jeesus keigij tállân kieđâs, toppij sust kiddâ já eeđâi: »Ucceba lii oskod! Mondiet tun eeppidškuottih?»

₃₂Ko suoi láin lavkkim skiijpân, te kolkkij. ₃₃Já puohah, kiäh skiijpâst lijjii, luáštádâttii idduidis oolâ suu oovdân já ettii: »Tun lah tuođâi Immeel Alge.»

₃₄Ko sij lijjii peessâm jäävri rasta, sij läddejii Gennesaretist. ₃₅Ko ton kuávlu ulmuuh huámášii, kii lâi puáttám, te sij vuolgâttii sääni miätá ton kuávlu, já nuuvt puoh pyecceeh puáhtojii Jeesus kuuvl. ₃₆Sij tattuu, et sij uážuččii tuše kuoskâttiđ suu kiessâmmááccuh tiäpán, já puohah, kiäh toos kuoskâttii, puáránii.