Matteus 15

₁Talle Jeesus kuuvl pottii Jerusalemist fariseuseh já laavâmáttáátteijeeh. ₂»Mondiet tuu máttááttâspárnááh rikkoh eejij ärbinjuolgâdusâid?», sij koijâdii. »Sijhân iä poosâ kieđâidis ovdilgo puurâdškyeteh.»

₃Jeesus västidij sijjân: »Mondiet tij jiejah rikkovetteđ Immeel pákkum jieijâd ärbinjuolgâdusâiguin? ₄Immeel lii ettâm: ’Kunnijât iäččád já iännád’ já ’Kote karrood eejis teikâ eenis, kalga ráŋgáštuđ jämimáin.’ ₅Mut tij máttátvetteđ, et jis kiinii iätá iäččásis teikâ iännásis: ’Tom, maid tun liččih kolgâm must uážžuđ, mun lam lopedâm uhrelähjin’, ₆te sun ij innig taarbâš kunnijâttiđ eejis já eenis. Näävt tij leppeđ toohâm kuárusin Immeel sääni jieijâd ärbinjuolgâdusâiguin. ₇Tij tohâluddeeh! Olmânáál Jesaja tist ennustij ko sun eeđâi:

₁₀Jeesus kočoi olmoošjuávhu jieijâs kuuvl já eeđâi: »Kuullâđ já iberdiđ. ₁₁Ij ulmuu nyeskid tot, mii mana njäälmist siisâ. Tot ulmuu nyeskid, mii puátá njäälmist olgos.»

₁₂Talle máttááttâspárnááh pottii suu kuuvl já ettii: »Tiäđáh-uv, et fariseuseh suttii tuu oolâ, ko tun sarnuh tienuuvt?» ₁₃Sun västidij: »Jyehi šaddo, mon muu almalâš Eeči ij lah ištâdâm, kiškoo ruottâsijdiskuin meddâl. ₁₄Elleđ peerust sist, sij láá čalmettemeh já läiđejeh nuubijd čalmettemijd. Já ko čalmettem läiđee nube čalmettem, te kuohtuuh koččâv roogán.»

₁₅Piättár eeđâi sunjin: »Tun sarnuh viärdádâsâiguin. Čielgii mijjân, maid tun uáivildih.» ₁₆Jeesus västidij: »Leppeđ-uv tij-uv vala nuuvt ibbeerdmettumeh? ₁₇Eppeđ-uv tij ibbeerd, et tot, mii mana njäälmist siisâ, mana čuávján, já talle tot puátá luándulâš kiäinu mield olgos. ₁₈Mut tot, mii puátá njäälmist olgos, vuálgá vááimust, já tot nyeskid ulmuu. ₁₉Eidu vááimusthân vyelgih paas jurduuh, koddemeh, näimirikoseh, nyeskis eellim, suáláádmeh, verituođâštâsah já pelhittâsah. ₂₀Taah toh ulmuu nyeskideh, ij tot, et puurâd posâhánnáá kieđâiguin.»

₂₁Ko Jeesus vuolgij tobbeen, te sun moonâi Tyros já Sidon kuávlun. ₂₂Tobbeen mottoom kaanaanlâš kálgu, ton kuávlu ässee, poođij já čuárvui: »Hiärrá, Taavvid alge, äärmit muu! Paas jieggâ kiivsed čuuvtij muu nieidâ.» ₂₃Mut sun ij västidâm nisonân maiden.

Máttááttâspárnááh pottii Jeesus kuuvl já onnuu: »Poorgâ sunjin maidnii. Sun jotá mii maajeeld já čuárvu.» ₂₄Mut Jeesus västidij: »Jiem mun lah vuolgâttum iärásij ko Israel aalmug lappum saavzâi várás.» ₂₅Kuittâg kálgu poođij aldeláá, leggistâđâi enâmân Jeesus oovdân já eeđâi: »Hiärrá, iššeed muu!» ₂₆Mut Jeesus eeđâi sunjin: Ij lah sovâlâš väldiđ párnáin leeibi já leggistiđ tom pennuuviälppáid.» ₂₇»Ij lahkin, Hiärrá», kálgu västidij, »mut uážžuhhân viälppáh-uv puurrâđ taid muáluid, moh kočâdeh sii hiärá peevdist.» ₂₈Talle Jeesus eeđâi sunjin: »Styeres lii oskod, kálgu! Tábáhtus tego tun táátuh.» Ton puudâ rääjist nieidâ lâi tiervâs.

₂₉Jeesus vuolgij tobbeen, já ko sun lâi vázzám Galileajäävri rido, sun kuárŋui vääri oolâ. Ko sun čokkái tobbeen, ₃₀te suu kuuvl pottii ennuv ulmuuh, já sij puohtii fárustis likkušijd, čalmettemijd, lámásijd, kielâttemijd já maaŋgâid iärásijd. Sij piäijojii suu oovdân, já sun pyeredij sii. ₃₁Ulmuuh hiämáskii ko oinii, maht kielâttemeh sarnuu, lámáseh tiervâsmii, likkušeh vazzii já čalmettemeh oinii, já sij alestii Israel Immeel.

₃₂Jeesus kočoi máttááttâspárnáid jieijâs kuuvl já eeđâi: »Mun šallišâm täid ulmuid. Sij láá lamaš muu kulen jo kulmâ peeivi, ige sist lah mihheen purrâmâššân. Mun jiem haalijd lyeštiđ sii vyelgiđ purâhánnáá, amas sij vyeimittuđ määđhist.» ₃₃Máttááttâspárnááh ettii sunjin: »Kost mij tääbbin asâhánnáá kuávlust uážžup nuuvt ennuv leeibi, et pyehtip piemmâđ tággáár olmoošjuávhu?» ₃₄»Kalle leeibi tist láá?», Jeesus koijâdij. »Čiččâm», sij västidii, »já mottoom uccâ kuálááš.»

₃₅Jeesus kočoi ulmuid čokániđ. ₃₆Talle sun vaaldij taid čiččâm leibid já kuolijd, ceelhij kijttosrukkoos, tojâlij leeibijd já adelij pittáid máttááttâspárnáid, kiäh juohhii taid ulmuid. ₃₇Puohah purrii já kalanii, já pasâttâsâid sij nurrii čiččâm veddilitted tievâ. ₃₈Puurâdmin lijjii neljituhháát almajid já lasseen nisoneh já párnááh.

₃₉Talle Jeesus luoštij aalmug vyelgiđ, lavkkij skiijpân já poođij Magadan kuávlun.