Matteus 8

₁Ko Jeesus poođij vuálus vääri alne, te stuorrâ olmoošjuávkku čuávui suu. ₂Suu kuuvl poođij talle mottoom spiitaallâš almai. Almai leggistâđâi enâmân suu oovdân já eeđâi: »Hiärrá! Jis tuš táátuh, te tun puávtáh putestiđ muu.» ₃Jeesus keigij kieđâs, kuoskâttij almaa já eeđâi: »Mun táátum. Puttáásm!» Tállân almai puáránij tavdâstis. ₄Jeesus eeđâi sunjin: »Keejâ, et jieh maainâst täst kiässán. Moonâ tuše čäittiđ jieijâd paapân já addel Mooses asâttem uhreläähji tuođâštâssân puárránmist.»

₅Ko Jeesus lâi puáttám Kapernaumân, te mottoom čyeđeuáivalmai poođij suu kuuvl já táátui sust iše ₆eeđân: »Hiärrá, muu palvâleijee lii jamâstum já viälláá pääihist korrâ pohčâsijn.» ₇Jeesus eeđâi sunjin: »Mun puáđám já pyeredâm suu!» ₈Mut čyeđeuáivalmai västidij: »Ij, Hiärrá, jiem mun lah ton árvusâš, et tun puáđáččih muu káátu vuálá. Ceelhi tuš sääni, já muu palvâleijee puárrán. ₉Mun jieš-uv lam nubij kočostâh já must láá suátialmaah páhuldâssân. Ko eeđâm suáldáttân: ’Moonâ’, te sun mana, teikâ nuubán: ’Puáđi’, te sun puátá, já muu palvâleijei: ’Poorgâ taam’, te sun parga.»

₁₀Ko Jeesus kuulâi taam, te sun hiämáskij já eeđâi toid, kiäh suu servidii: »Tuođâi: näävt kievrâs osko jiem lah kavnâm oovtâgin israelliist! ₁₁Mun eeđâm tijjân, et nuorttân já viestârist puátih maaŋgah, kiäh oolmij väldikoddeest čokkájeh peevdist Áábráhâmáin já Issáákkáin já Jáákkupáin. ₁₂Mut toh, kiäh kolgii arbiđ väldikode, leggistuvvojeh olgos sevŋâdâsân. Tobbeen lii čiärrum já paanij kiccâm.» ₁₃Talle Jeesus eeđâi čyeđeuáivalmai: »Moonâ. Šados nuuvtko tun oskoh.» Ton puudâ palvâleijee puáránij.

₁₄Jeesus moonâi Piättár pááikán já ooinij Piättár vuánnám viälláámin korrâ kumestâsâst. ₁₅Jeesus kuoskâttij suu kietân, já kumestâs vuolgij sust. Nissoon pajanij seeŋgâst já palvâlškuođij Jeesus. ₁₆Já ko eehid šoodâi, te Jeesus kuuvl puáhtojii maaŋgah, kiäid paas jiegah väividii. Sun vuájálitij sanijnis jiegâid já pyeredij puoh pyecceid, ₁₇vâi olášuuččij tot, mii lii ettum proofeet Jesaja kirjeest:

₁₈Ko Jeesus ooinij, mon ennuv ulmuuh lijjii suu pirrâ, te sun kočoi vyelgiđ nubebel jäävri. ₁₉Mottoom laavâmáttáátteijee poođij talle suu kuuvl já eeđâi sunjin: »Máttáátteijee, mun čuávum tuu, kuus ihenis tun moonahkin.» ₂₀Jeesus västidij sunjin: »Riämnjáin láá piäjuh já alme luudijn piervâleh, mut Ulmuu Algeest ij lah mihheen, mon vuástá teddiliđ uáivis.» ₂₁Mottoom eres, suu máttááttâspärni, eeđâi sunjin: »Hiärrá, adde muu vistig eelliđ hävdidmin iäččán.» ₂₂Mut Jeesus eeđâi sunjin: »Čuávu muu! Tipte jämmeid hävdidiđ jämmeidis.»

₂₃Jeesus lavkkij skiijpân, já máttááttâspárnááh čuovvuu suu. ₂₄Jäävri alne pajanij fakkist šuármu. Pááruh kirdii paijeel skiijpâ, mut Jeesus oođij. ₂₅Talle máttááttâspárnááh cuvnii suu já ettii: »Hiärrá, kááju mii! Mij hevvânep.» ₂₆»Mondiet tij nievt polâvetteđ, uccáá oskovááh?» Jeesus eeđâi sijjân. Talle sun pajanij já nuttâlij piegâ já pááruid, jeđe kolkkij aaibâs. ₂₇Ulmuuh hiämáskii já ettii: »Mii almaid taat lii? Suuhân tottâleh piegah já pááruh-uv.»

₂₈Ko Jeesus poođij nubebel rido Gadara kuávlun, te poođijn suu oovdeld hävdikuovđâšmijn almaakyevtis, kiäid paas jiegah väividii. Suoi láin nuuvt viehâváldáliih, et ij kihheen puáhtám jotteeđ ton luodâ mield. ₂₉Suoi čuárvoin: »Maid tun munnust táátuh, Immeel Alge? Lah-uv tun puáttám teehin munnuu pijnediđ jo ovdil meriääigi?»

₃₀Mottoom máđháá keččin juuđij stuorrâ šaheiälu kuátumin. ₃₁Paas jiegah tattuu Jeesusist: »Jis tun vuájálitáh mii olgos, te vuolgât mii šaheiälun.» ₃₂»Moonnâđ!» Jeesus eeđâi. Talle jiegah vuolgii almain já monnii šovvijd, já ubâ iälu ruotâstij ciägupäävtist vuálus jáávrán já hevvânij.

₃₃Šahekeččeeh patârii. Sij monnii kaavpugân já mainâstii, maht lâi keevvâm ja mii lâi tábáhtum almaakuáhtás, kiäid paas jiegah väividii. ₃₄Talle puohah vuolgii kaavpugist Jeesus oovdeld. Ko sij oinii suu, te sij tattuu suu kaidâđ ton kuávlust.