1. Johannes 1

₁Dat mii lea leamaš álggu rájes, maid mii leat gullan, maid mii leat oaidnán iežamet čalmmiiguin, maid mii leat geahčadan ja maid min gieđat leat guoskkahan, dat lea min sáhka: eallima sátni. ₂Eallin almmustuvai, ja dan mii leat oaidnán ja dan mii duođaštit. Mii sárdnidit didjiide agálaš eallima, mii lei Áhči luhtte ja almmustuvai midjiide. ₃Mii sárdnidit didjiide dan maid mii leat oaidnán ja gullan, vai maiddái dis livččii searvevuohta minguin, mii lea searvevuohta Áhčiin ja su Bártniin Jesus Kristusiin. ₄Dán mii čállit, vai min illu šaddá ollisin.

₅Dát lea dat sáhka maid mii leat sus gullan ja maid mii didjiide sárdnidit: Ipmil lea čuovga iige sus leat mihkkege seavdnjadasaid. ₆Jos mii dadjat ahte mis lea searvevuohta suinna, muhto vádjolit seavdnjadasas, de mii gielistit eatge čuovo duohtavuođa. ₇Muhto jos mii vádjolit čuovgasis, nugo son ieš lea čuovggas, de mis lea searvevuohta guhtet guimmiideametguin, su Bártni Jesusa varra buhtista min buot suttus.

₈Jos mii dadjat ahte mis ii leat suddu, de mii beahttit iežamet iige duohtavuohta leat min siste. ₉Jos mii dovddastit suttuideamet, de son lea oskkáldas ja vanhurskkis ja addá midjiide min suttuid ándagassii ja buhtista min buot vearrivuođas. ₁₀Jos mii dadjat ahte mii eat leat suddudan, de mii dahkat su gielástallin iige su sátni leat min siste.