1. Gonagasaid girji 2

₁Go Davida jápmináigi lahkanišgođii, de son neavvui bártnis Salomo ná: ₂Mun manan dál dan geainnu man buot mii eallá, šaddá mannat. Leage gievra, leage olmmái! ₃Doala dan maid Hearrá, du Ipmil, lea gohččon du doallat. Vádjol su geainnuid ja doala su báhkkomiid ja lágaid, su mearrádusaid ja gohččumiid mat leat čállojuvvon Mosesa láhkii. Dalle dutnje menestuvvá buot maid dagat ja gosa ain jorgalat, ₄ja Hearrá ollašuhttá lohpádusa maid attii munnje go son celkkii: “Jos du bártnit dárkojit geainnuset ja vádjolit oskkáldasat mu ovddas oppa váimmus ja oppa sielus, de Israela truvnnus čohkká álo du soga olmmái.” ₅Donhan dieđát maid Joab, Seruja bárdni, lea dahkan munnje ja maid son dagai Israela guovtti soahteveagaoaivámužžii, Abnerii, Nera bárdnái, ja Amasai, Jetera bárdnái. Son gottii sudno ja mávssahii ráfi áigge vara mii lei golgan soađis. Vigihis varain son durddidii alimiiddis boahkána ja julggiidis gápmagiid. ₆Bargga dal viisát alege divtte su čurges vuovttaid mannat ráfis jábmiidáibmui. ₇Muhto leage ustitlaš gileadlaš Barsillaja bártniide ja divtte sin borrat du iežat beavddis, danin go siinai ledje munnje ustitlaččat dalle go mun báhtarin du vieljas Absalomis. ₈De lea vel Šimi, Gera bárdni, benjaminlaš Bahurimis. Son garuhii mu fasttit dan beaivvi go mun ledjen mannamin Mahanajimii. Muhto go son bođii mu ovddal Jordangáddái dearvvahit mu, de mun vurdnon sutnje Hearrá nammii: Mun in gotte du. ₉Muhto divtte su dál ráŋggáštuvvot. Donhan leat viissis olmmái ja dieđát mo meannudit suinna, vai su čurges vuovttat mannet varranaga jábmiidáibmui.

₁₀David manai vuoiŋŋadit áhčiidis lusa, ja son hávdáduvvui Davida gávpogii. ₁₁Son lei leamaš Israela gonagassan njealljelogi jagi. Hebronis son lei ráđđen čieža jagi ja Jerusalemis golbmalogigolbma jagi. ₁₂Salomo čohkánii áhčis Davida truvdnui, ja su gonagasváldi šattai nanusin.

₁₃Adonia, Haggita bárdni, bođii Salomo eatni Batseba lusa, ja Batseba jearai: “Boađátgo don ustibin?” Adonia vástidii: “De boađán, ₁₄muhto mus lea juoga sárdnut dutnje.” Batseba dajai: “Sártno.” ₁₅Adonia dajai: “Donhan dieđát ahte gonagasvuohta gulai munnje, ja oppa Israel vurddii mu šaddat gonagassan. Muhto váldi gáiddai mus ja šattai mu villjii, danin go dat lei Hearrá dáhttu. ₁₆Mus lea okta áidna bivdda, ale biehtat mus dan.” Batseba dajai: “Mun guldalan.” ₁₇De Adonia dajai: “Bivdde gonagas Salomo addit munnje áhkkán šunemlaš Abišaga. Dus son ii biehtat dan.” ₁₈Batseba vástidii: “Mun sártnun du beales gonagassii.”

₁₉Batseba manai gonagas Salomo lusa sárdnut Adonia beales. Gonagas čuožžilii, bođii su ovddal ja gopmirdii eatnamii muođuid. De son fas čohkánii, ja maiddái gonagasa eadnái buktojuvvui stuollu. Batseba čohkánii gonagasa olgeš beallái ₂₀ja dajai: “Mun ánuhan dus uhca áššáža, ale biehtat dan mus.” Gonagas dajai sutnje: “Ánut, eatnážan, in mun biehtat dan dus.” ₂₁Batseba dajai: “Divtte vieljat Adonia oažžut áhkkán šunemlaš Abišaga.” ₂₂Gonagas Salomo vástidii eadnásis: “Manne don ánuhat Adoniai šunemlaš Abišaga? Ánut baicca sutnje gonagasválddi! Sonhan lea mu boarráset viellja, ja su bealdehan leaba báhppa Ebjatar ja Joab, Seruja bárdni.” ₂₃Ja gonagas Salomo vuortnui Hearrá nammii: “Ipmil ráŋggáštehkos mu dál ja álo, jos dát bivdda ii mávsse Adoniai su heakka! ₂₄Nu duohta go Hearrá eallá, son gii lea nannen mu ja gii lohpádusas mielde lea addán munnje ja mu sohkii áhččán Davida truvnnu: Vel otnánaga Adonia jápmá!” ₂₅Gonagas Salomo vuolggahii Benaja, Jojada bártni, goddit Adonia, ja nu son jámii.

₂₆Gonagas dajai báhppa Ebjatarii “Mana du opmodahkii Anatotis. Don ánssášat jápmit, muhto odne mun in gotte du, danin go don leat guoddán Hearrá Ipmila árkka áhččán Davida muođuid ovddas ja leat gillán buot maid son gillái.” ₂₇Nu Salomo lihcui Ebjatara iige suovvan su šat leat Hearrá báhppan, ja nu ollašuvai dat maid Hearrá lei sárdnon Eli soga birra Šilos.

₂₈Go Joab gulai dan, de son báhtarii Hearrá goahtái ja dollii áltárčorvviide. Son lei mannan Adonia beallái, muhto Absaloma son ii lean dorjon. ₂₉Salomoi dieđihuvvui: “Joab lea báhtaran Hearrá goahtái ja lea doppe áltára guoras.” Dalle son vuolggahii Benaja, Jojada bártni, ja gohčui su: “Mana ja časkke su jámas!” ₃₀Benaja bođii Hearrá goahtái ja dajai Joabii: “Gonagas gohčču du boahtit olggos!” Joab vástidii: “In boađe, mun dáhtun jápmit dása.” Benaja máhcai gonagasa lusa ja muitalii maid Joab lei vástidan. ₃₁Gonagas dajai sutnje: “Daga nugo Joab dáhttu. Časke su jámas ja hávdát su. Nu don čoavddát mu ja mu áhči soga dan vigihis varas maid Joab golggahii. ₃₂Hearrá addá sutnje vuoiggalaš ráŋggáštusa. Sonhan fallehii guokte olbmá geat leigga vuoigatlaččabut ja buorebut go son ieš, go son almmá mu áhči Davida dieđekeahttá gottii Nera bártni Abnera, Israela soahteveagaoaivámučča, ja Jetera bártni Amasa, Juda soahteveagaoaivámučča. ₃₃Bohtos sudno varra Joaba ja su soga badjelii agálaš áigái. Muhto addos Hearrá Davidii ja su nállái, su sohkii ja su truvdnui, agálaš dorvvu.” ₃₄Nu Benaja, Jojada bárdni, manai ja časkkii Joaba jámas. Son hávdáduvvui meahccái iežas ruovttubáikái. ₃₅Gonagas bijai Benaja, Jojada bártni, soahteveagaoaivámužžan Joaba sadjái, ja Ebjatara sadjái son bijai báhppa Sadoka.

₃₆Gonagas rávkkai lusas Šimi ja dajai sutnje: “Hukse alccesat viesu Jerusalemii ja ása deike. Don it oaččo vuolgit dáppe gosage. ₃₇Don oaččut diehtit ahte dan beaivvi go don vuolggát dáppe ja rasttildat Kedronjogaža, de don jámát, ja dat lea du iežat sivva.” ₃₈Šimi vástidii: “Lehkos nu, du bálvaleaddji dahká nugo don gohčut, mu hearrá ja gonagas.” Ja Šimi ásai Jerusalemis guhká.

₃₉Muhto golmma jagi geažes guovttis Šimi šlávain gárgidedje Gata gonagasa Akiša, Maaka bártni, lusa. Šimii muitaluvvui ahte su šlávat leigga Gatis. ₄₀Son sádelasttii ásenis ja vulggii Akiša lusa Gatii viežžat šlávaidis ja buvttii sudno ruoktot.

₄₁Salomoi dieđihuvvui ahte Šimi lei mannan Jerusalemis Gatii ja lei boahtán ruoktot. ₄₂Dalle gonagas rávkkai Šimi lusas ja dajai sutnje: “Almma mun vuortnuhin du Hearrá nammii ja várrejin du ahte dan beaivvi go don vuolggát dáppe gosage, de don ráŋggáštuvvot jápmimiin? Ja don vástidit: ‘Lehkos nu, mun dagan nugo don gohčut.’ ₄₃Manne don dalle it doallan dan váli mii vurdnojuvvui Hearrá nammii, itge jeagadan mu gohččuma?” ₄₄Ja gonagas dajai vel Šimii: “Don dieđát ja ipmirdat ieš buot dan bahá maid dahket áhččásan Davidii. Dál Hearrá jorgala du bahávuođa du iežat oaivái. ₄₅Muhto gonagas Salomo lea buressivdniduvvon, ja Hearrá nanne Davida truvnnu agálaš áigái.” ₄₆De gonagas gohčui Benaja, Jojada bártni, doalvut Šimi olggos ja časkit su jámas, ja nu son jámii.

Gonagasváldi lei dál nannosit Salomo gieđas.