1. Gonagasaid girji 7

₁Iežas viesu Salomo fidnii gárvvisin go lei huksen dan golbmanuppelohkái jagi.

₂Son huksii Sederšloahta mii lei čuođi állana guhku, vihttalogi állana govddu ja golbmalogi állana alu. Das ledje sederstoalpput njealljin ráidun, ja stoalppuid alde ledje sederbielkkát. ₃Dáhkki lei sedermuoras, ja dat lei biddjojuvvon dáhkkedoaresmuoraid vehkii mat ledje stoalppuid alde. Dáhkkedoaresmuorat ledje oktiibuot njealljelogivihtta, vihttanuppelohkái ain ráiddus. ₄Ihkkonat ledje golmma gearddis, guđege ráiddus ihkkon ihkkona buohta. ₅Buot uvssat ja ihkkonat ledje njealječiegagat, ja ihkkonat ledje golmma ráiddus buohtalaga. ₆Son huksii stoalpohálla mii lei vihttalogi állana guhku ja golbmalogi állana govddu, ja dan ovdii ovdahálla ja dan stoalppuid, ja buot dan ovdii vel goavddi. ₇Son huksii maiddái truvdnohálla mii gohčoduvvui maiddái duopmohállan, dasgo doppe son dubmii. Dan seainnit láhttis robi rádjái ledje skoađastuvvon sedermuorain.

₈Dat viessu mas Salomo ieš áiggui ássat, lei ovdalanja duohken, seammá láhkái huksejuvvon muhto nuppi šiljus. Salomo huksii seammalágán viesu maiddái farao niidii gean son lei váldán áhkkán. ₉Buot dát viesut vuođu rájes gitta bielkkáid rádjái ja olggumus oasi rájes gitta stuorra ovdašilju rádjái ledje huksejuvvon válljugeđggiin mat siskkobealde ja olggobealde ledje sahejuvvon mearremihttui. ₁₀Vuođđudus lei biddjojuvvon válljugeđggiin, stuorra geđggiin mat ledje logi ja gávcci állana guhku. ₁₁Daid alde ledje njealječiegat válljugeađggit ja vel sedermuorra.

₁₂Stuorra šilju birra lei muvra mas ledje čullojuvvon geađggit golmma gearddis ja okta sederbielkágeardi. Seammalágán muvra lei maid Hearrá tempela ovdašilju ja siskkit ovdašilju birra.

₁₃Gonagas Salomo vieččahii Tyrosis Hiram-nammasaš olbmá. ₁₄Su eadni lei leaska gii gulai Naftali čerdii, ja su áhčči tyroslaš veaikerávdi. Hiram lei erenoamáš čeahppi ja máhtii duddjot buotlágán veaikedujiid. Son bođii Salomo lusa, ja son duddjui buot maid gonagas siđai su duddjot. ₁₅Hiram duddjui bronssas guokte bácci. Dat ledje guktot gávccinuppelohkái állana alu ja daid birramihttu lei guoktenuppelohkái állana. Báccit ledje guovdnjasat, ja daid seainnit ledje njeallje suorpma asu. ₁₆Son duddjui bronssas guokte bázzeoaivvi ja bijai daid bácciid gežiide. Goabbáge bázzeoaivi lei vihtta állana alu. ₁₇Goappáge bázzeoaivvis lei bárggaldat mas ledje diehpit ja viđjjit. ₁₈Son duddjui bárggaldagaid birra guokte granáhtaehpelráiddu gokčat bázzeoivviid, seammá ládje goappáge bázzeoaivái. ₁₉Bázzeoivviid allodat lei njeallje állana, ja dat ledje hábmejuvvon lotuslieđi láhkásažžan. ₂₀Goappáge bázzeoaivvi bárggaldaga birra ledje ráidun guoktečuođi granáhtaehpela.

₂₁Salomo ceggii bácciid tempela ovdahállii. Dan bázzái maid son ceggii olgeš beallái, son bijai namman Jakin, ja gurut beale bázzái son bijai namman Boas. ₂₂Bázzegeažit ledje lotusliđiid hápmásaččat. Nu ollašuvai bácciid duddjon.

₂₃Hiram maid leikii jorba áldá mii gohčoduvvui mearran. Dat lei ravddas ravdii logi állana, dan allodat lei vihtta állana ja dan birramihttu lei golbmalogi állana. ₂₄Dan birra, ravdda vuolábealde, ledje šattoshearvvat guoktin ráidun, logi ain állanis, ja dat ledje leikejuvvon oktanaga mearain. ₂₅Mearra orui guoktenuppelohkái vuovssá alde. Golbma vuovssá gehčče davás, golbma oarjjás, golbma lulás ja golbma nuorttas guvlui. Daid maŋŋegeažit ledje vuostálagaid, ja mearra orui daid alde. ₂₆Mearra lei giehtaloabu asu, ja dan ravda sojai olggos guvlui lotuslieđi hápmásaš geara ravdda láhkái. Mearra gesii guokteduhát batmihtu.

₂₇Hiram duddjui maid logi bronsabeavddi. Buot beavddit ledje njeallje állana guhku, njeallje állana govddu ja golbma állana alu. ₂₈Bevddiid ráhkadus lei dákkár: Dain lei rápma ja dan doarjjan doaresstákkut. ₂₉Ráma alde ja maiddái doaresstákkuid alde ledje ledjon-, vuoksá- ja kerubagovvosat, ja ledjoniid ja vuovssáid vuollelis ledje derpojuvvon bárggaldagat. ₃₀Guđege beavddis ledje njeallje bronsajuvlla ja bronsaáksilat, ja beavddi guđege njealji juolgái bárggaldagaid duogábeallái lei leikejuvvon čiehkastoalpu mii olii gievnni vuollái. ₃₁Gievnni doarjjarápma lei guovdu hearvajorbadasa ja olii állana dan badjelii. Dat lei jorbbas ja dan čađamihttu lei beannot állana, ja dat lei leikejuvvon dego gievdnevuolušge. Dange ravddat ledje hervejuvvon govvosiiguin. Rápma lei njealječiegat, ii jorbbas.

₃₂Beavddi njeallje juvlla ledje ráma vuolde, ja juvllaid doalanat ledje beavddis gitta. Guđege juvla lei beannot állana alu. ₃₃Dat ledje vovdnajuvllaid láhkásaččat, ja daid doalanat, gierddut, bánit ja guovddážat ledje leikejuvvon bronssas. ₃₄Njeallje stákku mat dorjo gievnni, ledje beavddi njealji čiegas, ja dat ledje leikejuvvon oktan bihttán bevddiin. ₃₅Beavddi alde lei jorba aládus, állanbeale alu, ja beavddi badjeravddas ledje doalanat ja daid listtat. ₃₆Duolba sajiide ledje gohppojuvvon kerubat, ledjonat ja pálmmat. ₃₇Buot logi beavddi ledje leikejuvvon seammá láhkái, dat ledje ovttalágánat mihtu ja hámi dáfus.

₃₈Hiram duddjui maid logi bronsagievnni. Juohke gievdni gesii njealljelogi batmihtu, ja daid čađamihttu lei njeallje állana. Son bijai ovtta gievnni guđege beavdái. ₃₉Vihtta beavddi biddjojuvvojedje tempela olgeš ja vihtta gurut beallái, ja mearra biddjojuvvui tempela olgeš beallái dan čihkii mii lei nuorttaslulás guvlui.

₄₀Hiram duddjui maid báđiid, gutnagoaivvuid ja oaffarbolluid. Son gárvvistii buot maid gonagas Salomo duddjohii Hearrá viesu várás: ₄₁Guokte bácci, daid lotuslieđi hápmásaš bázzeoivviid ja guokte bárggaldaga gokčat bázzeoivviid, ₄₂njeallječuođi granáhtaehpela dan guovtti bárggaldahkii, guokte granáhtaehpelráiddu goappáge bárggaldahkii gokčat lotuslieđi hápmásaš bázzeoivviid, ₄₃logi beavddi ja daidda logi gievnni, ₄₄áldá ja guoktenuppelohkái vuovssá dan vuollái, ₄₅báđiid, gutnagoaivvuid ja oaffarbolluid. Buot dat gálvvut maid Hiram duddjui gonagas Salomoi Hearrá viesu várás, ledje gellojuvvon bronssas.

₄₆Gálvvut leikejuvvojedje láiráfoarpmaid sisa mat ledje roggojuvvon eatnamii, ja gonagas leikehii daid Jordanleagis Sukkota ja Saretana gaskkas. ₄₇Salomo bijai buot diŋggaid sadjáseaset. Daidda adnojuvvui nu mearihis ollu bronsa ahte dat ii lean vihkkemis.

₄₈Salomo duddjohii maid buot eará Hearrá tempela diŋggaid: golleáltára ja gollebeavddi man alde oaffarláibbit dollojuvvojedje, ₄₉vihtta gollelámpájuolggi olgeš ja vihtta gurut beallái goara ovdii, lieđđehearvvaid, lámppáid ja basttaid, visot gollis, ₅₀ja vel lihtiid, niibbiid, oaffarbolluid, gohpuid ja dollalihtiid čielga gollis. Maiddái tempela siskkit lanja, basimus boaššu, uksa ja dan uksalahkit ja tempelhálla uvssat skoađastuvvojedje golliin.

₅₁Go gonagas Salomo lei gárvvistan buot dujiid maid son lei duddjohan Hearrá tempela várás, de son buvttii dohko buot gálvvuid maid su áhčči David lei basuhan Hearrái. Silbba, golli ja eará dujiid son bijai Hearrá viesu dávvirgámmáriidda.