1. Gonagasaid girji 8

₁Salomo rávkkai dasto lusas Jerusalemii Israela vuorrasiid ja buot Israela čearddaid ja sogaid oaivámuččaid. Sii galge buktit Hearrá lihtuárkka Sionis, Davida gávpogis. ₂Buot israellaččat čoagganedje gonagas Salomo lusa etanimmánu, jagi čihččet mánu, basiide. ₃Go buot Israela vuorrasat ledje boahtán, de báhpat loktejedje Hearrá árkka sajistis. ₄Sii gudde tempelii Hearrá árkka, almmustusgoađi ja buot goađi bassi gálvvuid. Báhpat ja levilaččat gudde buot daid. ₅Gonagas Salomo ja oppa Israela searvegoddi mii lei čoagganan su lusa, čužžo árkka ovddas ja oaffarušše nu ollu sávzzaid ja vuovssáid ahte dat eai lean lohkamis. ₆Báhpat bukte Hearrá lihtuárkka sadjásis tempelgorrii, basimus boššui, kerubaid soajáid vuollái. ₇Kerubaid soaját ledje leabbut dan báikki badjel gos árka lei, ja gokče árkka ja dan guoddinstákkuid. ₈Guoddinstákkut ledje nu guhkit ahte daid geažit oidnojedje bassi latnjii mii lei goara ovddas, muhto eai guhkkelii. Dat leat doppe vel otná beaivvige. ₉Árkka siste ii lean eará go dat guokte geađgetávvala maid Moses lei bidjan dohko Horebis, go Hearrá dagai lihtu israellaččaiguin maŋŋil go sii ledje vuolgán Egyptas. ₁₀Go báhpat vulge bassibáikkis, de Hearrá tempela devddii balva. ₁₁Balvva dihte báhpat eai sáhttán doaimmahit bálvalusa, dasgo Hearrá hearvásvuohta devddii tempela. ₁₂Dalle Salomo dajai:

₁₄Gonagas jorggihii álbmogii muođuid ja buressivdnidii oppa Israela searvegotti. Buohkat čužžo, ₁₅ja Salomo celkkii: “Máidnojuvvon lehkos Hearrá, Israela Ipmil, gii gieđainis lea ollašuhttán dan maid son lohpidii áhččásan Davidii, go son celkkii sutnje: ₁₆‘Dan rájes go mun bukten iežan álbmoga Israela Egyptas, de mun in leat válljen Israela čearddaid guovlluin gávpoga gosa huksejuvvošii tempel mu nama ássansadjin. Muhto dál mun lean válljen Jerusalema iežan nama ássansadjin, ja mun lean válljen Davida iežan álbmoga Israela ráđđejeaddjin.’ ₁₇Mu áhčči David áiggui hukset tempela Hearrái, Israela Ipmilii. ₁₈Muhto Hearrá celkkii sutnje: ‘Du áigumuš hukset munnje tempela lea buorre. ₁₉Muhto tempela it dattetge hukse don, muhto du bárdni, du alimiid šaddu.’ ₂₀Dál Hearrá lea ollašuhttán dan maid lohpidii. Mun lean čohkánan áhččán Davida maŋŋil Israela truvdnui, nugo Hearrá lea cealkán, ja mun lean huksen tempela Hearrái, Israela Ipmilii. ₂₁Dohko mun lean dahkan saji árkii, man siste leat lihtu lágat, dan lihtu maid Hearrá dagai min áhčiiguin dalle go son buvttii sin Egyptas.”

₂₂Salomo čuoččui Hearrá áltára guoras oppa Israela searvegotti ovddas. Son lebbii gieđaid almmi guvlui ₂₃ja dajai: “Hearrá, Israela Ipmil! Ii leat du veardásaš ipmil, ii badjin almmis iige dáppe vuollin eatnama alde. Don bisuhat lihtu ja árkkálmasttát bálvaleddjiidat, go sii vádjolit olles váimmus du ovddas. ₂₄Don leat ollašuhttán dan maid lohpidit bálvaleaddjásat Davidii, mu áhččái. Maid du njálbmi lea sárdnon, dan du giehta lea dahkan. ₂₅Hearrá, Israela Ipmil, deavdde maiddái dan maid lohpidit bálvaleaddjásat Davidii, mu áhččái, go celket sutnje: ‘Álo čohkká du soga olmmái mu ovddas Israela truvnnus, jos du bártnit atnet váras dan geainnu man don leat vádjolan mu ovddas.’ ₂₆Israela Ipmil, divtte nappo ollašuvvat dan maid lohpidit bálvaleaddjásat Davidii, mu áhččái.

₂₇Muhto ásságo Ipmil duođaid eatnama alde? Albmi, velá almmiid almmitge eai gease du, mo dasto dát tempel maid mun lean huksen! ₂₈Hearrá, mu Ipmil! Jorgal almmatge bálvaleaddját beallái ja gula mu vuollegis átnuma, go mun dál rohkadalan du ovddas. ₂₉Ane čalmmiid ijatbeaivái rabasin dán viesu guvlui, dan báikki man birra leat cealkán: ‘Dás mu namma ássá.’ Gula maid du bálvaleaddji rohkadallá dán báikái čalmmiid. ₃₀Gula du bálvaleaddji ja du álbmoga Israela átnumiid, go mii rohkadallat du dán báikái čalmmiid. Vare don gulašit daid ássansadjásat albmái, gulašit ja attášit ándagassii!

₃₁Jos soamis vahágahttá nuppi ja geatnegahttojuvvo vuordnut váli, ja son de vuordnu váli du áltára ovddas dán tempelis, ₃₂de gula dan dalle albmái ja atte vuoigatvuođa bálvaleddjiidasat. Dubme sivalačča sivalažžan ja ráŋggáš su nugo su dagut ánssášit, ja dubme sivaheami sivaheapmin ja atte sutnje dan maid vuoigatvuohta gáibida.

₃₃Jos du álbmot Israel vuoittáhallá vašálažžii danin go lea suddudan du vuostá, muhto de jorgala du beallái, máidnu du nama, rohkadallá du ja ánuha árpmu dán tempelis, ₃₄de gula dan dalle albmái. Atte ándagassii álbmogat Israela suttu, ja divtte dan máhccat dán eatnamii maid don addet min áhčiide.

₃₅Jos albmi lea dahppagasas iige atte arvvi, danin go israellaččat leat suddudan du vuostá, muhto sii de rohkadallet dán báikái čalmmiid ja rámidit du nama ja jorgalit suttusteaset go don vuolidat sin, ₃₆de gula dan albmái. Atte ándagassii bálvaleddjiidat ja álbmogat Israela suttu ja bagat sidjiide rivttes geainnu man vádjolit. Divtte arvit eatnamasat maid leat addán iežat álbmogii opmodahkan.

₃₇Jos eatnamii boahtá nealgi dahje rohttu, jos boahtá gortniid guorban ja ástan, jos bohtet rásselohkut ja máđut, jos vašálaš birastahttá muhtun gávpogiid dahje boahtá mii buohcuvuođaid dahje givssiid ihkinassii, ₃₈ja de muhtun olmmoš dahje juo oppa Israel rohkadallá ja átnu árpmu – juohkehašhan dovdá buoremusat givssi mii su váivvida – ja lebbe gieđaid dán tempela guvlui, ₃₉de gula dan ássansadjásat albmái. Atte sidjiide ándagassii, daga juohkehažžii nugo su vádjolus ánssáša, danin go don dovddat olbmo váimmu, dušše don dovddat buot olbmuid váimmu. ₄₀Nu sii ballet dus nu guhká go ellet dán eatnamis maid don addet min áhčiide.

₄₁Maiddái vierroolbmot vedjet boahtit gáiddus eatnamis. Sii eai gula du álbmogii, ₄₂muhto doppenai beaggá du stuorra namma ja du gievrras ja bajiduvvon giehta. Go vierroolmmoš boahtá ja rohkadallá du dán tempelii čalmmiid, ₄₃de gula dan ássansadjásat albmái ja daga dan maid son átnu dus. Dalle buot máilmmi álbmogat ohppet dovdat du nama, ballet dus du álbmoga Israela láhkái ja ipmirdit ahte dát tempel maid mun lean huksen, lea basuhuvvon du nammii.

₄₄Jos don vuolggahat iežat álbmoga soahtat vašálaččain, ja rohkadallá du dán gávpogii čalmmiid maid don leat válljen ja dán tempelii čalmmiid maid mun lean huksen du nammii, ₄₅de gula albmái dan rohkadusaid ja átnumiid ja veahket dan oažžut vuoigatvuođa.

₄₆Jos sii suddudit du vuostá – iihan leat oktage olmmoš gii ii suddut – ja don moaráhuvat sidjiide ja attát sin vašálaččaid gihtii, ja sii dolvojuvvojit fáŋgan vašálaččaid eatnamii guhkás dahje lahka, ₄₇muhto sii de fáŋgavuođas gáhtet ja fas čurvot dutnje ja dadjet: ‘Mii leat suddudan ja dahkan vearrut, mii leat leamaš ipmilmeahttumat’, ₄₈ja jos sii de vašálaččaideaset eatnamis jorgalit du beallái oppa váimmus ja oppa sielus ja rohkadallet du iežaset eatnamii čalmmiid, dán eatnamii čalmmiid maid don addet sin áhčiide ja dán gávpogii čalmmiid maid don leat válljen, ja dán tempelii čalmmiid maid mun lean huksen du nammii, ₄₉de gula dalle ássansadjásat albmái sin rohkadusa ja átnuma ja veahket sin oažžut vuoigatvuođa. ₅₀Atte álbmogasat ándagassii buot maid sii leat suddudan ja rihkkon du vuostá, ja divtte dan oažžut árpmu dain geat dollet dan fáŋgan, nu ahte sii árpmihivčče dan. ₅₁Dáthan lea du iežat álbmot ja du opmodat maid don buktet Egypta šolgenuvnnas. ₅₂Jorgal čalmmiid bálvaleaddját ja iežat álbmoga Israela beallái go sii rohkadallet du! Gula sin álo go sii čurvot dutnje! ₅₃Hearrá Ipmil, don leat ieš čuoldán sin buot eatnama álbmogiin vai sii livčče du opmodat; nugo don celket du bálvaleaddji Mosesa bokte dalle go buktet min áhčiid Egyptas.”

₅₄Go Salomo lei geargan rohkadallamis ja átnumis visot dán, de son lihkai Hearrá áltára ovddas gokko son lei čippostallan gieđat almmi guvlui. ₅₅Son čuožžilii ja buressivdnidii jitnosii oppa Israela searvegotti. ₅₆ “Máidnojuvvon lehkos Hearrá guhte lea addán álbmogasas Israelii muosi, nugo son lohpidii. Ii mihkkege dain buriin maid son lohpidii bálvaleaddjis Mosesa bokte, leat šaddan duššin. ₅₇Vare Hearrá, min Ipmil, livččii minguin, nugo son lei min áhčiiguin! Vare son ii guođáše min iige hilggoše min, ₅₈muhto sojahivččii min váimmu beallásis, nu ahte mii álo vádjolit su geainnuid ja doallat daid báhkkomiid, lágaid ja mearrádusaid maid son attii min áhčiide.

₅₉Vare Hearrá, min Ipmil, muittášii ijatbeaivái dan rohkosa maid mun lean rohkadallan, nu ahte son addá bálvaleaddjásis ja iežas álbmogii Israelii vuoigatvuođa guđege beaivái. ₆₀Dalle buot eatnama álbmogat ipmirdit ahte dušše Hearrá lea Ipmil, ii oktage eará. ₆₁Lehkos din váibmu ollislaččat Hearráin, min Ipmiliin, nu ahte doallabehtet su lágaid ja doahttalehpet su báhkkomiid, nugo otná beaivvige.”

₆₂De gonagas ja oppa Israel suinna oaffarušše njuovvanoaffariid Hearrá muođuid ovddas. ₆₃Salomo oaffarušai searvevuođaoaffarin Hearrái guoktelogiguokteduhát vuovssá ja čuođi guoktelogiduhát sávzza. Nu gonagas ja buot israellaččat vihahedje Hearrá tempela. ₆₄Gonagas basuhii dan beaivvi Hearrá tempela ovdašilju gaskaoasi gos son oaffarušai boaldinoaffariid ja borramušoaffariid ja searvevuođaoaffariid buoidebihtáid, dasgo bronsaáltár mii lei Hearrá muođuid ovddas, lei menddo uhcci geassit buot boaldinoaffariid ja borramušoaffariid ja searvevuođaoaffariid buoidebihtáid.

₆₅Nu Salomo doalai basiid oppa Israeliin. Hearrá, min Ipmila, muođuid ovdii lei boahtán hui stuorra olmmošeatnatvuohta davvin Lebo-Hamata rájes ja lullin Egyptajoga rájes. Sii dolle doppe basiid čieža beaivvi ja vel čieža beaivvi, oktiibuot njealljenuppelohkái beaivvi. ₆₆Gávccát beaivvi son luittii álbmoga vuolgit. Israellaččat buressivdnidedje gonagasa ja vulge dasto ruoktot ilus ja arvvohis mielas buot dan buori dihte maid Hearrá lei dahkan bálvaleaddjásis Davidii ja álbmogasas Israelii.