1Seammá láhkái dii, áhkát, lehket vuolibuččat iežadet boadnjái, vai maiddái dat boatnját geat eai oskko sátnái, vuitojuvvojit áhkáset eallingearddi bokte almmá sániid haga, 2go sii oidnet mo dii eallibehtet gulolašvuođas ja buhtisvuođas. 3Allos din čikŋa lehko dat mii lea olgguldasas, nugo vuovttaid bárgideapmi, gollečiŋat dahje čáppa biktasat. 4Muhto lehkos din nohkameahttun čikŋa siskkáldas, čiegus olmmoš geas lea vuollegis ja ráfálaš miella; dát lea mávssolaš Ipmilii. 5Dasgo nu čiŋahedje iežaset dovle bassi nissonat geat bidje doaivvuset Ipmilii. Sii ledje boadnjáseaset vuolibuččat, 6nugo Sara lei gulolaš Abrahamii ja gohčodii su hearrán. Dii lehpet su nieiddat jos dii dahkabehtet buori, ehpetge divtte maidege baldit din.
7Ja dii boatnját, ellet din áhkáin nugo lehpet oahppan, go son lea rašit bealli. Gudnejahttet su, dasgo son maid árbe árpmu ja eallima. Dahket dan, amaset din rohkadusat hehttejuvvot.
8Ja de vel: Lehket buohkat ovttamielalaččat, ráhkistehket guhtet guimmiideattet, lehket váibmoláđđásat ja vuollegaččat. 9Allet mávssat bahá baháin alletge bealkku bealkkuin, muhto baicca buressivdnidehket. Diihan lehpet rávkojuvvon árbet buressivdnádusa.
10Gii dáhttu ráhkistit eallima
ja oaidnit buriid beivviid,
dat galgá váruhit iežas njuokčama bahás
ja baksamiid behtolaš ságain.
11Son galgá jorgalit eret bahás
ja dahkat buriid,
ohcat ráfi ja viggat dasa.
12Hearrá čalmmit gehččet vanhurskásiidda,
su bealjit gullet sin rohkosa,
muhto Hearrá jorgala muođuid daid vuostá
geat dahket baháid.
13Gii sáhttá din vahágahttit, jos dii áŋgirit viggabehtet dahkat buriid? 14Ja vaikko dii vel šattašeiddet gillát vanhurskkisvuođa dihte, de lehpet ávdugasat. Allet sis bala alletge suorgan, 15muhto basuhehket Hearrá Kristusa váimmusteattet ja lehket álo gárvásat vástidit juohkehažžii gii jearrá din doaivvu vuođđudusa. 16Muhto vástidehket vuollegaččat ja gudnejahttimiin ja bisuhehket oamedovddu buhtisin, vai dat geat hiddjidit din buori eallima kristtalažžan, šaddet heahpadii. 17Buoret lea dahkat buriid ja gillát, jos Ipmil nu dáhttu, go gillát bahás daguid geažil.
Gásta ja ođđa eallin
18Dasgo Kristus ieš gillái oktii jápmima suttuid geažil, vanhurskkis gillái vanhurskkismeahttumiid ovddas vai son buvttášii din Ipmila lusa. Su rumaš goddojuvvui, muhto Vuoigŋa dagai su eallin, 19ja de son manai vuolás ja sárdnidii vuoiŋŋaide mat ledje fáŋgavuođas. 20Sii ledje leamaš gážžárat dolin Noa beivviid, go Ipmil gierdavašvuođastis vurddii dan botta go árka huksejuvvui. Das soapmásat, namalassii gávccis, bestojuvvojedje čázi bokte. 21Seammá ládje gástta čáhci dál beastá din. Dat ii buhtis rupmaša duolvvas, muhto lea buori oamedovddu rohkadus Ipmilii. Ja dii bestojuvvobehtet danne go Jesus Kristus lea bajásčuožžilan, 22son guhte lea mannan albmái ja čohkká Ipmila olgeš bealde ja gean vuollái leat biddjojuvvon eŋgelat, válddit ja fámut.
