1. Peter 4

₁Go Kristus dalle lea gillán iežas rupmašis, de ráhkkanahttet iežadet seammá jurddašanvugiin, danin go dat gii lea gillán iežas rupmašis, lea heaitán suddudeames. ₂Dii ehpet oaččo šat eallit olmmošlaš anistumiid mielde dán áiggálaš eallima, muhto nugo Ipmil dáhttu. ₃Dii dagaidet dan vássán eallináiggis juo galle dan maid báhkinat dáhttot, dii eliidet nuoskivuođas, anistumiin, jugešvuođas, leaicidemiin ja jugalmasain ja bálvaleiddet eahpeipmiliid heahpatlaš meanuiguin. ₄Dan dihte sii ovddošit dan go dii ehpet šat viega singuin dan seammá gudnehis nuoskivuhtii, ja hiddjidit din. ₅Muhto sii šaddet dahkat logu sutnje gii lea gárvvis dubmet elliid ja jábmiid. ₆Danne daiddage geat leat jápmán, lea sárdniduvvon evangelium, vai sii ealášedje vuoiŋŋas nugo Ipmil eallá, vaikko rupmašis sii leat ožžon seammá duomu go buot olbmot.

₇Buot diŋggaid loahppa lea lahka. Lehket dan dihte jierpmálaččat ja čilgosat, vai sáhttibehtet rohkadallat. ₈Buot ovddimustá ráhkistehket njuorrasit guhtet guimmiideattet, danne go ráhkisvuohta gokčá suttuid eatnatvuođa. ₉Lehket árvasat guhtet guimmiidasadet almmá nimmorkeahttá.

₁₀Bálvalehket guhtet guimmiideattet dainna árpmuattáldagain maid iešguhtege lea ožžon, Ipmila máŋggalágáš árpmu buorre dállodoallin. ₁₁Dat gii sárdnida, sárdnidehkos daid sániid maid Ipmil lea addán, dat gii bálvala, bálvalehkos daiguin áhpiiguin maid Ipmil addá. Nu Ipmil hearvásmahttojuvvo juohke dáfus Jesus Kristusa bokte. Sutnje gullá hearvásvuohta ja fápmu álo ja agálašvuhtii. Amen.

₁₂Ráhkkásiiddán, allet ovddoš dan dola ja áhcagastima mii din geahččala, dego didjiide livččii dáhpáhuvvamin juoga mii apmasiid. ₁₃Illudehket baicce dađi eambbo, mađi eambbo lehpet oasálaččat Kristusa gillámušaide, vai beassabehtet ávvudit ja illudit maiddái dalle go su hearvásvuohta almmustuvvá. ₁₄Go dii bilkiduvvobehtet Kristusa nama dihte, de lehpet ávdugasat, danne go din badjel lea hearvásvuođa Vuoigŋa, Ipmila Vuoigŋa. ₁₅Allos oktage dis gillájehko sorbmejeaddjin, suolan dahje vearredahkkin dahje dan dihte go seahkána eará olbmuid áššiide. ₁₆Muhto dat gii gillá kristtalažžan, ii dárbbaš heahpanaddat, muhto baicce giitit Ipmila kristtalačča namas.

₁₇Duomu áigi lea boahtán, ja duopmu álgá Ipmila viesus. Muhto jos dat álgá mis, de mii dalle lea daid loahppa geat eai oskko Ipmila evangeliumii? ₁₈Jos vanhurskkis illá bestojuvvo, de gosa dalle šaddá ipmilmeahttun ja suttolaš? ₁₉Dan dihte addoset dat geat gillájit Ipmila dáhtu mielde, sieluset oskkáldas sivdnideaddji gihtii ja dahkoset ain buriid.