1. Peter 5

₁Dán ávžžuhusa mun cealkkán daidda geat din gaskkas leat vuorrasat – mun gii iešnai lean vuoras ja Kristusa gillámušaid duođašteaddji ja maiddái oasálaš dan hearvásvuhtii mii almmustuvvá: ₂Gehččet ja áimmahuššet ealu maid Ipmil lea didjiide oskkildan, allet bákkus muhto eaktodáhtos, Ipmila dáhtu mielde, allet vuoittu dihte muhto váimmodet hálus. ₃Allet hearrán ráđđe daid geat leat din oassin oskkilduvvon, muhto lehket ellui ovdagovvan. ₄Go váldogeahčči almmustuvvá, de dalle dii oažžubehtet hearvásvuođa vuoitogierddu mii ii goassege golnna.

₅Dii nuorat, lehket vuorrasiidda vuolibuččat. Ja dii buohkat: Gárvodehket gaskavuođa vuollegašvuođa, dasgo Ipmil vuosttalda čeavlás olbmuid, muhto vuollegaččaid son árpmiha. ₆Vuollánehket nappo Ipmila fámolaš gieđa vuollái, de son alida din go áigi dievvá. ₇Bidjet buot morrašiiddádet su noađđin, danin go son atná dis fuola.

₈Lehket čilgosat ja gohcet! Din vuostálasti beargalat manná birra dego čeargu ledjon ja ohcá, gean beasašii njiellat. ₉Vuosttaldehket su, nanusin oskkus! Diihan diehtibehtet ahte din vieljat deaivvahallet seammá gillámušaide dán máilmmis. ₁₀Buot árpmu Ipmil lea Kristusis rávkan din agálaš hearvásvuohtasis. Go lehpet oanehaš gillán, de son ráhkkanahttá, gievruda ja doarju din ja dahká din nanusin. ₁₁Su lea fápmu agálašvuhtii. Amen.

₁₂Silvanusa mielde gean anán luohtehahtti vielljan, mun sádden dán oanehis girjji mas arvvosmahtán din ja duođaštan ahte dat árbmu mas eallibehtet, duođaid lea Ipmila árbmu. Bissot das nanusin!

₁₃Didjiide cealká dearvvuođaid Babylona searvegoddi mii lea válljejuvvon nugo diige, ja iežan bárdni Markus. ₁₄Dearvvahehket guhtet guimmiideattet ráhkisvuođa cummáin.

Ráfi didjiide buohkaide geat lehpet Kristusis.