1. Tessalonika 4

₁Earret dán, vieljažiiddán, mii bivdit ja ávžut din Hearrá Jesusa nammii: Dii lehpet oahppan mis mo galgabehtet vádjolit vai dohkkebehtet Ipmilii, ja nu dii maiddái vádjolehpet. Dii galgabehtet goit viggat ovdánit ain eambbo. ₂Almma dovdabehtet daid Hearrá Jesusa gohččumiid maid mii attiimet didjiide? ₃Ipmila dáhttu lea ahte dii dahkkojuvvobehtet bassin. Fasttášehket furrošeami! ₄Juohkehaš dis galgá oahppat doallat iežas rupmaša bassin ja atnit dan gudnis. ₅Allet atte dan doahttalit anistumiid ja himuid dego dahket báhkinat geat eai dovdda Ipmila. ₆Ii oktage oaččo dahkat vielljasis veriid iige beahttit su guđege áššis. Hearrá ráŋggášta buot dakkáriid, nugo mii ovdal juo leat cealkán ja nannosit duođaštan didjiide. ₇Ipmil ii leat rávkan min buhtismeahttunvuhtii, muhto bassivuhtii. ₈Dan dihte dat gii hilgu dán, ii hilggo olbmo, muhto Ipmila, guhte addá didjiide iežas Bassi Vuoiŋŋa.

₉Vieljalaš ráhkisvuođa birra mii eat dárbbaš čállit didjiide, danne go Ipmil ieš lea oahpahan din ráhkistit guhtet guimmiideattet. ₁₀Diihan ráhkistehpet buot vieljaid oppa Makedonias. Muhto mii ávžut din, vieljažiiddán, ovdánit das ain eambbo. ₁₁Atnet iežadet gudnin eallit ráfálaččat, dikšut iežadet áššiid ja bargat din iežadet gieđaiguin, nugo mii leat din gohččon. ₁₂Dalle dii vádjolehpet gutnálaččat maiddái olggobealolbmuid čalmmiin ehpetge dárbbaš bivdit guđesge veahki.

₁₃Mii dáhttut din diehtit, vieljažiiddán, mii dáhpáhuvvá daidda geat oađđájit jápmimii, amadet moraštit nugo earrásat geain ii leat doaivu. ₁₄Jos Jesus lea jápmán ja bajásčuožžilan, nugo mii oskut, de Ipmil Jesusa bokte galgá buktit jápmán olbmuid iežas lusa oktan suinna. ₁₅Dán mii cealkit didjiide Hearrá sátnin: Mii geat leat ain eallimin dalle go Hearrá boahtá, eat eisege joavdda ovdal daid geat leat oađđán jápmimii. ₁₆Hearrá ieš njiedjá almmis go gullo bajimuseŋgela ja Ipmila básona jietna, ja vuohččan čuožžilit dat geat leat jápmán Kristusis. ₁₇Mii geat leat eallimin ja leat ain dáppe, rohttejuvvot oktan singuin balvvaid siste áibmui Hearrá ovddal. Ja nu mii oažžut álelassii leat Hearráin. ₁₈De arvvosmahttet guhtet guimmiideattet dáid sániiguin!