1. Tessalonika 5

₁Muhto áiggiin ja bottuin mun in dárbbaš čállit didjiide, vieljažiiddán, ₂danne go dii diehtibehtet bures ahte Hearrá beaivi boahtá dego suola ihkku. ₃Aiddo go olbmot dadjet: “Ráfi ja oadjebasvuohta”, de heavahus deaivida sin fáhkkestaga dego ávttat áhpehis nissona, eaige sii eisege beasa báhtarussii. ₄Muhto dii, vieljažiiddán, ehpet vádjol seavdnjadasas, iige dat beaivi sáhte boahtit din badjelii fuomáškeahttá dego suola. ₅Dii buohkat lehpet čuovgasa ja beaivvi mánát. Mii eat leat ija eatge seavdnjadasa mánát. ₆Mii eat dasto oaččo oađđit nugo earrásat, muhto fertet gohcit ja bissut čielggusin. ₇Dat geat ođđet, ođđet ihkku; dat geat juhket, leat gárremiin ihkku. ₈Muhto mii geat gullat beaivái, fertet bissut čielggusin: Mii fertet gárvodit oskku ja ráhkisvuođa ruovdegárvvu ja váldit oaivesuodjin bestojumi doaivvu. ₉Ipmil ii leat mearridan min šaddat moari vuollái, muhto vuoitit bestojumi Hearrámet Jesus Kristusa bokte. ₁₀Son jámii min ovddas vai mii, leažžat dal gohcimin dahje oađđimin, ealášeimmet ovttas suinna. ₁₁Dan dihte arvvosmahttet ja nanosmahttet guhtet guimmiideattet, nugo dii maiddái dahkabehtet.

₁₂Mii bivdit din, vieljažiiddán, atnit árvvus daid geat din gaskkas rahčet, barget searvegotti njunušin ja rávvejit din. ₁₃Gudnejahttet sin ja atnet sin erenoamáš ráhkisin sin barggu dihte. Ellet ráfis guhtet guimmiideattetguin. ₁₄Mii ávžut din, vieljažiiddán: Cuiggodehket jeagohemiid, jeđđejehket hearddohuvvan olbmuid, atnet fuola heajuin ja lehket gierdavaččat buohkaiguin. ₁₅Váruhehket mávssaheames bahá baháin, muhto barget álelassii dahkat buriid guhtet guimmiidasadet ja buot olbmuide.

₁₆Lehket álelassii ilus. ₁₇Rohkadallet heaittekeahttá. ₁₈Giitet Ipmila juohke dilis. Dan Ipmil vuordá dis geat gullabehtet Kristus Jesusii. ₁₉Allet čáskat Vuoiŋŋa, ₂₀allet fuono profehtastallanattáldaga. ₂₁Geahččalehket buot ja dollet dan mii lea buorre. ₂₂Fasttášehket juohkelágán bahávuođa.

₂₃Vare ráfi Ipmil basuhivččii din ollásit ja várjalivččii din vuoiŋŋa, sielu ja rupmaša, nu ahte lehpet ollásat ja láitemeahttumat go min Hearrá Jesus Kristus boahtá. ₂₄Son guhte rávká din, lea oskkáldas ja doallá iežas lohpádusa.

₂₅Vieljažiiddán, rohkadallet min ovddas! ₂₆Dearvvahehket buot vieljaid bassi cummáin. ₂₇Hearrá nammii mun gohčun din lohkat dán girjji buot vieljaide.

₂₈Hearrámet Jesus Kristusa árbmu lehkos dinguin!