1. Timoteus 2

₁Mun neavvun din ovddimustá átnut, rohkadallat, doallat ovddasrohkadusaid ja giitit buot olbmuid ovddas, ₂gonagasaid ja buot daid ovddas geain lea váldi, vai mii oažžut eallit jaskes ja ráfálaš eallima, juohke dáfus vuoiggalaččat ja gutnálaččat. ₃Dákkár rohkadus lea vuoigat ja dohkálaš Ipmilii, min beastái, ₄guhte dáhttu ahte buot olbmot bestojuvvojit ja bohtet dovdat duohtavuođa. ₅Ipmil lea okta, ja okta lea gaskaolmmái Ipmila ja olbmuid gaskkas, olmmoš Kristus Jesus. ₆Son attii iežas lonisin buohkaid ovddas, duođaštussan Ipmila áigumušas, go áigi lei dievvan. ₇Dán sága sárdnideaddjin ja apostalin mun lean biddjojuvvon. Mun sártnun duođa, mun in gielis. Mun lean biddjojuvvon báhkiniid oahpaheaddjin, oahpahit sidjiide oskku ja duohtavuođa.

₈Mun dáhtun ahte go olbmát rohkadallet, de sii juohke sajis bajidit gieđaid rohkadussii buhtis mielain, almmá vaši ja eahpádusa haga. ₉Seammá láhkái mun dáhtun ahte nissoniid čikŋan lea gutnálaš, viivvolaš ja vuollegis eallin, eai bárggaldagat, gollečiŋat, bearralat eaige divrras biktasat, ₁₀muhto buorit dagut, nugo heive nissoniidda geat dovddastit bálvalit Ipmila.

₁₁Nisson galgá guldalit oahpahusa, jaskadit ja vuollegažžan. ₁₂Mun in suova ahte nisson oahpaha inge dan ahte son mearrida olbmá; son galgá eallit jaskatvuođas. ₁₃Adamhan sivdniduvvui vuohččan ja dasto Eva, ₁₄iige Adam beahtahallan, muhto nisson beahtahalai ja rihkui báhkkoma. ₁₅Muhto mánáid riegádahttin son bestojuvvo, jos eallá oskkus, ráhkisvuođas ja bassivuođas.