1. Timoteus 3

₁Dát sátni lea luohtehahtti: Gii viggá searvegotti geahčči doibmii, dat dáhttu deaŧalaš bargui. ₂Searvegotti geahčči galgá leat láitemeahttun, ovtta nissona boadnjá, juguheapme, mášolaš, gutnálaš, árvvas ja čeahppi oahpahit, ₃ii jugeš, ii riidui iige ruhtaváibmil, muhto láđis ja soabalaš. ₄Son galgá atnit buori fuola iežas bearrašis, šaddadit mánáidis gulolašvuhtii ja vádjolit gutnálaččat. ₅Jos muhtun ii máhte atnit fuola iežas bearrašis, de mo son dalle máhtášii atnit fuola Ipmila searvegottis? ₆Son ii oaččo leat jorgalan easkabáliid, amas čeavlut ja šaddat dubmejuvvot oktan beargalagain. ₇Sus galgá leat buorre beaggin maiddái olggobealolbmuid gaskkas, amas šaddat bilkun ja sorrot beargalaga gillii.

₈Maiddái searvegottibálvvát galget leat gutnálaččat ja rehálaččat. Sii eai oaččo leat jugešat eaige bivdit iežaset ávkki. ₉Sii galget dovdat oskku čiegusvuođa ja atnit oamedovdduset buhtisin. ₁₀Muhto maiddái sin galgá vuos geahččalit, ja go sii leat gávnnahuvvon láitemeahttumin, de sii ožžot bálvališgoahtit. ₁₁Seamma láhkái nissonat galget leat gutnálaččat, sii eai oaččo sárdnut sealggebealde. Sii galget leat juguheamit ja oskkáldasat juohke dáfus. ₁₂Searvegottibálvá galgá leat ovtta nissona boadnjá, ja son galgá atnit buori fuola mánáinis ja bearrašisttis. ₁₃Dat geat bálvalit bures, adnojuvvojit árvvus, ja sii sáhttet gulahit roahkkadit oskku Kristus Jesusii.

₁₄Dáid rávvagiid mun čálán dutnje, vaikko sávange fargga beassat boahtit du lusa. ₁₅Jos mun ádjánan boahtimis, don dál dieđát mo olmmoš galgá vádjolit Ipmila tempelis, ealli Ipmila searvegottis, mii lea duohtavuođa bázzi ja vuođđudus.

₁₆Mii dovddastit ahte min oskku bassi čiegusvuohta lea stuoris: