1. Timoteus 4

₁Bassi Vuoigŋa cealká čielgasit ahte maŋimuš áiggiid muhtumat hilgot oskku, čuovvulit čádjidahtti vuoiŋŋaid ja gullagohtet bahás vuoiŋŋaid oahpahusaid. ₂Sii luhttet guoktilaš gielástalliide geaid oamedovddus lea boaldinmearka. ₃Sii gildet olbmuid náitaleames ja borramis biepmuid maid Ipmil lea sivdnidan dan várás ahte dat geat oskot ja leat dovddiidan duohtavuođa, daid borret ja giitet Ipmila. ₄Buot maid Ipmil lea sivdnidan, lea buorre, iige das dárbbaš hilgut maidege, go dat váldojuvvo vuostá giitalusain. ₅Ipmila sátni ja rohkadus basuhit dan.

₆Go don oahpahat vieljaid dáinna lágiin, de leat Kristus Jesusa buorre bálvaleaddji ja maiddái ieš áhpásmuvat oskku sánis ja buori oahpahusas maid leat čuvvon. ₇Hilggo ipmilmeahttun cukcasiid ja joavdelas solžžaid. Hárjet iežat ipmilballui. ₈Rumašlaš hárjehallamis lea dušše uhccán ávki, muhto ipmilballu lea ávkkálaš juohke dáfus, ja das lea eallima lohpádus sihke dálá áigái ja dasa mii boahtá. ₉Dát sátni lea luohtehahtti ja juohke dáfus dohkálaš váldojuvvot vuostá. ₁₀Dan dihtehan mii rahčat ja gilvvohallat go leat bidjan doaivvu ealli Ipmilii guhte lea buot olbmuid beasti, erenoamážit daid geat oskot.

₁₁Neavvo ja oahpat dáinna lágiin. ₁₂Ale divtte ovttage badjelgeahččat du iežat nuorravuođa geažil. Leage oskkolaččaide ovdamearkan sárdnumis ja vádjolusas, ráhkisvuođas, oskkus ja buhtisvuođas. ₁₃Loga searvegoddái bassi čállagiid, rávve ja oahpat gitta dassážii go mun boađán. ₁₄Ale vajáldahte dan árpmuattáldaga mii dus lea ja mii addojuvvui dutnje profehtalaš sániid bokte, go vuorrasat bidje gieđaid du ala. ₁₅Váldde vuhtii dan, biso das, vai buohkat oidnet du ovdáneami.

₁₆Gozit iežat ja iežat oahpahusa. Biso dan siste! Dasgo go don dan dagat, de beasttát sihke iežat ja sin geat gullet du.