2. Muitalusaid girji 11

₁Go Rehabeam máhcai Jerusalemii, de son gohčui čoahkkái Juda ja Benjamina čearddain čuođigávccilogiduhát válljosoahteolbmá, geat galge soahtat Israeliin ja máhcahit gonagasválddi sutnje. ₂Muhto Hearrá sátni bođii Ipmila olbmái Šemajai: ₃“Cealkke Rehabeamii, Salomo bárdnái ja Juda gonagassii, ja buot israellaččaide geat ásset Judas ja Benjamina čerdii: ₄Ná cealká Hearrá: Allet mana soahtat vieljaideattetguin. Máhccet ruoktot, juohkehaš ruktosis, dasgo dat mii lea dáhpáhuvvan, lea mu dahku.” Sii gulle Hearrá sáni eaige mannan Jeroboama vuostá.

₅Rehabeam ráđđii Jerusalemis ja nannii máŋga Juda ja Benjamina guovllu gávpoga. ₆Son dagai ladnegávpogin Betlehema, Etama, Tekoa, ₇Bet-Sura, Soko, Adullama, ₈Gata, Mareša, Sifa, ₉Adorajima, Lakiša, Aseka, ₁₀Sora, Ajalona ja Hebrona. ₁₁Son dagai daid ladniid nanusin, bijai daidda oaivámuččaid ja sajustii daidda borramuš-, oljo- ja viidnevuorkkáid. ₁₂Son maid fuolahii juohke gávpogii galbbaid ja sáittiid. Go son nannii gávpogiid ladniid, de son nagodii ráđđet Juda ja Benjamina čearddaid guovlluid.

₁₃Báhpat ja levilaččat sirdásedje oppa Israelis Rehabeama beallái. ₁₄Levilaččat guđđe iežaset guohtuneatnamiid ja opmodagaid ja manne Judai ja Jerusalemii, danin go Jeroboam ja su bártnit eai suovvan sin bargat Hearrá báhppan. ₁₅Jeroboam lei ásahan iežas báhpaid oaffarbáikkiide bálvalit bohkká- ja vuoksáipmiliid maid son lei dahkan. ₁₆Buot Israela čearddain bohte dat geat dáhtto olles váimmus bálvalit Hearrá, Israela Ipmila. Sii bohte ovttas levilaččaiguin Jerusalemii, vai besse doppe oaffaruššat Hearrái, áhčiideaset Ipmilii. ₁₇Sin bokte Juda gonagasváldi nannejuvvui, ja golbma jagi sii ledje doarjjan Rehabeamii, Salomo bárdnái. Golbma jagi sii čuvvo Davida ja Salomo luottaid.

₁₈Rehabeam válddii áhkkán Mahalata gean áhčči lei Davida bárdni Jerimot ja eadni Abihajil, Isaja bártni Eliaba nieida. ₁₉Mahalat riegádahtii sutnje golbma bártni, Jeuša, Šemarja ja Sahama. ₂₀Rehabeam válddii áhkkán maiddái Maaka, Absaloma nieidda, gii riegádahtii sutnje Abia, Attaja, Sisa ja Šelomota. ₂₁Rehabeam ráhkistii Maaka, Absaloma nieidda, eambbo go buot eará áhkáidis ja liigeáhkáidis. Sus ledje gávccinuppelohkái áhká ja guhttalogi liigeáhká, ja sutnje riegádedje guoktelogigávcci bártni ja guhttalogi nieidda. ₂₂Rehabeam dagai Abia, Maaka bártni, vieljaidis hoavdan ja oaivámužžan, danin go son áiggui dahkat su gonagassan. ₂₃Son lei jierpmálaš ja bijai bártniidis Juda ja Benjamina ladnegávpogiidda, ja son attii sidjiide stuorra borramušrájuid ja válddii sidjiide ollu áhkáid.