2. Muitalusaid girji 13

₁Abia šattai Juda gonagassan Jeroboama gávccinuppelogát ráđđenjagi. ₂Son ráđđii Jerusalemis golbma jagi. Su eadni lei Mikaja, gibealaš Uriela nieida.

Abia ja Jeroboama gaskkas lei soahti. ₃Abia čohkkii njeallječuođiduhát válljosoahteolbmá soahteveaga ja álggahii soađi, ja Jeroboam soahttái suinna gávccičuođiduhát válljosoahteolbmáin. ₄Abia goarkŋui Semarajimvárrái mii lea Efraima várreeatnamis, ja sártnui ná: “Gullet mu, Jeroboam ja oppa Israel! ₅Diihan diehtibehtet ahte Hearrá, Israela Ipmil, lea addán Israela gonagasválddi Davidii ja su bártniide agálaš áigái, sáltelihtu bokte. ₆Muhto Jeroboam, Nebata bárdni, Davida bártni Salomo bálvaleaddji, stuimmáskii hearrás vuostá. ₇Su lusa čoagganedje šlárvvat ja skealmmat, ja sii ožžo fámu Rehabeama, Salomo bártni, badjel. Rehabeam lei nuorra ja njáigu iige nagodan vuostálastit sin. ₈Ja dál dii gáddibehtet bihtit Hearrá gonagasvuođas mii lea Davida bártniid gieđas, danin go dii lehpet nu eatnagat ja dis leat golleburrobáccit, maid Jeroboam lea duddjohan didjiide ipmilin. ₉Muhto dii lehpet ádján eret Hearrá báhpaid, Arona bártniid, ja levilaččaid, ja ásahan alcceseattet báhpaid eará álbmogiid láhkái. Gii beare lea boahtán vihahit iežas báhppan ja buktán nuorra vuovssá ja čieža viercca, de son lea šaddan eahpeipmiliid báhppan. ₁₀Muhto min Ipmil lea Hearrá, eatge mii leat hilgon su. Mis leat báhppan Arona bártnit, ja levilaččat doaimmahit tempelbálvalusa. ₁₁Sii oaffaruššet Hearrái boaldinoaffariid iđidiid ja eahkediid, boldet njálggahájat suovvasiid ja bidjet oadninláibbiid beavdái mii lea čielga gollis, ja cahkkehit eahkediid gollelámpájuolggi lámppáid. Mii doallat dan maid Hearrá, min Ipmil, lea gohččon, muhto dii lehpet hilgon su. ₁₂Gehččet, Ipmil lea minguin, son manná min njunnošis, ja su báhpat leat gergosat bossut dorvviid ja addit midjiide soahtanmearkka. Israellaččat, allet soađa Hearráin, áhčiideattet Ipmiliin! Dat ii menestuva didjiide.”

₁₃Dan botta Jeroboam lei bidjan soahteolbmáid joavkku garvit Juda olbmáid duogábeallái, nu ahte váldojoavku lei Juda olbmáid ovddas ja nubbi joavkugis sin duohken. ₁₄Go Juda olbmát fuobmájedje ahte vašálaččat fallehedje sin guovtti guovllus, de sii čurvo Hearrái, ja báhpat bosso dorvviid. ₁₅Juda olbmát bajidedje soahtečuorvasa, ja go sii čurvo, de Ipmil divttii Jeroboama ja oppa Israela vuoittáhallat Abiai ja Juda olbmáide. ₁₆Israellaččat báhtaredje, muhto Ipmil attii sin Juda olbmáid gihtii. ₁₇Abia ja su soahteolbmát godde sis eatnagiid, ja vihttačuođiduhát israellaš soahteolbmá gahčče. ₁₈Nu israellaččat vuoliduvvojedje. Juda čeardda olbmát ledje gievrrabut, danin go sii dorvvastedje Hearrái, áhčiideaset Ipmilii. ₁₉Abia doarridii Jeroboama ja válddii sus Betela, Ješana ja Efrona ja daid birasgávpogiid. ₂₀Jeroboam ii šat vuoimmáiduvvan Abia eallináiggis. Hearrá časkkii su, ja son jámii.

₂₁Muhto Abia váldi nanusmuvai. Son válddii alccesis njealljenuppelohkái áhká, ja sutnje riegádedje guoktelogiguokte bártni ja guhttanuppelohkái nieidda. ₂₂Mii muđui lea muitalit Abias, su daguin ja sániin, lea čállojuvvon profehta Iddo girjái.