2. Muitalusaid girji 17

₁Asa maŋŋil gonagassan šattai su bárdni Jošafat. Son nannii iežas saji Israela vuostá. ₂Son bijai soahteolbmáid buot Juda ladnegávpogiidda ja oaivámuččaid Judai ja daidda Efraima gávpogiidda maid su áhčči Asa lei váldán. ₃Hearrá lei Jošafatiin, danne go son vádjolii seammá geainnu maid su áhčči álggus lei vádjolan. Son ii bálvalan Baal-ipmiliid, ₄muhto bálvalii áhčis Ipmila ja doalai su báhkkomiid iige dahkan nugo israellaččat. ₅Hearrá nanosmahtii Jošafata gonagasválddi. Juda olbmot bukte sutnje attáldagaid, ja son oaččui stuorra riggodaga ja gudni. ₆Roahkkadit son vádjolii Hearrá geainnu, ja son jávkadii Judas oaffarbáikkiid ja Ašera-čuolddaid.

₇Goalmmát ráđđenjagistis Jošafat vuolggahii muhtun stuorráidis Juda gávpogiidda oahpahit. Sii ledje Ben-Hajil, Obadja, Sakarja, Netanel ja Mika. ₈Ovttas singuin son vuolggahii levilaččaid Šemaja, Netanja, Sebadja, Asaela, Šemiramota, Jonatana, Adonia ja Tobia, ja velá báhpaid Elišama ja Jorama. ₉Go sii oahpahedje Judas, de sis lei mielde Hearrá láhkagirji. Sii johte buot Juda gávpogiin ja oahpahedje álbmoga.

₁₀Juda birasálbmogiin šattai dakkár Hearrá ballu ahte dat eai duostan soahtat Jošafatiin. ₁₁Filistalaččat bukte Jošafatii attáldagaid ja vearrun silbba. Arabialaččat bukte sutnje smávvaomiid, čiežaduhát čiežačuođi viercca ja čiežaduhát čiežačuođi bohká. ₁₂Jošafat šattai ain fámoleabbon, ja son huksii Judai ladniid ja vuorkágávpogiid. ₁₃Sus ledje jođus stuorra ladnebarggut Juda gávpogiin, ja Jerusalemis sus lei jálus soahteveahka ₁₄mii lei ordnejuvvon juhkosiidda sogaid mielde. Judas ledje alimus oaivámužžan Adna geas ledje golbmačuođiduhát soahteolbmá, ₁₅Johanan geas ledje guoktečuođigávccilogiduhát soahteolbmá, ₁₆ja Amasja, Sikri bárdni, gii bálvalii Hearrá eaktodáhtolaččat guovttečuođiduhát soahteolbmá oaivámužžan. ₁₇Benjamina čearddas lei Eljada, rohkkes soahteolmmái. Sus ledje guoktečuođiduhát olbmá geaid vearjun lei dávgi ja galba. ₁₈Su lassin lei Josabad geas ledje čuođigávccilogiduhát olbmá gearggusin soahtat. ₁₉Ná ollu gonagasa bálvalusas ledje soahteolbmát, ja dasa lassin vel dat geaid gonagas lei bidjan ladnegávpogiidda miehtá Juda.