2. Muitalusaid girji 27

₁Jotam lei guoktelogiviđajahkásaš go šattai gonagassan, ja son ráđđii Jerusalemis guoktenuppelohkái jagi. Su eadni lei Jeruša, Sadoka nieida. ₂Jotam dagai dan mii lea riekta Hearrá čalmmiin, aiddo nugo su áhčči Ussia lei dahkan, muhto son ii bahkken áhčis láhkái Hearrá tempelii oaffaruššat. Álbmot goit meannudii ain boasttoláhkái. ₃Jotam huksii Hearrá tempela Bajit poartta ja nannii Ofela muvrra. ₄Son huksii gávpogiid Juda várreeatnamii, ja vuovdeguovlluide son huksii ladniid ja toartnaid. ₅Son soađai ammonlaččaid gonagasain ja vuittii su, ja ammonlaččat šadde dan jagi máksit sutnje čuođi taleantta silbba, logiduhát kora nisu ja logiduhát kora bivggi. Seammá ollu ammonlaččat mákse sutnje maiddái nuppi ja goalmmát jagi. ₆Jotam šattai fámolaš stivrejeaddjin, danne go son álo vádjolii Hearrá, Ipmilis, geainnu.

₇Mii muđui lea muitalit Jotamis, buot su sođiin ja eará doaimmain, lea čállojuvvon Israela ja Juda gonagasaid girjái. ₈Son lei guoktelogiviđajahkásaš go šattai gonagassan, ja son ráđđii Jerusalemis guhttanuppelohkái jagi. ₉Jotam manai vuoiŋŋadit áhčiidis lusa, ja son hávdáduvvui Davida gávpogii. Su maŋŋil gonagassan šattai su bárdni Ahas.