2. Muitalusaid girji 7

₁Go Salomo lei geargan rohkadallamis, de almmis časkkii dolla mii lovttii boaldinoaffara ja njuovvanoaffariid, ja Hearrá hearvásvuohta devddii tempela. ₂Báhpat eai sáhttán mannat tempelii, danin go dan dievva lei Hearrá hearvásvuohta. ₃Go israellaččat geat ledje čuožžumin geađgeguolbbis, oidne dola ja oidne Hearrá hearvásvuođa njiedjamin tempela badjelii, de sii čippostedje eatnamii muođuid ja rohkadalle ja giite Hearrá: “Son lea buorre, su árbmugasvuohta bistá agálaččat.”

₄De gonagas ja oppa álbmot oaffarušše njuovvanoaffariid Hearrái. ₅Gonagas Salomo oaffarušai guoktelogiguokteduhát vuovssá ja čuođiguoktelogiduhát sávzza. Nu gonagas ja oppa álbmot vihahedje Ipmila tempela. ₆Báhpat čužžo bálvalussajiineaset, nu maiddái levilaččat čuojanasat gieđas. Gonagas David lei duddjohan daid dan várás ahte sii besset giitit Hearrá dáid sániiguin: “Su árbmugasvuohta bistá agálaččat.” Sin buohta báhpat bosso dorvve, ja ovdašiljus čužžo buot israellaččat. ₇Salomo vihahii Hearrá tempela ovdašilju gaskaoasi, gos son oaffarušai boaldinoaffariid ja searvevuođaoaffariid buoidebihtáid. Bronsaáltár maid Salomo lei duddjohan ii geassán buot boaldinoaffariid ja borramušoaffariid ja buoidebihtáid.

₈De Salomo doalai basiid čieža beaivvi oppa Israeliin. Hui ollu olbmot ledje boahtán oppa eatnamis, davvin gitta Lebo-Hamata rájes ja lullin gitta Egyptajogaža rájes. ₉Go sii ledje ávvudan áltára vihaheami čieža beaivvi ja basiid čieža beaivvi, de gávccát beaivvi sii dolle bassi čoakkalmasa. ₁₀Čihččet mánu guoktelogigoalmmát beaivvi gonagas luittii álbmoga vuolgit, ja buohkat vulge ruktoseaset, ilus ja arvvohis mielas buot dan buori dihte maid Hearrá lei dahkan Davidii, Salomoi ja álbmogasas Israelii.

₁₁Salomo lei dal gárvvistan Hearrá tempela ja gonagasa šloahta. Sutnje lei menestuvvan dahkat buot maid son lei áigon dahkat Hearrá tempelii ja iežas šlohttii. ₁₂Dalle Hearrá almmustuvai sutnje ihkku ja celkkii: Mun lean gullan du rohkadusa ja lean váldán dán tempela báikin, gos munnje oaffaruššojuvvo. ₁₃Jos mun muhtumin dahpan almmi nu ahte ii boađe arvi, jos mun gohčun rásselohkuid loaktit eatnama dahje jos mun vuolggahan rohttudávdda iežan álbmoga gaskii ₁₄– ja jos dalle mu álbmot maid mun lean váldán oapminan, vuollána ja rohkadallá, jorgala mu beallái ja hilgu bahás geainnuidis, de mun gulan dan albmái, attán dasa suttuid ándagassii ja dálkkodan dan eatnama. ₁₅Dál mu čalmmit leat rabas ja mu bealjit gullet rohkadusaid maid sii rohkadallet dán báikkis. ₁₆Mun lean válljen ja basuhan dán tempela ja dahkan dan iežan nama agálaš ássansadjin. Mu čalmmit leat álo jorgaluvvon dan guvlui, ja dat lea lahka mu váimmu. ₁₇Jos don vádjolat mu muođuid ovddas nugo du áhčči David, jos dagat buot maid mun lean gohččon du dahkat, ja doalat mu lágaid ja báhkkomiid, ₁₈de mun bisuhan du gonagasvuođa, nugo mun lohpidin áhččásat Davidii. Munhan celken sutnje ahte álo lea su soga olmmái Israela ráđđejeaddjin. ₁₉Muhto jos dii jorgalehpet eret ja hilgubehtet mu lágaid ja báhkkomiid, jos bálvališgoahtibehtet eará ipmiliid ja luoitádehpet daid ovdii, ₂₀de mun rohtten din eret iežan eatnamis maid adden didjiide. Ja tempela maid mun lean basuhan iežan nammii, mun hilggun ja divttán šaddat bilkun ja hiddjádussan buot álbmogiid gaskkas. ₂₁Juohkehaš gii manná meaddel dán báikki gokko ovdal lei nu stuorra ja čáppa tempel, soasiha ja jearrá: “Manin Hearrá lea dahkan ná dán eatnamii ja dán tempelii?” ₂₂Son oažžu dán vástádusa: “Danin go israellaččat hilgo Hearrá, áhčiideaset Ipmila, gii buvttii sin Egyptas, ja dorvvastedje eará ipmiliidda, rohkadalle ja bálvaledje daid. Dan dihte son divttii buot dán bahá deaividit sin.”