2. Korinta 4

₁Go Ipmil árpmustis lea addán midjiide dán bálvalusdoaimma, de mii eat hearddohuva. ₂Mii leat hilgon buot dan mii lea suollemas ja heahpatlaš, eatge vádjol gávvilvuođas eatge bonja Ipmila sáni, muhto buktit duohtavuođa albmosii ja doaivut ahte Ipmila muođuid ovddas juohkehaš iežas oamedovddus vihkkedallá min. ₃Jos min evangelium lea čihkosis, de dat lea čihkosis daidda geat šaddet gáđohussii. ₄Dasgo dán máilmmi ipmil lea čalmmehuhttán eahpeoskkolaččaid miela amaset oaidnit Kristusa hearvásvuođa evangeliuma čuovgga, su guhte lea Ipmila govva. ₅Miihan eat sárdnit iežamet, muhto Jesus Kristusa: Jesus lea Hearrá, ja son lea vuolggahan min bálvalit din. ₆Ipmil guhte celkkii: “Báitos čuovga seavdnjadasas”, čuvgii ieš min váimmu. Ná olbmot ohppet dovdat Ipmila hearvásvuođa mii báitá Kristusa muođuin, ja dat lávdada iežas čuovgga.

₇Muhto dát dávvir mis lea láirálihtis, vai olbmot oidnet ahte dat stuorra fápmu lea Ipmila iige boađe mis alddámet. ₈Juohke láhkái mii áŧestuvvat, muhto eat arvvahuva, mii leat ráđeheamit, muhto eat cohkko, ₉mii doarrádallojuvvot, muhto eat hilgojuvvo, mii njeidojuvvot eatnamii, muhto eat dušša. ₁₀Álelassii mii guoddit Jesusa jápmima rupmašisttámet, vai maiddái Jesusa eallin boahtá min rupmašis albmosii. ₁₁Mii gal leat eallimin, muhto álelassii mii addojuvvot jápmimii Jesusa dihte, vai maiddái Jesusa eallin boahtá albmosii min jámolaš rupmašis.

₁₂Min siste nappo bargá jápmin, muhto din siste eallin. ₁₃Mis lea seammá oskku vuoigŋa go dat mii lea čállagis: Mun oskkun, danne mun sártnun. Mii maiddái oskut, ja danne mii sárdnut. ₁₄Miihan diehtit ahte son gii čuoččáldahtii jábmiid luhtte Hearrá Jesusa, čuoččáldahttá minge dalle go Jesus boahtá ja buktá min oktan dinguin iežas ovdii. ₁₅Buot dát dáhpáhuvvá din dihte, vai árbmu šaddá valljugasabun ja gohccáha ain eanebuin giitevašvuođa Ipmila gudnin.

₁₆Danne mii eat arvvahuva. Vaikko min olgguldas olmmoš roahppána, de min siskkáldas olmmoš almmatge ođasmuvvá beaivvis beaivái. ₁₇Dat áŧestusat mat min deaividit, bistet oanehis bottu ja leat geahppasat, ja dat buktet midjiide valljugasat mearehis stuorra hearvásvuođa mii ii noga. ₁₈Mii eat geahča dasa mii lea oinnolaš, muhto oaidnemeahttumii, danne go oinnolaš lea vássevaš, muhto oaidnemeahttun lea agálaš.