2. Korinta 3

₁Riepmatgo mii fas rámidit iežamet? Dahje dárbbašitgo mii máidnunreivviid din várás dahje dis, nugo muhtumat? ₂Dii ieža lehpet min máidnunreive, mii lea čállojuvvon din váibmui, vai buot olbmot besset oaidnit ja lohkat dan. ₃Lea čielggas ahte dii lehpet Kristusa girji, maid mii leat čállán. Dat ii leat čállojuvvon bleahkain, muhto ealli Ipmila Vuoiŋŋain, ii geađgetávvaliidda, muhto váimmuide, távvaliidda mat leat oažži ja várra.

₄Dákkár luohttámuš Ipmilii mis lea Kristusa bokte. ₅Mun in oaivvil ahte mii ieža dohkkešeimmet jurddašit maidege dahje ahte min máhttu boađášii mis alddámet. Min dohkálašvuohta boahtá Ipmilis, ₆guhte dagai min dohkálažžan bálvalit ođđa lihtu maid ii ráđđe bustávva, muhto Vuoigŋa. Dasgo bustávva goddá, muhto Vuoigŋa dahká eallin.

₇Juo jápmima bálvalus, man njuolggadusat ledje čullojuvvon geađgetávvaliidda, almmustuvai dakkár hearvásvuođas ahte israellaččat eai duddon geahččat Mosesa muođuide. Ja liikká su muođuid hearvásvuohta lei nohkavaš. ₈Man ollu stuorit hearvásvuohta dalle birastahttá Vuoiŋŋa bálvalusa! ₉Jos duođaid dubmehusa bálvalusas lei nu ollu hearvásvuohta, de vanhurskkisvuođa bálvalusas lea ollu stuorit hearvásvuohta. ₁₀Dan hearvásvuohta lea nu badjelmearálaš ahte dan ektui dat mii ovdal báittii hearvásin, lea massán iežas hearvásvuođa. ₁₁Dasgo jos dat mii lea nohkavaš, báitá hearvásit, de man ollu hearváseappot dalle báitá dat mii lea bistevaš!

₁₂Go mis nappo lea dakkár doaivu, de mis lea stuorra roahkkatvuohta ₁₃ eatge mii daga nugo Moses: Son bijai liinni muođuid ovdii, amaset israellaččat oaidnit ahte dat mii lei jávkamin, nogai. ₁₄Muhto sin miella buošui. Dasgo dat liidni lea ain otná beaivvi govččasin go sii lohket boares lihtu girjjiid, iige dat váldojuvvo eret, danin go dat váldojuvvo eret Kristusa bokte. ₁₅Velá otná beaivvige sin váimmu alde lea govččas, go sii lohket Mosesa lága. ₁₆Muhto go sii jorgalit Hearrá beallái, de govččas váldojuvvo eret. ₁₇Hearrá lea Vuoigŋa, ja gos Hearrá Vuoigŋa lea, doppe lea friddjavuohta. ₁₈Mii, geain ii leat govččas muođuid ovddas, geahčadit Hearrá hearvásvuođa dego speadjalis, ja mii nuppástuvvat seammá hearvásvuođa láhkásažžan, hearvásvuođas hearvásvuhtii. Dán dahká Hearrá, Vuoigŋa.