2. Korinta 6

₁Ipmila bargoguoibmin mii neavvut din amadet duššás váldit vuostá Ipmila árpmu. ₂Dasgo son cealká: Mun gullen du rohkosa rivttes áigái ja veahkehin du bestojumi beaivvi. Aiddo dál lea vuogas áigi, aiddo dál lea bestojumi beaivi.

₃Mii eat áiggo vearránahttit olbmuid mange dáfus, amas min bálvalus láitojuvvot. ₄Juohke láhkái mii čájehit iežamet Ipmila bálvaleaddjin: Mii gierdat sitkadit váttisvuođaid, heđiid ja áŧestusaid, ₅spihččemiid, fáŋgavuođaid, stuimmiid, rahčamušaid, idjagohcimiid ja fástudemiid. ₆Min miella lea buhtis, mis lea diehtu, gierdavašvuohta ja ustitlašvuohta, mis lea Bassi Vuoigŋa, duohta ráhkisvuohta, ₇duohtavuođa sátni ja Ipmila fápmu, mis lea vearjun vanhurskkisvuođa galba ja miehkki. ₈Mii gudnejahttojuvvot ja fudnojuvvot, mis lea heajos beaggin ja mii rámiduvvot. Mii adnojuvvot fillejeaddjin, vaikko mii sárdnut duođa. ₉Mii leat dovdameahttumat, muhto almmatge measta menddo oahppásat. Mii leat lahka jápmima, muhto eallit, illastuvvon eatge dattetge goddojuvvon, ₁₀ morašlaččat, muhto álo ilus. Mii leat geafit, muhto riggudahttit eatnagiid; mis ii leat mihkkege, muhto mii oamastit dattetge buot.

₁₁Mii leat sárdnon didjiide rahpasit, korintalaččat, min váibmu lea luomus, ₁₂das lea didjiide sadji, muhto din váibmu lea gárži. ₁₃Bálkkašehket min – mun sártnun nugo mánáidasan – lehket maiddái dii rahpasat!

₁₄Allet searvva eahpeoskkolaččaiguin seammá geassá vuollái. Maid searvevuođaid vanhurskkisvuohta atná lágahisvuođain, maid čuovggas seavdnjadasain? ₁₅Mo Kristus ja Beliar sáhttiba leat ovtta oaivilis? Mii ovttastahttá oskkolačča eahpeoskkolaččain? ₁₆Mo eahpeipmilat sohpet Ipmila tempelii? Miihan leat ealli Ipmila tempel, nugo Ipmil lea cealkán: Mun ásan sin gaskii ja vádjolan singuin; mun lean sin Ipmil, ja sii leat mu álbmot. ₁₇Danne Hearrá cealká: Vulget eret sin searvvis ja sierranehket sis, allet guoskkat maidege buhtismeahttumiid. Dalle mun válddán din vuostá ₁₈ja lean din áhčči, ja dii lehpet mu bártnit ja nieiddat, cealká Hearrá, Buotveagalaš.