2. Korinta 9

₁In mun rievtti mielde dárbbaš čállit didjiide bassi olbmuid veahkeheami hárrái. ₂Mun dieđán man geargadat dii lehpet veahkehit. Dan dihte mun lean rábmon din makedonialaččaide ja muitalan ahte dii Akaias leiddet gárvásat juo diibmá. Din áŋgirvuohta lea movttiidahttán eatnagiid maiddái dáppe. ₃Mun vuolggahan dál din lusa vieljaid, vai beasan leat vissis dasa ahte in leat rábmon din dán áššis duššás, muhto ahte dii lehpet gárvásat, nugo lean dadjan. ₄Muđui, jos muhtun makedonialaččat bohtet mu mielde ja oidnet ahte dii ehpet leat ráhkkanan, de dat šaddá midjiide heahpadin, ja áinnas vel didjiide, go mii leat luohttán didjiide. ₅Dan dihte mun atnen dárbbašlažžan bivdit vieljaid vuolgit din lusa ovdal min ja gárvvistit attáldaga maid leiddet lohpidan, vai dat livččii gárvvis addojuvvot, ja čájehivččii ahte dii addibehtet árvasit ehpetge hánástala.

₆Muitet: Dat gii gilvá hátnásit, láddje hátnásit, ja dat gii gilvá valljugasat, láddje valljugasat. ₇Addos juohkehaš nugo váimmustis lea mearridan, allos vuostehágolaččat ja bákkus, danin go Ipmil ráhkista ilolaš addi. ₈Son nagoda addit didjiide árvasit buot buriid, vai dis álelassii ja juohke dáfus lea buot maid dárbbašehpet, ja dii sáhttibehtet dahkat valljugasat buot buriid. ₉Čállojuvvonhan lea: Son gilvá, son addá gefiide, su vanhurskkisvuohta bissu agálašvuhtii. ₁₀Son guhte addá gilvái gilvagiid ja láibbi borrat, son addá maiddái didjiide gilvagiid ja lassánahttá daid, ja son lasiha din vanhurskkisvuođa šattuid. ₁₁Dii oažžubehtet juohke dáfus rikkisvuođa ja sáhttibehtet addit árvasit ja valljugasat. Nu min bargu duddjo giitalusa Ipmilii. ₁₂Dán bálvalusa ollašuhttin ii veahket dušše bassi olbmuid dárbbuid, muhto maiddái oažžu ain eanebuid giitit Ipmila. ₁₃Go dii oskkáldasat lehpet ollašuhttán dán bálvalusbarggu, de sii máidnot Ipmila das ahte dii ná lehpet dovddastan gulolašvuođa Kristusa evangeliumii ja árvasit juogadehpet singuin ja buot earáiguin. ₁₄Ná sii maid rohkadallet din ovddas ja ohcalit din Ipmila valljugas árpmu dihte maid son lea čájehan didjiide. ₁₅Giittus lehkos Ipmilii su cealkemeahttun attáldagas!