2. Gonagasaid girji 13

₁Juda gonagasa Joaša, Ahasja bártni, guoktelogigoalmmát ráđđenjagi šattai Israela gonagassan Joahas, Jehu bárdni. Son ráđđii Samarias čiežanuppelohkái jagi. ₂Son dagai dan mii lea bahá Hearrá čalmmiin ja bisui dahkamis seammá suttuid maiguin Jeroboam, Nebata bárdni, lei fillen Israela suddudit. Daid suttuid son ii heaitán dahkamis. ₃Dalle Hearrá moaráhuvai Israelii, ja gearddis geardái son attii sin Arama gonagasa Hasaela ja su bártni Ben-Hadada gihtii. ₄Muhto Joahas rohkadalai Hearrá, ja Hearrá gulai su, dasgo son oinnii mo Arama gonagas áŧestii Israela. ₅Hearrá attii Israelii beasti, ja nu sii besse aramealaččaid gieđas ja sáhtte eallit ráfis nugo ovdalge. ₆Dattetge sii eai gáidan dain suttuin maiguin Jeroboama sohka lei fillen israellaččaid suddudit. Daid suttuid sii ain dahke ja bisuhedje ašeračuolddage Samarias. ₇Joahassii eai báhcán šat eambbo go vihttalogi riidejeaddji, logit vovnnat ja logiduhát vázzi soahteolbmá. Arama gonagas lei duššadan su soahteveaga ja duolbman dan julggiid vuollái dego gavjja.

₈Mii muđui lea muitalit Joahasas ja buot su olahusain, lea čállojuvvon Israela gonagasaid muitalusaid girjái. ₉Joahas manai vuoiŋŋadit áhčiidis lusa ja hávdáduvvui Samariai. Su maŋŋil šattai gonagassan su bárdni Joaš.

₁₀Juda gonagasa Joaša golbmalogičihččet ráđđenjagi Israela gonagassan šattai Joaš, Joahasa bárdni. Son ráđđii Samarias guhttanuppelohkái jagi. ₁₁Son dagai dan mii lea bahá Hearrá čalmmiin ja bisui dahkamis daid suttuid maiguin Jeroboam, Nebata bárdni, lei fillen Israela suddudit. Daid suttuid son ii heaitán dahkamis.

₁₂Mii muđui lea muitalit Joašis ja su olahusain ja das mo son soađai Juda gonagasain Amasjain, lea čállojuvvon Israela gonagasaid muitalusaid girjái. ₁₃Joaš manai vuoiŋŋadit áhčiidis lusa, ja su truvdnui čohkánii Jeroboam. Joaš hávdáduvvui Samariai Israela gonagasaid báldii.

₁₄Go Eliša buozai jápmindávdda, de Israela gonagas Joaš bođii su lusa. Son gopmulii čieru su badjel ja čuorvvui: “Áhčážan, áhčážan! Israela soahtevovnnat ja riidejeaddjit!” ₁₅Eliša dajai dalle sutnje: “Viečča dávggi ja njuolaid.” Go Israela gonagas lei viežžan dávggi ja njuolaid, ₁₆de Eliša dajai sutnje: “Váldde dávggi gihtii.” Gonagas válddi dávggi gihtii, ja Eliša bijai iežas gieđaid gonagasa gieđaid ala. ₁₇De son dajai: “Rabas nuorttabeale ihkkona.” Son rabastii dan, ja Eliša dajai: “Báže njuola.” Gonagas bážii. De Eliša dajai: “Hearrá vuoitonjuolla, njuolla mii beastá Aramis! Afekis don časkkát aramealaččaid ja duššadat sin.” ₁₈Dasto son dajai: “Váldde njuolaid.” Israela gonagas válddii njuolaid, ja Eliša dajai sutnje: “Časkke njuolaid eatnamii.” Gonagas časkkii golmma háve, muhto de son heittii. ₁₉Ipmila olmmái moaráhuvai sutnje ja dajai: “Don livččet galgan časkit viđa dahje guđa háve! Dalle don livččet časkán aramealaččaid oalát. Muhto dál don časkkát aramealaččaid dušše golmma háve.” ₂₀Nu Eliša jámii ja hávdáduvvui.

Moablaččaid rievvárjoavkkut bohte dán eatnamii juohke jagi. ₂₁Oktii go olbmot ledje hávdádeamen muhtun olbmá, de sii áice speadjárjoavkku. Sii bálkestedje olbmá Eliša hávdái ja báhtaredje. Muhto go jábmi guoskkai Eliša dávttiide, de son eallái ja čuožžilii.

₂₂Arama gonagas Hasael áŧestii Israela nu guhká go Joahas elii. ₂₃Muhto Hearrá lei sidjiide árbmugas ja árpmihii sin. Dan lihtu dihte maid son lei dahkan Abrahamiin, Isakiin ja Jakobiin, son ii dáhtton duššadit sin. Son jorgalii sin beallái iige velá suhppen sin eret muođuidis ovddas. ₂₄Go Arama gonagas Hasael jámii, de su maŋŋil šattai gonagassan su bárdni Ben-Hadad. ₂₅Joaš, Joahasa bárdni, válddii Hasaela bártnis Ben-Hadadis gávpogiid maid Hasael lei váldán soađis su áhčis Joahasas. Golmma háve Joaš časkkii Ben-Hadada ja válddii gávpogiid ruoktot Israelii.