2. Gonagasaid girji 2

₁Dan beaivvi go Hearrá áiggui váldit Elia garra riđus albmái, de Elia ja Eliša leigga vuolgimin Gilgalis. ₂Elia dajai Elišai: “Báze don dása. Hearrá lea gohččon mu mannat Betelii.” Muhto Eliša vástidii: “Nu duohta go Hearrá eallá ja nu duohta go don ealát: Mun in guođe du.” De soai vulggiiga Betelii. ₃Betelis bohte Eliša ovddal profehtajoavku, ja sii jerre sus: “Dieđátgo don ahte Hearrá váldá odne du hearrá eret?” Son vástidii: “De dieđán. Orrot jávohaga!”

₄Elia dajai fas Elišai: “Báze don dása. Hearrá lea gohččon mu mannat Jerikoi.” Muhto son vástidii: “Nu duohta go Hearrá eallá ja nu duohta go don ealát: Mun in guođe du.” De soai vulggiiga Jerikoi. ₅Jerikos bohte Eliša ovddal profehtajoavku, ja sii jerre sus: “Dieđátgo don ahte Hearrá váldá odne du hearrá eret?” Son vástidii: “De dieđán. Orrot jávohaga!”

₆Ohpit Elia dajai Elišai: “Báze don dása. Hearrá lea gohččon mu mannat Jordangáddái.” Eliša vástidii: “Nu duohta go Hearrá eallá ja nu duohta go don ealát: Mun in guođe du.” De soai manaiga fárrolagaid, ₇ja vihttalogis profehtajoavkkus čuovvuledje sudno. Go soai olliiga Jordangáddái, de profehtajoavku orustedje dobbelažžii. ₈Elia válddii iežas oalgebiktasa, giesai dan čoahkkái ja huškkastii dainna čáhcái. Dalle čáhci juohkásii guovdat goappašiid beliide, ja soai sáhtiiga vázzit rastá goikása mielde. ₉Go soai leigga mannamin rastá, de Elia dajai Elišai: “Ánut maid dáhtošit mu dahkat dutnje, ovdal go mun váldojuvvon eret du luhtte.” Eliša dajai: “Divtte guovttegeardásaš oasi iežat vuoiŋŋas boahtit munnje.” ₁₀Elia dajai: “Lossat lea du átnumuš. Muhto jos oainnát mo mun váldojuvvon eret du luhtte, de šaddos nugo ánuhat, muđui ii.” ₁₁Go soai vácciiga ja ságastalaiga, de fáhkka dasa ihte dollavovnnat ja dollaheasttat. Dat earuhedje sudno goabbat guoimmisteaskka, ja Elia loktanii garra riđus albmái.

₁₂Go Eliša oinnii dan, de son čuorvvui: “Áhčážan, áhčážan! Israela vovnnat ja riidejeaddjit!” Eliša ii šat oaidnán Elia, ja son válddii biktasiiddis ja gaikkihii daid guovtti bihttái. ₁₃Son válddii eatnamis oalgebiktasa mii lei gahččan Elias, ja vulggii ruovttoluotta. Go son bođii Jordangáddái, ₁₄de son válddii oalgebiktasa mii lei gahččan Elias, huškkastii dainna čáhcái ja čuorvvui: “Gos lea Hearrá, Elia Ipmil?” Go Eliša ná huškkastii čáhcái, de dat juohkásii guovdat goappašiid beliide, ja son sáhtii vázzit rastá. ₁₅Profehtat geat ledje boahtán Jerikos, ledje dobbelaččas. Go sii oidne maid Eliša dagai, de sii dadje: “Dál Elia vuoigŋa lea boahtán Elišai.” Sii bohte su ovddal, bálkestahtte eatnamii su ovdii ₁₆ja dadje: “Dás leat vihttalogi gievrras olbmá. Divtte min vuolgit ohcat du hearrá. Hearrá vuoigŋa sáhttá leat lokten ja suhppen su muhtin várrái dahje leahkái.” Muhto Eliša dajai: “Allet ohcagoađe duššás.” ₁₇Muhto go sii eai heaitán vuorjamis, de Eliša dolkkai ja dajai: “Na mannet dalle.” Vihttalogi olbmá vulge ja ohce Elia golbma beaivvi, muhto eai gávdnan. ₁₈Sii máhcce Eliša lusa gii lei ain Jerikos, ja son dajai sidjiide: “Almma mun dadjen ahte ii gánnát vuolgit?”

₁₉Jeriko olbmát dadje Elišai: “Nugo don oainnát, hearrá, de gávpot lea vuogas báikkis. Muhto čáhci lea headju, ja eanan gillá ovdal áiggi riegádahttimiin.” ₂₀Dalle Eliša dajai: “Vižžet munnje ođđa lihti ja bidjet dasa sálttiid.” Lihtti buktojuvvui sutnje. ₂₁De son manai ájagáddái, suhppii sálttiid ádjagii ja dajai: “Ná cealká Hearrá: Mun dearvvasmahtán dán čázi. Dat ii šat dagat jápmima iige ovdal áiggi riegádahttima.” ₂₂Geavai aiddo nugo Eliša lei dadjan, ja čáhci lea leamaš buhtis dan rájes.

₂₃Eliša vulggii doppe Betelii. Go son lei goargŋumin fieltti, de gávpogis bohte uhca bártnážat geat bilkidišgohte su. Sii čurvo: “Goarkŋo deike, báljesoaivi! Goarkŋo deike, báljesoaivi!” ₂₄Eliša jorggihii geahččat sidjiide ja garuhii sin Hearrá nammii. Dalle vuovddis bohte guokte njiŋŋelas guovžža, ja dat gaikkodedje jámas njealljelogiguokte gándda.

₂₅Betelis Eliša manai Karmelvárrái ja máhcai doppe Samariai.