2. Gonagasaid girji 3

₁Joram, Ahaba bárdni, šattai Samaria gávpogis Israela gonagassan Juda gonagasa Jošafata gávccinuppelogát ráđđenjagi. Son ráđđii guoktenuppelohkái jagi. ₂Son dagai dan mii lea bahá Hearrá čalmmiin, ii dattetge nu ollu go su áhčči ja eadni. Son jávkadii Baal-čuoldda maid su áhčči lei dagahan. ₃Dattetge son bisui dahkamis daid suttuid maiguin Jeroboam, Nebata bárdni, lei fillen israellaččaid suddudit. Daid son ii hilgon.

₄Mešas, Moaba gonagasas, ledje ollu sávzzat, ja son lei geatnegahttojuvvon addit mearreáiggiid Israela gonagassii čuođiduhát lábbá ja čuođiduhát beaskitkeahtes viercca. ₅Muhto go Ahab jámii, de Moaba gonagas stuimmáskii iige šat dovddastan Israela gonagasa iežas hearrán. ₆Gonagas Joram vulggii dalán Samarias ja geahčadii oppa Israela soahteveaga. ₇Son bijai sáni Juda gonagassii Jošafatii: “Moaba gonagas lea stuibmidišgoahtán muinna. Vuolggátgo don muinna soahtat Moabiin?” Son vástidii: “Nu mun nugo donge, nu mu álbmot nugo du álbmotge, nu mu heasttat nugo du heasttatge. ₈Joram jearai vel: Guđe geainnu moai fallehetne?” Joram vástidii: “Dan geainnu mii manná Edoma meahci čađa.”

₉Israela ja Juda gonagasat vulggiiga johtui oktan Edoma gonagasain. Go sii ledje leamaš jođus čieža beaivvi, de sii eai šat gávdnan čázi soahtevehkii eaige omiidasaset. ₁₀Israela gonagas dajai: “Vuoi min! Hearrá lea gohččon čoahkkái min golbma gonagasa, vai beassá addit min moablaččaid gihtii.” ₁₁Muhto Jošafat jearai: “Iigo dáppe leat oktage Hearrá profehta, vai mii beassat jearrat ráđi Hearrás?” Dalle muhtun Israela gonagasa soahteolmmái dajai: “Lea dáppe Eliša, Šafata bárdni, son gii lei Elia oskkáldas bálvaleaddji.” ₁₂“Sus mii oažžut Hearrá sáni”, Jošafat dajai ja vulggii Eliša ságaide, ja Israela ja Edoma gonagasat vulggiiga oktan suinna. ₁₃Eliša dajai Israela gonagassii: “Mii mus lea dahkamuššan duinna? Mana áhčát ja eatnát profehtaid ságaide!” Muhto Israela gonagas dajai sutnje: “Ale nie! Hearrá lea rávkan min, buot golbma gonagasa, deike vai beassá addit min moablaččaid gihtii.” ₁₄Eliša vástidii: “Nu duohta go Hearrá, Almmiveagaid Ipmil, eallá, son gean mun bálvalan: Jos mun in anáše árvvus Jošafata, Juda gonagasa, de mun in oppa vilppastivččege dutnje. ₁₅Muhto vižžet dal deike dakkára gii máhttá čuojahit!” Go čuojaheaddji čuojahišgođii, de Hearrá giehta bođii Eliša badjelii, ₁₆ja son dajai: “Hearrá gohčču du goaivut dán leahkái rokkiid bálddalagaid. ₁₇Dasgo ná cealká Hearrá: Dii ehpet oainne biekka ehpetge arvvi, muhto dán leagi dievva šaddá čáhci. Dii beassabehtet juhkat, nu maiddái din oamit ja fievrrut. ₁₈Muhto dát ii leat Hearrái galle: Son addá maid Moaba din gihtii. ₁₉Dii váldibehtet buot ladnegávpogiid ja njeaidibehtet juohke buori muora, buođđubehtet buot ádjagiid ja billistehpet buot šattolaš bealdduid geđggiiguin.” ₂₀Iđedis borramušoaffara áigge golggiidii Edoma guovllus čáhci, ja dat govččai oppa eatnama.

₂₁Go moablaččat gulle ahte gonagasat ledje vuolgán fallehit sin, de rávkojuvvojedje čoahkkái buot vearjoolbmát, sihke nuorat ja boarrásat, ja sii manne soahtan láhkái rájá duohkái. ₂₂Go moablaččat iđedis lihkke, de beaivváš báittii čáhcái, ja čáhci ruoksái dego varra. ₂₃Dalle sii dadje: “Duot lea varra! Gonagasat leat soahtan guhtet guimmiideasetguin ja časkán guhtet guimmiideaset jámas. Dál sállašii, moablaččat!” ₂₄Muhto go sii bohte Israela soahtesiidii, de israellaččat fallehedjege sin nu ahte sii šadde báhtarit. Israellaččat doarridedje moablaččaid ja časke sin oalát. ₂₅Sii gaikkodedje gávpogiid, ja juohke šattolaš beldui sii suhppejedje geađggi iešguhtege ja nu devde dan. Sii buđđo juohke ádjaga ja njeide buot buriid muoraid. Loahpas dušše Kir-Hareseta muvrrat ledje ceaggut, ja doppenai šleaŋgobálkut birastahtte gávpoga ja fallehedje dan. ₂₆Go Moaba gonagas oinnii ahte ii šat bihtán ceavzit, de son válddii mielddis čiežačuođi miehkkeolbmá ja iskkai bahkkestit čađa Edoma gonagasa olbmáid bokte, muhto dan sii eai nagodan. ₂₇Dalle gonagas válddii vuosttašriegádan bártnis gii galggai šaddat gonagassan su maŋŋil, ja oaffarušai su boaldinoaffarin gávpotmuvrra alde. Dalle israellaččaid vuostá buollái nu stuorra moarri ahte sii geassádedje ja máhcce iežaset eatnamii.