2. Samuelgirji 22

₂Hearrá, don leat mu bákti,

mu ladni ja mu beasti,

₃don leat mu bákteladni.

Ipmil, dutnje mun dorvvastan,

don leat mu galba, mu bestojumi čoarvi,

mu vearju ja báhtaransadji.

Don leat mu beasti,

don gájut mu veahkaválddálaččaid gieđas.

₄Mun čurvon Hearrá,

su gii lea rámiduvvon,

ja mun bestojuvvojin mu vašálaččain.

₅Jápmima bárut birastahtte mu,

mun suorganin heavahusa rávnnjiin.

₆Jábmiidáimmu báttit fáŋgejedje mu,

mu ovddas ledje jápmima gielat.

₇Heađistan mun rohkadallen Hearrá,

mun čurvon Ipmilasan.

Mu jietna olii su tempelii,

ja son gulai mu čuorvasa.

₈Dalle eanan sparaidii ja doarggistii,

almmi vuođđudusat lihkadedje,

su moarri bijai daid suoibut.

₉Su njunis badjánii suovva,

su njálmmis duššadeaddji dolla.

Su njálbmi rusui buolli hilaid áhcagastima.

₁₀Son sojahii almmi ja njiejai,

su julggiid vuolde lei seavdnjatvuohta.

₁₁Son riidii kerubain,

son girddii biekka soajáiguin.

₁₂Son dagai goahtinis seavdnjadasa,

čáziid eatnatvuođa, suhkkes balvvaid.

₁₃Báitimis mii manai su ovddas,

bulle áhcagas hilat.

₁₄Hearrá čearggui almmis,

Alimus divttii jienas gullot.

₁₅Son bážii njuolaid

ja biđgii vašálaččaid,

son moivii sin álddagasaidisguin.

₁₆Mearrabotni rokkit ihtigohte,

eatnama vuođđudusat rahpasedje

go Hearrá áittii,

go su moari riđđu bosui daid badjel.

₁₇Son geigii gieđa allagasas

ja dohppii mu gihtii,

son gesii mu bajás čiekŋalis čáziin.

₁₈Son gájui mu gievrras vašálaččain,

vašuheddjiin geat ledje mu gievrrabut.

₁₉Sii fallehedje mu

mu lihkuhisvuođa beaivvi,

muhto Hearrá bođii munnje doarjjan.

₂₀Son doalvvui mu friddjavuhtii,

son besttii mu,

dasgo son ráhkista mu.

₂₁Hearrá mávssii munnje

danin go mun ráhkistan vuoigatvuođa,

son bálkkašii mu,

danin go mu dagut leat buhttásat.

₂₂Mun lean vádjolan Hearrá geainnuid

inge bahávuođas leat gáidan Ipmilis.

₂₃Buot su lágat leat mu čalmmiid ovddas,

in goassege leat rihkkon su báhkkomiid,

₂₄lean leamaš láitemeahttun su ovddas

ja váruhan suddudeames.

₂₅Hearrá bálkkašii mu,

danin go mun ráhkistan vuoigatvuođa,

danin go mu eallin lea buhtis su čalmmiin.

₂₆Don leat oskkáldas oskkáldassii,

vuoigatlaš vuoigatlažžii,

₂₇du dagut leat buhttásat buhttásii,

muhto behtolačča don čádjidahtát.

₂₈Vártnuhis olbmuid don beasttát,

muhto čeavláid don vuolidat.

₂₉Don leat mu lámpá, Hearrá,

mu Ipmil addá čuovgga

seavdnjatvuohtasan.

₃₀Du vehkiin mun fallehan

soahteveaga,

Ipmil veahkeha mu njuiket

muvrra badjel.

₃₁Ipmila geaidnu lea ollis,

Hearrá sátni lea čilgejuvvon.

Dego galba son suodjala daid

geat dorvvastit sutnje.

₃₂Gii lea Ipmil, juos ii Hearrá,

gii lea bákti, juos ii min Ipmil?

₃₃Ipmil lea mu nana ladni,

son dahká mu vádjolusa ollisin.

₃₄Son dahká mu fallin dego sarvvaáldu

ja addá munnje coavcci alážiin.

₃₅Son oahpaha mu soahtat,

mu gieđaid gealdit veaikedávggi.

₃₆Don attát bestojumát munnje galban,

don gulat mu rohkosa

ja dagat mu fámu stuorisin.

₃₇Don rabat luotta mu lávkkiide,

mu láhpelađđasat eai vealčas.

₃₈Mun doarridan vašálaččaidan

ja jovssan sin,

mun máhcan easkka go lean duššadan sin,

₃₉mun časkkán sin,

eaige sii šat čuožžil.

Sii gahččet mu julggiid vuollái.

₄₀Don attát munnje fámu soahtat,

don bágget mu vuostálastiid vuollánit.

₄₁Don áját mu vašálaččaid báhtui,

ja mun duššadan daid geat vašuhit mu.

₄₂Sii čurvot, muhto ii oktage gájo sin,

sii čurvot Hearrái,

muhto son ii vástit sidjiide.

₄₃Mun mollen sin gavjan,

mun duolmman sin dego gáhta durddi.

₄₄Don gájut mu go mu álbmot stuibmida,

don bijat mu álbmogiid ráđđejeaddjin,

vieris álbmogat bálvališgohtet mu.

₄₅Vierroolbmot njálggistedje muinna,

sii ledje gulolaččat munnje.

₄₆Vierroolbmot suorganedje

ja bohte olggos ladniineaset

doarggistemiin.

₄₇Hearrá eallá!

Rámiduvvon lehkos mu bákti,

máidnojuvvon Ipmil,

mu bestojumi bákti!

₄₈Ipmil diktá mu mávssahit

mu vašálaččaide

ja bidjá álbmogiid mu julggiid vuollái.

₄₉Son gádju mu mu vašálaččain,

diktá mu vuoitit vuostálastiidan

ja beastá mu veahkaválddálaččain.

₅₀Danne mun máinnun du

álbmogiid gaskkas, Hearrá,

ja lávllun du nammii rámádusa.

₅₁Hearrá addá gonagassasis

stuorra vuoittuid,

don leat oskkáldas sutnje

gean leat vuoidan,

Davidii ja su nállái gitta agálaš áigái.