Davida maŋimuš sánit
1Dát leat Davida maŋimuš sánit.
Ná sárdnu David, Isaja bárdni,
ná sárdnu olmmái
gean Alimus lea alidan,
gean Jakoba Ipmil lea vuoidan
gonagassan,
son gean Israela suodjaleaddji ráhkista.
2Hearrá vuoigŋa sárdnu mu bokte,
su sánit leat mu njuokčama alde.
3Israela Ipmil lea sárdnon,
Israela bákti lea cealkán munnje:
Gii ráđđe olbmuid vuoigatlaččat,
gii ráđđe sin Ipmila balus.
4Son lea dego iđitguovssu,
go beaivváš badjána jalahas iđida,
nugo beaivvádat mii bohciidahttá
rási eatnamis arvvi maŋŋá.
5Almma mu sohka lea dakkár
Ipmila ovddas?
Son lea dahkan muinna agálaš lihtu
man lohpádusaid son doallá oskkáldasat.
Buot mii lea munnje veahkkin,
visot maid mun sávan,
son diktá lihkostuvvat munnje.
6Muhto návccaheamit leat
dego bastilislánját mat bálkásit:
Ii oktage váldde daid gihtii,
7dat duohtaduvvojit
dušše ruvddiin ja sáitenađain,
dat boldojuvvojit dasttánaga.
Davida soahteolbmát
8Dát leat Davida buoremus soahteolbmáid namat:
Hakmonlaš Jišbošet, golmma buoremus soahteolbmás vuosttaš. Son bajidii sáittis gávccičuođi gottáhallan olbmá badjel ovttat gearddis.
9Čuovvovaš lei ahoahlaš Elasar, Dodo bárdni, gii lei okta dan golmma soahteolbmás. Son lei Davida mielde Pas-Damminis gosa filistalaččat ledje čoagganan soahtat. Go Israela olbmát geassádedje, 10de Elasar bisui das ja gottii filistalaččaid, dassážii go su giehta váibbai ja čárvásii miehkkái gitta. Dan beaivvi Hearrá attii stuorra vuoittu, ja go olbmát máhcce Elasara lusa, de lei dušše stajidit gahččan vašálaččaid.
11Čuovvovaš lei hararlaš Šamma, Age bárdni. Filistalaččat ledje oktii čoagganan Lehii, ja doppe lei bealdu mas šattai bađvešaddu. Israellaččat báhtaredje filistalaččain, 12muhto Šamma manai guovdu bealddu, gáhttii dan ja časkkii filistalaččaid. Nu Hearrá attii stuorra vuoittu.
13Oktii lájuid álggus golmmas dan golbmalogi oaivámuččas vulge Davida lusa váriide, Adullama bákteráigái. Filistalaččaid soahtesiida lei dalle Refaimleagis. 14David lei várreladnistis, ja filistalaččaid njunušveahka lei Betlehemis. 15David goikkai, ja son dajai: “Vare muhtin buvttášii munnje čázi gáivvos mii lea Betlehema poartta guoras!” 16Dalle dat golbma soahteolbmá bahkkejedje filistalaččaid soahtesiidii, goivo čázi Betlehema poartagáivvos ja bukte dan Davidii. Son ii goit dáhtton juhkat dan, muhto golggahii dan juhkamušoaffarin Hearrái 17ja dajai: “Hearrá várjalehkos mu juhkamis dan! Dathan lea daid olbmáid varra geat vižže dan heakkaset váttuin.” Iige son dáhtton juhkat dan.
Dákkáriid dahke dat golbma sáŋgára.
18Abišai, Seruja bárdni ja Joaba viellja, lei dan golbmalohkása oaivámuš. Son bajidii sáittis golbmačuođi gottáhallan olbmá badjel, ja son namuhuvvui ovttas dainna golbmasiin. 19Son lei árvvus adnojuvvon dan golbmalohkása gaskkas ja sin oaivámuš, muhto dan golbmasa veardásaš son ii lean.
20Benaja, Jojada bárdni, Kabseela olmmoš, lei jálus olmmái gii dagai stuorra daguid. Son gottii moablaš Ariela guktuid bártniid. Muhtun borgabeaivvi son njiejai arvegáivui ja gottii doppe ledjona. 21Son gottii maid hirbmat stuorra egyptalaš olbmá. Egyptalaččas lei sáiti gieđas, muhto Benaja fallehii su dušše soabbi gieđas, gaikkihii sus sáitti ja gottii su su iežas sáittiin. 22Dakkáriid dagai Benaja, Jojada bárdni. Son namuhuvvui ovttas dainna golbmasiin. 23Son adnojuvvui árvvus dan golbmalohkása gaskkas, muhto dan golbmasa veardásaš son ii lean. David bijai su heaggafávttaidis oaivámužžan.
24Dan golbmalohkása searvvis ledje maiddái Asael, Joaba viellja, ja betlehemlaš Elhanan, Dodo bárdni, 25harodlaš Šamma, harodlaš Elika, 26peletlaš Heles, tekoalaš Ira, Ikkeša bárdni, 27anatotlaš Abieser, hušalaš Sibbekai, 28ahoahlaš Salmon, netofalaš Mahrai, 29netofalaš Heleb, Baana bárdni, Ittai, Ribaja bárdni, benjaminlaččaid Gibea olmmoš, 30piratonlaš Benaja, Hiddai, Nahale Gaaša olmmoš, 31arabalaš Abi-Albon, bahurimlaš Asmavet, 32šaalbonlaš Eljahba, gisonlaš Jašen, 33hararlaš Jonatan, Šamma bárdni, ararlaš Ahiam, Šarara bárdni, 34Elifelet, Ahasbaja bárdni, maakatlaš Hefer, gilolaš Eliam, Ahitofela bárdni, 35karmellaš Hesro, aradlaš Paarai, 36sobalaš Jigal, Natana bárdni, gadlaš Bani, 37ammonlaš Selek, beerotlaš Nahrai, Joaba, Seruja bártni, vearjoguoddi, 38jeterlaš Ira, jeterlaš Gareb 39ja hetlaš Uria, oktiibuot golbmalogičieža olbmá.
