2. Samuelgirji 8

₁Das maŋŋil David časkkii filistalaččaid ja vuolidii sin, ja son válddii sis Meteg-Haamma. ₂Son časkkii maiddái moablaččaid ja mihtidii sin oarain: Son vealuhii sin eatnamii ja mihtidii sis ain guokte oarraguhkkodaga goddojuvvot ja ovtta oarraguhkkodaga guđđojuvvot eallit. Nu moablaččat šadde bálvalit Davida ja máksit sutnje vearu. ₃David časkkii maiddái Hadadesera, Rehoba bártni, Soba gonagasa, gii lei vuolgán váldit ruoktot daid eatnamiid Eufrateatnogáttis mat ledje gullan sutnje ovdal. ₄David válddii sus duhát čiežačuođi riidejeaddji ja guoktelogiduhát vázzi soahteolbmá. Son čuohpai buot vovdnaheasttaid čeavžesuonaid, dušše čuođi heastta son sesttii.

₅Go Damaskusa aramealaččat bohte veahkehit Hadadesera, Soba gonagasa, de David časkkii sin ja gottii guoktelogiguokte duhát aramealačča. ₆David bijai soahteveagaid Damaskusii, ja aramealaččat šadde bálvalit su ja máksit sutnje vearu. Hearrá attii Davidii vuoittu juohke sajis gosa son manai. ₇David válddii Hadadesera olbmáid gollenjuollaskuohpuid ja buvttii daid Jerusalemii. ₈Betahis ja Berotajis, Hadadesera gávpogiin, gonagas David válddii hui ollu veaikki.

₉Go Toi, Hamata gonagas, gulai ahte David lei časkán Hadadesera soahteveaga, ₁₀de son vuolggahii bártnis Jorama dearvvahit gonagas Davida ja sávvat sutnje lihku dan geažil go son lei vuoitán Hadadesera; Hadadeser lei oainnát leamaš Toi vašálaš. Joram buvttii mielddis silba-, golle- ja veaikelihtiid, ₁₁ja gonagas David basuhii daid Hearrái oktanaga dainna silbbain ja golliin maid son lei váldán álbmogiin maid lei vuoitán: ₁₂Aramealaččain, moablaččain, ammonlaččain, filistalaččain ja amaleklaččain. Son basuhii maiddái dan sállaša maid lei váldán Hadadeseris, Rehoba bártnis, Soba gonagasas.

₁₃Davida beaggin stuorui ain. Go son lei máhccamin ruoktot maŋŋil go lei vuoitán aramealaččaid, de son časkkii Sálteleagis edomlaččaid, gávccinuppelohkái duhát olbmá. ₁₄Son bijai soahteveagaid miehtá Edoma, ja buot edomlaččat šadde bálvalit Davida. Hearrá attii Davidii vuoittu juohke sajis gosa son manai.

₁₅David ráđđii dál oppa Israela, ja son doaimmahii álbmogasas lága ja vuoigatvuođa. ₁₆Soahteveagaoaivámužžan lei Joab, Seruja bárdni, ja riikkačállin Jošafat, Ahiluda bárdni. ₁₇Sadok, Ahituba bárdni, ja Ahimelek, Ebjatara bárdni, leigga báhppan, ja Seraja lei gonagasa čállin. ₁₈Benaja, Jojada bárdni, lei keretlaččaid ja peletlaččaid oaivámužžan, ja báhppan ledje maid muhtun Davida bártnit.