2. Tessalonika 2

₁Mii váldit dál sáhkan Hearrámet Jesus Kristusa boahtima ja dan go mii čoggojuvvot su lusa. Vieljažiiddán, mii bivdit: ₂Allet dallánaga mášohuva alletge suorgan, jos muhtun čujuha Vuoiŋŋa almmuhussii dahje mahkáš min sárdnái dahje girjái ja čuoččuha ahte Hearrá beaivi lea juo boahtán. ₃Allet divtte ovttage fillet iežadet mange láhkái. Dasgo oskkus jorraleapmi ferte vuos dáhpáhuvvat ja lágahisvuođa olmmoš almmustuvvat, gáđohusa bárdni, ₄ vuostálasti, gii alida iežas buot dan badjel mii gohčoduvvo ipmilin ja bassin, čohkána ieš Ipmila tempelii ja gulaha leat Ipmil. ₅Almma muitibehtet ahte mun dadjen dán didjiide juo dalle go ledjen din luhtte? ₆Dii diehtibehtet mii su dál caggá, nu ahte son almmustuvvá easkka dalle go su áigi boahtá.

₇Lágahisvuođa čiegus váikkuhus lea juo duddjomin. Dat mii ain dan caggá, ferte goit vuos jávkaduvvot; ₈dalle almmustuvvá lágahisvuođa olmmoš gean Hearrá Jesus goddá njálmmi vuoiŋŋanasain ja duššada iežas boahtima hearvásvuođain. ₉Lágahisvuođa olmmoš boahtá Sáhtána fámuin ja dahká behtolaš mearkkaid ja oavdduid. ₁₀Su vearrivuohta fille daid geat mannet gáđohussii, danne go sii eai dáhtton ráhkistit duohtavuođa mii livččii sin beastán. ₁₁Danne Ipmil vuolggaha veagalaš čádjádusa, vai sii jáhkket giellásii, ₁₂ja nu dubmejuvvojit buohkat geat eai leat oskon duohtavuhtii, muhto leat válljen vearrivuođa.

₁₃Muhto dii vieljažiiddán geaid Hearrá ráhkista, din dihte mii leat álelassii geatnegasat giitit Ipmila. Ipmil lea válljen din álgošaddun daid gaskkas geat bestojuvvojit, go Vuoigŋa basuha din ja dii oskubehtet duohtavuhtii. ₁₄Aiddo dása, Jesus Kristusa hearvásvuođa oamasteapmái, son rávkkai din, go mii buvttiimet didjiide evangeliuma. ₁₅Bissot dan dihte nanusin, vieljažiiddán, ja dollet čavga gitta dain oahpahusain maid mii leat addán didjiide njálmmálaččat dahje girjjis. ₁₆Hearrámet Jesus Kristus ieš ja Ipmil, min Áhčči, gii lea ráhkistan min ja lea árpmustis addán midjiide agálaš jeđđehusa ja buori doaivvu, ₁₇jeđđejehkos din váimmu, vai dii álo veadjibehtet sárdnut ja dahkat dan mii lea buorre.