2. Tessalonika 3

₁Loahpa, vieljat: Rohkadallet min ovddas, vai Hearrá sátni ovdána jođánit ja gudnejahttojuvvo eará guovlluin seammá ládje go din luhtte. ₂Rohkadallet maiddái, vai mii gáddjojuvvot gážžáris ja bahás olbmuid gieđas; buohkathan eai oskko. ₃Muhto Hearrá lea oskkáldas, ja son nanne din ja várjala din bahás. ₄Hearrái dorvvastemiin mii luohttit dasa ahte dii dál ja boahtteáiggis dahkabehtet dan maid mii gohččut. ₅Vare Hearrá oahpistivččii din váimmu ráhkistit Ipmila ja vuordit Kristusa gierdavaččat.

₆Hearrá Jesus Kristusa nammii mii gohččut din, vieljažiiddán, atnit iežaideattet eret juohke vielja searvvis gii joavdelastá iige vádjol daid oahpahusaid mielde maid mii didjiide attiimet. ₇Dii diehtibehtet ieža mo galgabehtet čuovvut min ovdamearkka. Go mii leimmet din luhtte, de mii eat lean joavdelassan. ₈Mii eat borran nuvttá geange láibbi, muhto barggaimet ja ražaimet ija beaivvi, amamet šaddat didjiide noađđin. ₉Mishan gal livččii leamaš dasa vuoigatvuohta, muhto mii dáhtuimet leat didjiide ovdamearkan. ₁₀Go mii leimmet din luhtte, de mii attiimet didjiide dán gohččuma: Gii ii dáhto bargat, dat ii oaččo borratge. ₁₁Mii oainnat leat gullan ahte muhtumat dis joavdelastet. Sii eai daga dan maid galggašedje, muhto seahkánit áššiide mat eai sidjiide gula. ₁₂Dakkár olbmuid mii gohččut ja ávžžuhit Hearrá Jesus Kristusa nammii bargat jaskatvuođas ja borrat iežaset láibbi.

₁₃Muhto vieljat, allet váibba dahkamis buriid. ₁₄Jos muhtun ii jeagat dan maid mii leat dadjan dán girjjis, de mearkkašehket gii son lea. Allet guoimmástala suinna, vai son heahpana. ₁₅Allet dattetge ane su vašálažžan, muhto cuiggodehket su nugo vielja.

₁₆Vare ráfi Hearrá ieš attášii didjiide ráfi, álelassii ja juohke láhkái. Hearrá lehkos dinguin buohkaiguin.

₁₇Mun, Paulus, čálán dáid dearvvuođaid iežan gieđain. Ná mun čálán, ja dát lea dovdomearkan buot mu girjjiin. ₁₈Hearrámet Jesus Kristusa árbmu lehkos dinguin buohkaiguin!