Amos 8

“Mu álbmot Israel lea láddan

ja gahččá fargga,

mun in dáhto šat árkkálmastit dan.

₃Dan beaivvi šloahta lávlu nissonat

fuoikugohtet,

cealká Hearrá Ipmil.

Eatnat rupmašat,

juohke sadjái bálkestuvvon.

Jaska!”

₄Gullet dán, dii geat

duolbmabehtet váivvášiid

ja loahpahehpet eatnama vártnuhemiid!

₅Dii dadjabehtet: “Goas nohká

mánočalbmebeaivvi ávvudeapmi,

vai beassat vuovdit gortni,

ja sabbat, vai beassat rahpat gordnebuvdda?

Dalle mii dahkat mihtu vádjegin,

bajidit hatti ja atnit vearreveavtta.

₆Dalle mii oastit váivvášiid ruđain

ja geafes rávkki gámabárain.

Gordnesuohpahasaidge

mii vuovdit gordnin!”

₇Hearrá lea vurdnon

Jakoba čeavlli bokte:

Mun in goassege vajáldahte

maid sii leat dahkan.

₈Iigo eanan doarggistivčče dan dihte,

eaigo buohkat geat ássit das moraštivčče?

Iigo oppa eanan dulvvaše dego Nileatnu,

badjánivčče ja cogoše nugo Egypta eatnu?

₉Dan beaivvi, cealká Hearrá Ipmil,

mun divttán beaivváža

luoitádit gaskabeaivvi

ja sevnnjodahtán eatnama

go ain lea čuvges beaivi.

₁₀Din basiid mun jorgalan morašin

ja buot din lávlagiid morašlávllan,

čanan horstta buohkaid alimiid birra

ja divttán juohkehačča oaivvi

ráhkejuvvot báljisin

nugo dalle go lea moraš áidna bártni dihte,

ja dagan dan loahpa bahča beaivin.

₁₁Duođaid, beaivvit bohtet,

cealká Hearrá Ipmil,

goas mun vuolggahan eatnamii nealggi,

in láibenealggi inge čáhcegoikku,

muhto Hearrá sáni gullama nealggi.

₁₂Dalle olbmot vádjolit ábis áhpái,

johtalit davvin nuorttas

ja ohcet Hearrá sáni,

muhto eai gávnna.

₁₃Dan beaivvi čáppa nieiddat

ja nuorra olbmát vuoimmehuvvet

goikku geažil,

₁₄dat geat vurdnot

Samaria suttu bokte ja dadjet:

“Nu duohta go du ipmil eallá, Dan!”

ja: “Nu duohta go du ipmil eallá, Beer Šeba!”

Sii gahččet eaige šat čuožžil.