Kolossa 2

₁Mun dáhtun din diehtit man garra soađi mun soađan din dihte ja laodikealaččaid ja buot earáid dihte geat eai leat goassege oaidnán mu muođus muhtui. ₂Mun sávan ahte sii roahkasmuvvet váimmusteaset, šaddet oktan ráhkisvuođas, jukset riggámus ja čiekŋaleamos dieđu ja dovddiidit Ipmila čiegusvuođa, Kristusa, ₃geasa buot viisodaga ja dieđu dávvirat leat čihkkojuvvon. ₄Mun dajan dán, vai ii oktage beahte din fillejeaddji sániiguin. ₅Vaikko mun in leat din luhtte rumašlaččat, de mun almmatge lean din luhtte vuoiŋŋas, ja mun illudan go oainnán din buori skihka ja din nana oskku Kristusii.

₆Go dii lehpet váldán vuostá Hearrá Jesus Kristusa, de ellet su siste. ₇ Ruohtasmuvvet sutnje, ráhkadehket iežadet eallima su vehkii, nanusmuvvet oskkus nugo didjiide lea oahpahuvvon ja giitalehket Ipmila valljugasat. ₈Váruhehket vai ii oktage giela din guoros ja behtolaš viissisvuođaoahpaiguin mat vuođđuduvvet olbmuid árbevieruide ja dán máilmmi álgofámuide eaige Kristusii. ₉Dasgo su siste orru rumašlaččat oppa ipmilvuođa dievasvuohta, ₁₀ja su siste maiddái dii lehpet beassan dán dievasvuhtii. Son lea buot oaivámuččaid ja fámuid oaivi. ₁₁Su siste dii lehpet maiddái birračuhppojuvvon, ehpet olbmo gieđain, muhto Kristusa birračuohpahusain, dalle go suttolaš rumaš nullojuvvui eret. ₁₂Gásttas dii oktan suinna hávdáduvvuidet ja čuoččáldahttojuvvuidet eallimii, go oskkuidet Ipmilii gii fámuinis čuoččáldahtii Kristusa jábmiid luhtte. ₁₃Dii leiddet jápmán danin go leiddet suddudan ehpetge lean birračuhppojuvvon, muhto Ipmil dagai din eallin oktan Kristusiin. Son attii midjiide buot min suttuid ándagassii, ₁₄ sihkui vealgegirjji mii lei min vuostá, oktan lága gáibádusaiguin ja duššadii dan go návlii dan russii. ₁₅Son vearjjohuhtii oaivámuččaid ja válddiid ja bijai daid heahpadii, go son divttii Kristusa vuoitit daid badjel.

₁₆Allet dan dihte divtte ovttage dubmet iežadet das maid borrabehtet dahje juhkabehtet dahje mo doallabehtet basiid, mánočalbmebeivviid ja sabbahiid. ₁₇Buot dát leat dušše dan suoivvan mii boahtá; rumaš ieš lea Kristus. ₁₈Din vuoitogierddu ii oaččo váldit oktage gii lea liikostan vearri vuollegašvuhtii, iežas oainnáhusaide ja eŋgeliid bálvaleapmái. Dakkár olbmo čeavludahttet su iežas jurdagat ₁₉iige sus leat oktavuohta Kristusii, oaivái gii atná fuola oppa rupmašis ja doallá dan čoahkis lađđasiiguin ja suonaiguin, nu ahte dat šaddá dan láhkái go Ipmil lea oaivvildan.

₂₀Jos dii oktan Kristusiin lehpet jápmán eret dán máilmmi álgofámuin, de manne dii ain eallibehtet dego gulašeiddet dán máilbmái ja jeagadehpet gohččumiid nugo: ₂₁“Ale váldde”, “Ale máistte”, “Ale guoskkat”? ₂₂Buot dát guoská dasa mii gollá ja nohká, ja dat leat dušše olbmuid báhkkomat ja oahpat. ₂₃Dat gal gohčoduvvojit viissisvuohtan, danin go dat orrot leamen Ipmila bálvaleapmi, vuollegašvuohta ja rupmaša bagadeapmi, muhto dain ii leat mihkkege árvvuid ja dat duhtadit dušše olbmo čeavláivuođa.