Boares ja ođđa olmmoš
1Jos dii dalle lehpet oktan Kristusiin čuoččáldahttojuvvon jábmiid luhtte, de bivdet dan mii lea badjin gos Kristus čohkká Ipmila olgeš bealde. 2Váinnuhehket dan mii lea badjin, allet dan mii lea eatnama alde. 3Diihan lehpet jápmán, ja din eallin lea čihkkojuvvon Kristusiin Ipmilii. 4Go Kristus, din eallin, almmustuvvá, de dalle diige almmustuvvabehtet oktan suinna hearvásvuođas.
5Jámihehket dan dihte buot mii dis lea eatnanlaš: Furrošeami, nuoskivuođa, oaččálaš anistumiid, bahás himuid ja hátnodaga mii lea eahpeipmilbálvalus. 6Dakkáriid dihte Ipmila moarri deaivida jeagohis olbmuid. 7Daid searvvis leiddet maiddái dii dalle go eliidet diein suttuin. 8Muhto bidjet dál eret buot dán: moari, suhtu, bahávuođa, hiddjideami ja fasttes ságaid. 9Allet gielástala guhtet guimmiideattet. Diihan lehpet nuollan eret iežadet boares olbmo oktan daguidisguin 10ja gárvodan ođđa olbmo gii ovtto ođasmuvvá, vai oahppá ain buorebut dovdat Sivdnideaddjis ja šaddat su láhkásažžan. 11Dalle ii leat šat greikalaš iige juvddálaš, ii birračuhppojuvvon iige birračuohpakeahttái, ii barbára, skyhtalaš, šlávva iige friddja, muhto Kristus lea buot, son lea buohkain.
12Go dii lehpet Ipmila válljen olbmot, basit ja eahcálaččat, de váldet dan dihte gárvun njuoras árkkálmastinvuođa, buorrevuođa, vuollegašvuođa, láđisvuođa ja gierdavašvuođa, 13vai gierdabehtet guhtet guimmiideattet ja addibehtet ándagassii guhtet guimmiidasadet, vaikko dis livččiige láitámuš. Nugo Hearrá lea addán didjiide ándagassii, nu galgabehtet diige addit. 14Muhto ovddimustá gárvodehket ráhkisvuođa mii lea ollisvuođa čanas. 15Diktet Kristusa ráfi ráđđet iežadet váimmus, dasahan dii ovtta rupmaša lahttun lehpet rávkojuvvon. Ja lehket giitevaččat! 16Diktet Kristusa sáni ássat valljugasat gaskkasteattet. Oahpahehket ja oahpistehket guhtet guimmiideattet buot viissisvuođain ja lávlot Ipmilii sálmmaid, rámádusa ja vuoiŋŋalaš lávlagiid. 17Maid juo dagažehpet sániiguin ja daguiguin, de dahket dan Hearrá Jesusa nammii ja giitet Ipmil Áhči su bokte.
Ruoktu ja bearaš
18Áhkát, lehket iežadet boadnjái vuolibuččat, nugo heive daidda geat oskot Hearrái. 19Boatnját, ráhkistehket iežadet áhká alletge leage sutnje boarkkat. 20Mánát, jeagadehket vánhemiiddádet juohke dáfus, danne go dat lea Hearrá miela mielde. 21Vánhemat, allet láitte mánáideattet, vai sii eai nuonddahala.
22Šlávat, jeagadehket eatnanlaš isidiiddádet juohke dáfus, allet guoktiluššamiin dego dat geat vigget dohkket olbmuide, muhto vuoiggalaš váimmuin Hearrá balus. 23Buot maid dahkabehtet, dan dahket oppa váimmus, diihan bálvalehpet Hearrá ehpetge olbmuid. 24Muitet ahte dii oažžubehtet Hearrás bálkká, oasi árbái. Bálvalehket Hearrá Kristusa. 25Gii dahká veriid, dat oažžu das ráŋggáštusa, danin go Ipmil ii geahča olbmo hápmái.
