Kolossa 4

₁Isidat, meannudehket šlávaideattetguin vuoigatlaččat ja govttolaččat. Muitet ahte dis maid lea hearrá almmis.

₂Rohkadallet gierdavaččat, gohcet ja átnot giitalusaiguin. ₃Rohkadallet maiddái min ovddas, vai Ipmil rabasta midjiide sáni uvssa ja mii beassat sárdnidit Kristusa čiegusvuođa man dihte mun lean fáŋgan. ₄Vare mun sáhtášin dahkat dan almmusin ja máhtášin sárdnut nugo galggašin!

₅Meannudehket viisásit olggobealolbmuiguin, atnet ávkin vuogas áiggi. ₆Sárdnot álelassii ustitlaččat, dattetge nu ahte din ságat sáltenjaddet. Dii fertebehtet diehtit, mo vástidit iešguhtiige.

₇Buot mii munnje guoská, muitala didjiide min ráhkis viellja Tykikos, oskkáldas bálvaleaddji ja mu bargoguoibmi Hearrá barggus. ₈Mun vuolggahan su din lusa aiddo dan dihte vai beassabehtet gullat ságaid midjiide ja vai son arvvosmahttá din. ₉Su mielde boahtá min oskkaldas ja ráhkis viellja Onesimos gii lea din iežadet olmmoš. Sudnos beassabehtet gullat ságaid deike.

₁₀Mu fáŋgaguoibmi Aristarkos cealká didjiide dearvvuođaid, ja nu maiddái Markus, Barnabasa vilbealle, gean hárrái dii lehpet juo ožžon rávvagiid; váldet su bures vuostá, jos son boahtá diehko. ₁₁Dearvvuođat Jesusis gii gohčoduvvo maid Justusin. Dát golmmas leat áidna juvddálaččat geat barget muinna Ipmila riikka ovdii. Sii leat leamaš munnje stuorra jeđđehussan. ₁₂Dearvvuođaid cealká din iežadet olmmoš Epafras, Kristus Jesusa bálvaleaddji, gii álo rohkadallá áŋgirit din ovddas, vai dii bissubehtet dievaslažžan ja dovdabehtet ollásit Ipmila dáhtu. ₁₃Mun duođaštan ahte son bargá sakka din ovdii ja Laodikea ja Hierapolisa searvegottiid ovdii. ₁₄Didjiide cealkiba dearvvuođaid maiddái min ráhkis viellja doavttir Lukas ja Demas.

₁₅Celket dearvvuođaid Laodikea vieljaide ja Nymfai ja searvegoddái mii čoaggana su vissui. ₁₆Go lehpet lohkan dán girjji, de atnet fuola das ahte dat lohkkojuvvo maiddái Laodikea searvegottis, ja ahte diigis lohkabehtet dan girjji maid mu lean sádden Laodikeai. ₁₇Celket Arkipposii: “Muitte ollašuhttit dan bálvalusdoaimma maid leat ožžon Hearrás.”

₁₈Mun, Paulus, čálán dása dearvvuođaid iežan gieđain. Muitet mu láhkkiid. Árbmu lehkos dinguin.