Daniel 1

₁Juda gonagasa Jojakima goalmmát ráđđenjagi fallehii Babylonia gonagas Nebukadnesar Jerusalema ja birastahtii gávpoga. ₂Hearrá attii Jojakima, Juda gonagasa, su gihtii, ja maiddái muhtun bassi lihtiid Ipmila viesus. Nebukadnesar doalvvui lihtiid Sineara eatnamii ja bijai daid iežas ipmila dávvirgámmárii.

₃De gonagas gohčui bajimus hoavvaolbmás Ašpenasa válljet muhtun israellaččaid gonagaslaš sogas ja allanálat bearrašiin, ₄čáppa nuorra olbmáid geain ii lean mihkkege liittuid ja geat ledje viisát, čeahpit ja oahppilat, nu ahte sii livčče dohkálaččat bálvalit gonagasa šloahtas, ja gohčui oahpahit sidjiide kaldealaččaid girjjálašvuođa ja giela. ₅Gonagas mearridii ahte sii juohke beaivvi galge oažžut borramuša ja viinni su iežas beavddis. Sii galge oahpahuvvot golbma jagi ja das maŋŋil bálvalit gonagasa. ₆Sin searvvis ledje Daniel, Hananja, Mišael ja Asarja, buohkat Juda čearddas. ₇Bajimus hoavvaolmmái bijai sidjiide ođđa namaid: Danielii son bijai namman Beltešassar, Hananjai Šadrak, Mišaelii Mešak ja Asarjai Abed-Nego.

₈Muhto Daniel mearridii ahte son ii daga iežas buhtismeahttumin gonagasa beavddi borramušain ja viinniin, ja son ánui bajimus hoavvaolbmás beassat vealtat dakkáris mii lea buhtismeahttun. ₉Ipmil lei dahkan bajimus hoavvaolbmá láđisin ja buorredáhtolažžan Danielii, ₁₀muhto bajimus hoavvaolmmái dajai Danielii: “Mun balan ahte mu hearrá ja gonagas gii lea mearridan maid dii galgabehtet borrat ja juhkat, ii ane din seammá dearvvašin go daid eará nuorra olbmáid, ja dalle dii dagahehpet munnje heakkaheađi.” ₁₁Dalle Daniel dajai bearráigeahččái gean bajimus hoavvaolmmái lei gohččon atnit fuola sus alddis, Hananjas, Mišaelis ja Asarjas: ₁₂“Geahččal bálvaleddjiidat logi beaivvi ja atte midjiide dušše šattuid borrat ja čázi juhkat. ₁₃Buohtastahte min dasto daiguin nuorra olbmáiguin geat leat borran gonagasa beavddi borramuša, ja daga midjiide dalle nugo anát buoremussan.” ₁₄Bearráigeahčči mieđihii sin átnumuššii ja geahččalii sin logi beaivvi. ₁₅Go dat logi beaivvi ledje vássán, de sii ledje čábbábut ja deahkkábut oaidnit go dat nuorra olbmát geat ledje ožžon borramuša gonagasa beavddis. ₁₆Dalle bearráigeahčči divttii sin vealtat gonagasa borramušain ja viinnis ja attii sidjiide šattuid borrat.

₁₇Ipmil attii dan njealji nuorra olbmái jierpmi ja áddejumi ipmirdit buotlágán čállagiid ja viisodaga, ja Daniel máhtii čilget buot oainnáhusaid ja nieguid. ₁₈Go dat áigi lei boahtán maid gonagas lei mearridan, de bajimus hoavvaolmmái doalvvui sin Nebukadnesara ovdii. ₁₉Gonagas sártnui singuin, ja son gávnnahii ahte ii oktage nuorra olbmáin lean Daniela, Hananja, Mišaela ja Asarja veardásaš. Nu sii besse bálvalit gonagasa. ₂₀Álo go gonagas jearai sis muhtun ášši mii gáibidii viisodaga ja ipmárdusa, de son gávnnahii ahte sii ledje logi geardde viisábut go buot iežas riikka einnosteaddjit ja mánideaddjit.

₂₁Daniel lei hoavas gonagas Kyrosa vuosttaš ráđđenjagi rádjái.