Daniel 11

₂Go velá golbma gonagasa leat ráđđen Persia, de boahtá njealját, ja son riggu eambbo go buot dat earát. Dainna fámuin maid su riggodat addá, son čuoččáldahttá buot návccaidis Greikka vuostá. ₃De čuožžila gievrras gonagas gii ráđđe stuorra fámuin, ja son dahká maid dáhttu. ₄Illá son lea čuožžilan, go su riika sihke cuovkana ja juohkása buot njealji almmiguvlui. Dat ii boađe oktiige su nális iige leat nu fámolaš go dalle go son ieš ráđđii. Su riika gomihuvvo, ja earát váldet dan. ₅Lulligonagas šaddá gievran, muhto okta su oaivámuččain šaddá vel gievrrabun ja ráđđe stuorra fámuin. ₆Muhtin jagiid geažes soai soabadeaba, ja lulligonagasa nieida boahtá davvigonagasa lusa nannet lihtu. Muhto gonagasa nieidda fápmu ii biso, ja su sohka nohká. Áiggi mielde son ieš, su fárru, su áhčči ja su boadnji addojuvvojit jápmimii. ₇Nieidda sogas okta boahtá su sadjái. Son falleha davvigonagasa soahteveaga, bahkke su ladnái ja vuoitá su álbmoga. ₈Son doalvu doppe ipmiliid govaid ja bácciid ja sin mávssolaš silba- ja gollelihtiid sálašin Egyptii. Muhtun jagiid son diktá davvigonagasa leat ráfis. ₉Davvigonagas bahkke lulligonagasa riikii, muhto máhccá dasto iežas eatnamii.

₁₀De su bártnit ráhkkanit soahtat ja čohkkejit hirbmat stuorra soahteveaga. Dat šáviha ovddos dego dulvi ja bahkke gitta lulligonagasa ladni rádjái. ₁₁Moaris lulligonagas soahtá davvigonagasain gii čohkke stuorra soahteveaga, muhto dat vuoittáhallá lulligonagassii. ₁₂Go dat soahteveahka lea jávkan, de lulligonagas goarggasmuvvá ja goddá logiid duháhiid, muhto su fápmu ii biso. ₁₃Davvigonagas čohkke soahteveaga mii lea velá stuorit go ovddit, ja muhtun jagiid geažes son boahtá stuorra soahteveagain ja ollu dárbašiiguin. ₁₄Daid áiggiid olusat vuostálastet lulligonagasa, ja muhtun veahkaválddálaš olbmát du iežat álbmogis čuožžilit, vai oainnáhus šaddá duohtan, muhto sii gahččet. ₁₅De davvigonagas boahtá, ráhkada fallehančoma ja váldá ladnegávpoga. Lulliveagat eai biđe sus, eai oppa sin válljusoalddáhatge veaje vuostálastit. ₁₆Falleheaddji dahká maid dáhttu, iige oktage biđe sus. Son bahkke čáppa eatnamii ja buktá mielddis billašumi. ₁₇Son áigu váldit oppa lulligonagasa riikka. Son dahká soahpamuša suinna ja addá sutnje nuorra nissona vai beassá billistit su riikka, muhto duššás, danin go dat ii lihkostuva sutnje. ₁₈De son jorgala riddoeatnamiid guvlui ja váldá dain máŋga. Muhto muhtin oaivámuš loahpaha su hiddjádusa ja máhcaha dan su iežas oaivái. ₁₉De son máhccá iežas riikka ladniide, guossala, gahččá, iige leat šat. ₂₀Su sadjái boahtá muhtun gii vuolggaha vearrogáibideaddji dan eatnama čađa mii lea riikka čikŋa. Oanehis áiggi geažes son cuvkejuvvo, muhto ii moari bokte iige soađi bokte.

₂₁Su sadjái boahtá badjelgeahčahas geasa gonagasárvu ii gula. Son boahtá vuorddekeahttá ja oamasta gonagasválddi gávvilvuođain. ₂₂Son jávkada visot vašálaččaid soahteveagaid, velá lihtu oaivámušge cuvkejuvvo. ₂₃Go muhtin lea dahkan suinna lihtu, de son bargá behtolaččat ja oažžu fámu, vaikko sus leat unnán olbmot. ₂₄Vuorddekeahttá son bahkke eatnama šattoleamos siiddaide ja dahká dakkáriid maid eai su áhčit eaige su máttaráhčitge leat dahkan. Son juogada rieviduvvon opmodaga, sállaša ja biergasiid iežas olbmuide. Son smiehttá mo fallehit ladniid, muhto dat buot bistá dušše oanehassii. ₂₅Son čohkke fámus ja roahkkatvuođas ja falleha lulligonagasa stuorra soahteveagain. Dalle lulligonagas manná soahtat hui stuorra ja gievrras soahteveagain, muhto son ii biđe bealis bahás juonaid geažil. ₂₆Dat geat boradit gonagasa beavddis, cuvkejit su. Su soahteveahka njámastuvvo eret, ja ollugat gahččet. ₂₇Guktot gonagasat hutkaba baháid. Soai čohkkába ovtta beavddis ja gielisteaba goabbat guoimmiska, muhto duššás, dasgo loahppa ii boađe ovdal mearriduvvon áiggi. ₂₈Nubbi máhccá eatnamasas ollu opmodagain ja smiehttá baháid bassi lihtu vuostá. Go son lea čađahan daid, de son manná ruoktot eatnamasas. ₂₉Mearriduvvon áigái son manná fas lullieatnamii, muhto dán vuoro ii geava nugo ovddit háve. ₃₀Kittelaččaid skiippat fallehit su, ja son šlundu ja gáidá. De son máhccá ja moaráhuvvá bassi lihttui. Máhcadettiin son guldala daid geat leat hilgon bassi lihtu. ₃₁Dat soahteveagat maid son lea vuolggahan, bohtet ja eahpebasuhit tempelladni, heaittihit beaivválaš oaffara ja ceggejit heavaheaddji fastivuođa. ₃₂Daid geat behttet lihtu, son fille jorralussii juonaidisguin, muhto dat geat dovdet Ipmila, bissot nanusin ja dahket maid galget.

₃₃Álbmoga jierpmálaččat rávvejit, muhto ieža sii šaddet muhtun áigái miehkkái ja dollii, fáŋgavuhtii ja rieviduvvot. ₃₄Go sii leat áŧestusas, de sii ožžot uhca veahkáža, muhto eatnagat geat dorjot sin leat behtolaččat. ₃₅Muhtun jierpmálaččat jorralit vai earát čilgejuvvojit, buhtistuvvojit ja bassojuvvojit, gitta loahpa áiggi rádjái, dasgo mearriduvvon áigi ii leat vel. ₃₆Gonagas dahká maid dáhttu. Son alida iežas ja dahká iežas stuoribun go buot ipmilat. Son sárdnu hirpmus sániid alimus Ipmila vuostá ja ovdána dassážii go moari áigi nohká, dasgo dat mii lea mearriduvvon, ollašuvvá. ₃₇Son ii beroš áhčiidis ipmiliin iige nissoniid jiellatipmilis. Son ii beroš ovttage ipmilis, muhto dahká iežas stuoribun go buot dat. ₃₈Son baicce gudnejahttá ladniid ipmila. Dan ipmila maid su áhčit eai dovdan, son gudnejahttá golliin ja silbbain, divrras geđggiiguin ja divrras dávviriiguin. ₃₉Son váldá háldosis nana ladniid ja luohttá vieris ipmilii. Daidda geat dohkkehit dan, son addá stuorra gudni. Son diktá sin hálddašit eatnagiid ja juogada sidjiide eananbihtáid bálkán. ₄₀Loahpa áiggis lulligonagas soahtá suinna. Davvigonagas falleha su vovnnaiguin ja riidejeddjiiguin ja ollu skiippaiguin. Son manná ovtta nuppi eatnamii ja márrá daid badjel dego dulvi. ₄₁Son manná čáppa eatnamii, ja logit duháhat gahččet. Muhto Edom ja Moab ja eanas ammonlaččat besset báhtui. ₄₂Son oamasta ovtta nuppi eatnama, iige Egyptage seastašuva. ₄₃Son beassá golle- ja silbaártnaid hearrán, buot Egypta divrras dávviriid hearrán. Velá libyalaččat ja nubialaččatge leat suinna. ₄₄Muhto ságat nuortan ja davvin suorggahit su, ja moaris son vuolgá heavahit eatnagiid ja vihahit sin duššadeapmái. ₄₅Muhto go son lea ceggen gonagasgođiidis meara ja čáppa bassi vári gaskii, de son joavdá loahppasis, iige oktage veahket su.