Daniel 12

₄Muhto don, Daniel, čiega dáid sániid ja seile girjji gitta loahpa áiggi rádjái. Eatnagat čádjidit, muhto diehtu lassána.”

₅Mun, Daniel, fuobmájin dalle guokte eará olbmá. Nubbi čuoččui dán bealde eanu, nubbigis nuppe bealde. ₆Nubbi celkkii dan olbmái gii lei gárvodan beallemasa ja čuoččui eanu čáziid bajábealde: “Man guhká bistá ovdal go buot dát ovddolaš áššit dáhpáhuvvet?” ₇Olmmái gii lei gárvodan beallemasa ja čuoččui eanu čáziid bajábealde, bajidii olgeš gieđa ja gurut gieđa almmi guvlui, ja mun gullen su vuordnumin su bokte gii eallá agálaččat: “Go áigi ja guokte áiggi ja áigebealle lea vássán! Go bassi álbmoga fápmu lea oalát cuvkejuvvon, de buot dát ollašuvvá.” ₈Mun gullen dan muhto in ádden, ja mun dadjen: “Hearrá, mii lea buot dáid loahppa?” ₉Son vástidii: “Mana, Daniel. Dát sánit čihkkojuvvojit ja seilejuvvojit gitta loahpa áiggi rádjái. ₁₀Olusat sillejuvvojit, čilgejuvvojit ja bassojuvvojit buhtisin, muhto suttolaččat suddudit ain, iige oktage sis ipmir dán. Muhto jierpmálaččat ipmirdit. ₁₁Dan áiggi rájes go beaivválaš oaffar heaittihuvvo ja heavaheaddji fastivuohta ceggejuvvo, gollet duhátguoktečuođi ovccilogi beaivvi. ₁₂Ávdugas dat gii vuordá ja gierdá duhátgolbmačuođi golbmalogivihtta beaivvi! ₁₃Muhto mana don loahpa áiggi guvlui. Don manat vuoiŋŋadussii ja dasto bajásčuožžilat beivviid loahpas.”